Read Biblia Mixe de Quetzaltepec Proverbios 22 Bible Online

Proverbios 22 - Biblia Mixe de Quetzaltepec bible

Proverbios 22

¹Ni'ik tsyowpaaty ko mëj'äämpy ja'ay y'ity ets oy yajnikäjpxy yajnimëtyä'äky, këtiinëm ko pu'ts pujxn ets poop pujxn may tmëëtëty.

²Yë kumeenyjyä'äy ets ëyoopëja'ay tu'knax yë'ëjëty; Tios të yajkojëtë nimäjtskëty.

³Yë ja'ay mëti'ipë wijyën poj'am t'ixy ko muum kyutsë'ëkëty ets ënätyë tjëjpkuwa'akë; e mëti'ipë ka'ap wyijyëtyën, ni'ikyë tyu'uye'ey'ëti'ity ets ëxëëk jyäty kyëpety.

⁴Yë yu'unk'ajt naxym'ajtën ets ma Tiosën, yë'ë myëmiinpy yajmiimpy yë kuwit'ajt kumeenyajtën, jotkujk'ajtën ets ja juukyajtën.

⁵Ma ëxëëk ja'ay yë nyë'ë tyu'ujën, tam jyätyë mëti'ipë yaj'anäjp yaj'akojxëpën; e mëti'ipë ja'ay kyëwent'ajtypyën yë jyuukyajtën, nyija'ap wi'ix tuknaxëtyën ja yaj'anäjp yaj'akojxëpë.

⁶Yaj'ijxpëk ja u'unk ëna'k tyam ma myutsk'atyën, ko myëjja'ayëty, ka'ap nëjkx tsuu yajpaaty.

⁷Ma ja ëyoopëja'aytyëjkën, ja kumeenyjyä'äy jä'ä jam ënä'ämp; ets ma ja'ayëtyën mëti'ipë nu'kxtëpën, yë'ë jam ënä'ämp ja mëti'ipë yajnu'kxpën.

⁸Mëti'ipë ja'ay yaj'ijxëpën yë ëxëëk jot ëxëëk winma'any; Tios nëjkx mëj këjää tyukpoky'ätyë mëët ja joot'an.

⁹Mëti'ipë ja'ay oy yë jyiiky myëku'uk jya'apën, nëjkxëp mëj këjää ja näkyënu'kxë tpaaty, mëët ko ënäty ja jyiiky myëku'uk t'akaaytyuky t'a'uktuky.

¹⁰Ko yaj'ixkexy yë ja'ay mëti'ipë je'eyë jotmay y'ixkujkëpën, myënëjkxyp näjyëtu'un ja tsyip y'äkë, jëtu'un jäpaat kyixy nyäxy ja tsip käjpxy ets ja näyajjotkëxë.

¹¹Yë yajkutujkpë tsyojkpy yë ja'ay mëti'ipë tëy tëtä'äky ja'ay'ajtpën, ets myëku'uk ja'ap mëti'ipë mëtëy kajpxpën.

¹²Yë Tios y'ijx'ijtyp kyëwent'ajtyp, yë wa'ats ja'ay ets nyikajpxtutyp ma ja'ayën mëti'ipë win'ë'ënën mëët jyamëta'aka'anyën.

¹³Mëët ko kyatuna'any yë nuux, je'eyë wiinkjaty y'ënä'äny, ko jää tu'u'aay kaa mëti'ipë tsu'utsaanpën.

¹⁴Yë wiink to'oxytyëjk jëtu'un npëjktakmëty tä mëjjutën ma kyuka'anaxtën yë ja'ayëty mëti'ipë Tios të tpokyën.

¹⁵Tsuuja'ay y'ëna'k'aty, yë tsuu'at jëwa'kp yë'ë ko yajtukwopë.

¹⁶Mëti'ipë ja'ay pyëjkëpën tii yë ëyoopëja'ay ets nyäyajkumeenytya'aka'anyë mëk ëyoopëja'ay y'awinpita'any.

¹⁷Yë'ë tyam ëkmëtoow'itë ya'atë aaw ayuk mëti'ipë ojts tmëtya'aktën yë wijyjyä'äytyëjkëty. Yi'iyë jëtu'un tu'uk tyam mëmay mëtajtë mëti'ipë yam miitsëty ntukni''ixëjantëpën.

¹⁸Tää xy'ëk'ixëty ko janty'oy nëjkx mnäjyawëty, ko jap xyajwë'ëmëty mjootjoty mwinma'anyjoty ets yaj'a'ëw yaj'akajpxëty.

¹⁹Tyam ntuknikexy ets jam tu'ukyë xypyëjkta'akëty yë mjot mwinma'any ma Tiosën.

²⁰Tëë ntuknijayë i'px majk yë wijy aaw wijy ayuk mëti'ipë ëëwijp kajpxwijpën ets mëti'ipë myëët'ajtypyën ja wijy aaw wijy ayuk,

²¹ets mtukni''ixëja'anyë ja tëyajtën, ets oy xy'ëtsoowinpitëty mëti'ipë tii myajtëëwëpën.

²²Këtii yë ëyoopëja'ay o'ktëy xytyunëty mëët yë'ë ko y'ëyoy jyotëkoy, ets ni yë'ë ëxëëk xykyatun xykya'ënëëmëty mëti'ipë ka'ap tjëkyepyën nyäkyuwa'anëtëty,

²³jä'ä ko Tios yë'ë kuwanëp yë ëyoopëja'ay ets ëxëëk tuna'any ja mëti'ipë ënäty ja ëyoopëja'ay ëxëëk tyuunpyën.

²⁴Këtii xymyëku'ukjawëty yë ja'ay mëti'ipë ëxëëk ëtëtsp ënaanpën, ets mëti'ipë xëmë äjkëpën tooyëpën,

²⁵këtiipë jä'ä xyjyatëty ja ëxëëk jot ëxëëk winma'any mëti'ipë myëët'ajtypyën, këtiipë jëtu'un mjatëty tä jeexyë kë'ëm ja tejpxy mnätyukyo'ktsumyën.

²⁶Nijëna'a xykyakupëkëty ets wiink ja'ay ja nyu'kxy xykyëpäjtëty,

²⁷jä'ä ko pën ka'ap xymyëëtëty tii mtukëpätëpën, yë'ëpaat nëjkx mpëjkëty yë mmaapäjn.

²⁸Këtii kë'ëmwinma'any xyajtëkatsëty yë tsëpa'an mëti'ipë m'aptëjk të tpëjkta'aktën.

²⁹Mëti'ipë ja'ay oytyuunk tyuunpyën, jam muum tyuunkpaaty ma y'itën yë yajkutujkpëtëjk ets ka'ap jyamëty ma ja'ayëtyën mëti'ipë ka'ap tii tkëjxm'atën.