Read Biblia Mixe de Quetzaltepec Proverbios 20 Bible Online

Proverbios 20 - Biblia Mixe de Quetzaltepec bible

Proverbios 20

¹Yë nëë mëti'ipë mukpën yajtëkooyëp yë ja'ay; yë nëë mëkpë ëxëëk yë ja'ay tyaj'ëtë'ëtsy tyaj'ëna'any;; ko ja'ay myu'ukyë tëkoopy yë jot winma'any ets ka'ap tii oy tuny.

²Ko tu'uk yë yajkutujkpë jyoot'anpëky, jëtu'un tä kaa nyiitsyën; pën yajjoot'anpëkëp jam ënäty nyäpyëjktä'äkyë o'kënjëjp'am.

³Kumay yë ja'ay nyäxy mëti'ipë jëtu'unyë yajxe'empyën yë näy'ojë, je'eyëp ko ka'ap tyëkoy'äty yë tsuuja'ay mëti'ipë jatëkok yajtso'ontäkpyën.

⁴Ko tnixëëw'aty ma ja'ay yu'uy pyuxyën, yë nuux ka'ap jää tii tuny; e jää ko ja pëjktä'äky pyëtë'ëkanë, jä'ä tja'ixtaaynyë tii tyunëpën ets ka'ap t'ëkpatnë.

⁵Mëti'ipë ja'ay ayu'utsy winë myëmääpy myëtäjpyën, jëtu'un yë'ë tä tu'uk yë këk nëë'akëyën; e ja'ay mëti'ipë wijyën pojën tnijawë.

⁶Tää ja'ay mëti'ipë nänyikajpxëpën ko tyukjajtyp winë tunëty, je'eyëp ko ka'ap pën tmëpëky.

⁷Jotkujk yë ja'ay yë y'u'unk y'ëna'k yajpaatë mëti'ipë të jyuuky'ätyën tëy tëtä'äky.

⁸Ko tu'uk yë yajkutujkpë tpaaty ja kyutujktakn je'eyë ko wyiinme'eky tääts tyaj'atëkoy ja ëxëëkpë.

⁹Ni pën tkajëkyepy y'ëna'anëty: Ëjts wa'atsës yë njot nwinma'any ets ka'apës yë nëë poky nmëëtëty.

¹⁰Ko yë ja'ay ka'ap tii mëtëy tkijpxy, ets ka'ap tii kä'pxy tëy jënu'un jye'emtyëtyën, jëtu'un mäjtskpëky mëti'ipë Tios y'ëxëëk'ijxypyën.

¹¹Mëët ja tyu'unën kyajpxën ja yä'äy ëna'k, yë'ë mëët yaj'ixy pën mëtëy ja jyuukyajtën tyajtu'uye'ey.

¹²Yë tatsk yë'ë winë yajtukmëtoop; yë wiin yë'ë winë yajtuk'ijxp; Tios të tyajkojy.

¹³Këtii yë tsuu ma'ay xyajmëjtëkëty, këtiipë jëna'a m'ëyow mjotëkoyëty. Wijy xëmë m'itëty, ets ka'ap mka'ayën m'ukën tyëkoy'atëty.

¹⁴Mëti'ipë ja'ay tii jyuyäämpyën jëtu'un t'ënëëmë mëti'ipë to'kpën: ix tyaapë tooky y'ëkma'at'ajnë, e ko tjuy mëti'ipë jëtu'un nyikäjpxypën, tääts nyätyukxoontä'äkyë.

¹⁵Jaakni'ik tsyowpaaty mëti'ipë kajpxp mëtyakpën niwijy nikejy, këtiinëm tu'kë'ëyë pu'ts pujxn ets ja tsaa tsowëtypë naaxwiinyëtë apëtsëmpyë.

¹⁶Pën yajnu'kxypyën ja'ay ka'apë t'ixy'ätyën, pëjkë wyit ets yë'ë tjëjpwa'akëty ja nu'kxy.

¹⁷Yë ja'ay jotkujk nyäjyawëty ko y'antä'äky; ok ëxëëk tmëjaty ko nyäjyawëty naaxway yowë të yajtuk'awëjë.

¹⁸Ko tii yë ja'ay yajxon tuknipëjktaakë, ënät y'oyë pën tëë yajkajpxtë'ëy. Ko muum yë tsip y'ity, ënät ja'ay yajxon twinkuwa'akë pën tëë jëyëjp tmëmay tmëtajy wi'ix tsyiptuna'anyën.

¹⁹Ja'ay mëti'ipë winë poj'am yajnajxypyën, ka'ap tukjaty wi'ix winë yu'utsy tmëët'atëtyën, paaty këtii jëtu'unpë ja'ay mëët mnämyäyëtëty.

²⁰Mëti'ipë ja'ay pyojkpyën yë tyaak tyeety, kupi'its kukoots y'ooka'any ets atsë'ëk ajawë.

²¹Ko tii yajpaaty yaj'ixy ets ka'ap nijënu'un nyimëjaawtä'äky, ok ëxëëk yajmëjaty yajmëkëpety.

²²Nijëna'a mka'ëna'anëty ets tii ëxëëk xytyuunwinpita'anëty, nikë yë'ë tuk'ijxpät yë Wintsën, ets yë'ë mputëkëtëty ma tii xymyëmay xymyëtajyën.

²³Yë Tios y'ëxëëk'ijxyp ko ja'ay ka'ap tii mëtëy tkijpxy, ko ja'ay twi'tma'aty mëti'ipë tii tyukijpxypën ka'ap ninu'un y'oyëty.

²⁴Yë Tios yë'ë wa'ats nyija'ap wi'ix yë ja'ay tu'uktu'uk nyäxy tyëkë. Nitu'uk yë ja'ay tkanijawë wi'ix yë jyuukyajtën myiny kyëtä'äky.

²⁵Kutsë'ëkë wäänë ko yë ja'ay tii yë Tios tukwinwanë ets ënät ok tmëkjawë ko ja wyaantakën tyäky.

²⁶Yë yajkutujkpë mëti'ipë wijyën yajxon tpaye'ey ja nyëë pyoky ja ja'ay mëti'ipë pokymyëëtën, ets ënät tëytyuny jëtu'un tä pyaat'atyën.

²⁷Yë jot winma'any mëti'ipë yë Tios të tmo'oyën yë naaxwiinyëtë ja'ay, yë'ë kyutë'kxyp yë jot winma'any këkpaat.

²⁸Tu'uk yë yajkutujkpë janty mëk jam y'ity ma yajkutukyën, ko tuny winë mëët ja oyjyot oywyinma'any ets mëët ja tëyajtën.

²⁹Mëti'ipë ëna'ktëjkëty tyukmëjnajxtëpën, yë'ë ko kyumëjaaw'atë; e mëti'ipë mëjja'aytyëjk tyukmëjnajxtëpën, yë'ë ko jyap'atë yë jyot wyinma'anyëty oypyë.

³⁰Jëna'ajëty yë ëxëëk ja'ay'ajtk, yë'ë mëët tsyooypyetsy yë nätsyiik näkyoxë ets ko tsyëtyuty; yë näwyopë yaj'o'oyëp yë jot winma'any.