Read Biblia Mixe de Quetzaltepec Proverbios 26 Bible Online

Proverbios 26 - Biblia Mixe de Quetzaltepec bible

Proverbios 26

¹Yë tip ka'ap tuk'oyë ko jää kyä'äy xëkopkjoty, ni yë'ë nëë tuu jää tkatuk'oyë ma ja pëjktäky yajpëjkë'ëky yajtuunë'ëkyën, ets näjyëtu'un ko tu'uk yë tsuuja'ay mëj'äämpy yajëkyepy, ka'ap tuk'oyë.

²Jëtu'un tä tu'uk yë tsi'k kyääkjëtityën ets tä yë patutkën ka'apë tmëëtëtyën yë pyä'än, jëtu'un ja näpyokë ka'ap jyäty ma ja'ayën mëti'ipë nanëkoo pën të pyokyën ets ka'ap tii tuuntëko'oyën tmëëtëty.

³Yë ja'ay yajyujpy yë kwaay, yë krukts yajpëjktakp yë y'ajäänë'ëk, e yë tsuuja'ay yajwinto'pxy ets jyä'äkyukë.

⁴Mëti'ipë ja'ay ka'ap timy'ëtsoyën yë tsuuja'ay, ka'ap tyukpaatyë ja tsyuuwinma'any.

⁵Mëti'ipë ja'ay y'ëtsoopyën ja tsuuja'ay, näjyëtu'un kyëxë'ëky tä ja tsuuja'ayën.

⁶Ko tsuuja'ay tii ayuk yajmo'oy ets nëjkx muum kyäjpxynyäxy, jëtu'un tpaaty tä jeexyë pën nyätyekpyujxtu'utyën ets ja jyotmay tyajkëjääjë.

⁷Ja'ay mëti'ipë tekymya'atën ka'ap tjëkyepy muum jëkäm jya'tëty, näjyëtu'un ja aaw ayuk mëti'ipë tu'uk ja tsuuja'ay kyäjpxypën.

⁸Jëtu'un tä ja'ay tsaa tkëxtsumyën ma tsaawëtu'unën, jëtu'un nyäxy tu'uk yë ja'ay mëti'ipë tsyojkpy jya'apën yë tsuuja'ay ka'apë oy myäy tyäjyën.

⁹Tu'uk yë ëmu'ukyë ja'ay oy yë äpny jyakumyë, ka'ap tjawë, näjyëtu'un yë ja'ay mëti'ipë tsuujën, ka'ap twinjawë yë wijy aaw wijy ayuk.

¹⁰Jëtu'un tä yë ja'ayën mëti'ipë jam yë tyi'pxnën aak tyukni''ijxyp oytyiijëty, jëtu'un ja'ay nyäxy mëti'ipë tyuunkmoopyën yë tsuuja'ay.

¹¹Yë uk nyiwinpijtyp yë y'iitsy, e yë tsuuja'ay nyiwinpijtyp yë tsyuuwinma'any.

¹²Wä'än yë tsuuja'ay jyaak ja'akyukëty, këtiinëm yë ja'ay mëti'ipë wijy näyajnajxëpën.

¹³Mëët ko kyatuna'any yë nuux, je'eyë wyinma'any y'ixta'ay ets y'ënä'äny ko jam tu'ujotm tam yë kaa jyëtity mëti'ipë tsu'utsaanpën.

¹⁴Jëtu'un tä tëjk'aaw myë'ëwtityën yë pujxn mëti'ipë majts'ijtëpën, jëtu'un yë nuux ja'ay kyi'it'ëwtity janaam jatsojk ma myaapäjnën.

¹⁵Yë ja'ay nuuxpë jotkujk yë kyë'ë t'atijë texyjoty, e jää ko tjajë'kxanë, tsip ets t'apëkëty y'aawjoty.

¹⁶Yë ja'ay mëti'ipë nuuxën janty ixpëky ni'ik nyäjyawëty këtiinëm wëxtujk yë wijyjyä'äy mëti'ipë tyukjajtëpën y'ëtsowtëty.

¹⁷Mëti'ipë ja'ay tsiptuktëjkëpën, jëtu'un nyäxy tä jeexyë tu'uk yë uk tyatskëjxy tmatsyën.

¹⁸Jëtu'un tä tu'uk yë ja'akyupojën mëti'ipë ajotkumonë ti'pxë'kpën,

¹⁹jëtu'un yë ja'ay nyäxy mëti'ipë myëku'uk wyin'ë'ëmpyën ets ok y'ënä'äny ko nëkoopë ënäty je'eyë wyin'äts'ooky.

²⁰Ko ja'axy kya'ity pi'tsp yë jëën, näjyëtu'un ko yë ja'ay kyapi'tskäjpxy, këjxp yë tsip.

²¹Ko jëënpajk xytsyokëty, jëënkupëk yë ju'uny, e ko yë jëënyä'änk xytsyokëty, jëënkukap yë ja'axy; e näjyëtu'un ko xytsyokëty yë tsip käjpxy, ëxëëk mja'ay'atëty.

²²Yë ja'ay mëti'ipë pi'tskajpxpën oy nyäjyawëty ko jyiiky myëku'uk tnimëtyä'äky, e ja ja'ay mëti'ipë pën ko tnijawë mëk tja'awëkyëtä'äky.

²³Jëtu'un tä naaxtu'ts yajtuknikoyën yë poop pujxn, jëtu'un nyäxy ja aaw ayuk mëti'ipë janty'oy yajmëtoopën, e jap jootjoty winma'anyjoty tëkatsy jap.

²⁴Mëti'ipë ëxëëk'ijxpën, ka'ap tyajmëtoyë ko myëtyä'äky, e jap ma jyot wyinma'anyën ëxëëk jap winë tmëmay tmëtajy.

²⁵Këtii xymyëpëkëty ko ëxëëk ja'ay janty'oy mmëmëtya'akëtëty, jap ma jyot wyinma'anyën ujts jap mëët yë ëxëëkajtën.

²⁶Yë ëxëëk ja'ay oy jënu'un tjayu'uty ja y'ëxëëkjot y'ëxëëk winma'any, kwanë ko ja'ay nijawëtëty.

²⁷Ko ja'ay jyuttajy, kë'ëm jap kyuka'anaxy; mëti'ipë ja'ay yajtsaawinkëpijpën, kë'ëm nyätyukninäkyë.

²⁸Yë ja'ay mëti'ipë antakpën ëxëëk t'ixy mëti'ipë tëyajtën mëtyakpën, mëti'ipë ja'ay je'eyë tyäty kyu'aawën yajjo'ptääpy winë je'eyë.