Read Biblia Mixe de Quetzaltepec Proverbios 29 Bible Online

Proverbios 29 - Biblia Mixe de Quetzaltepec bible

Proverbios 29

¹Mëti'ipë ja'ay juun yë jyot wyinma'any pyëjktäkpyën ko yaj'ojy, ka'ap jeky jyuuky'ata'any; ets ni pën jää kya'ëna'anëty ëkë wi'ix ko të y'ooky.

²Ko oyjyä'äytyëjkëty yë'ë yajkutuktë, jotkujk yë naax kajpn y'ity; ko ëxëëkja'aytyëjk yë'ë yajkutuktë, o'ktëy yë naax kajpn jyäty kyëpety.

³Yë u'unk maay mëti'ipë wijyën, jotkujk yë tyeety tyaak tyajnäjyawëty; e mëti'ipë yi'iyë to'oxytyëjk pyajëtijtypyën, je'eyë nëkoo meeny tyaj'ixtuny.

⁴Yë yajkutujkpë mëti'ipë yajxon nipaye'eyë tyuunpyën; yajmëktäkpy yë kyajpn; e mëti'ipë je'eyë yajtsoowpäjtääpyën winë, ëxëëk yë nyaax kyajpn tyajjaty tyajkëpety.

⁵Mëti'ipë ja'ay janty'oy xëmë myëku'uk nyimëtyäkpyën, je'eyë nëkoo myëku'uk ëyo'ontum tyajka'aja'any.

⁶Yë ëxëëk ja'ay kyë'ëmpoky muum kyu'o'këp; e yë ja'ay mëti'ipë winë oy tyuunpyën, akujk jotkujk jyuuyky'äty.

⁷Yë wa'ats ja'ay myëmääpy myëtäjpy yë ëyoopëja'ay wi'ix mëpaat jyuuky'ätyën ijxtëm pyäätyën, e yë ëxëëk ja'ay nijënu'un jëtu'unpë tkamëmay tkamëtajy.

⁸Ko ja'ayëty ëxëëk nyä'ämtë, yë naax kajpn jëtu'un yaj'ixy ka'ap yowë jotkujk yajpaaty; yë wa'ats ja'aytyëjk tëë tnijawëtë wi'ix tyaj'ëmontëtyën yë mayjyä'äy.

⁹Ko tu'uk yë wijyjyä'äy nyäy'ojyë mëët yë tsuuja'ay, nëkoo je'eyë nyäyajjoot'anpëkyë ets je'eyë yajnëxi'ik yajtukxi'iky ets nitii tkayaj'oyë.

¹⁰Yë yajja'ay'o'kpëtëjk ooky t'ixa'antë mëti'ipë mëtëy juukyajtpën.

¹¹Yë tsuuja'ay ënätyë tkajpxpëtsëmy mëti'ipë myääpy tyäjpyën ets jëtu'un winë tuny, e yë wijyjyä'äy tyukjajtyp wi'ix tmajts'itëtyën yë y'aaw yä'än.

¹²Ko tu'uk yajkutujkpë yë'ë tmëpëky mëti'ipë antakpën, ja tyuunpëtëjk aakjëtu'un y'awinpijta'atë, ka'ap oytyuntë.

¹³Mëti'ipë ëxëëk yajtuunpën ets mëti'ipë ja myëku'uk ëxëëk tyuunpyën, nimäjtsk tu'knax yë'ëjëty: jä'ä ko Tios yë ijxën të myo'ojëtë.

¹⁴Mëti'ipë yajkutujkpë oy ënä'ämpën ma ëyoopëja'aytyëjkën, yë kyutujktakn xëmë tmëët'ata'any.

¹⁵Mëët yë näywyop näkya'atsë ja'ay tii tjaty, yë u'unk ëna'k mëti'ipë yajtsojkni'ikëpën je'eyë tyaak tyajtsëtyuny.

¹⁶Pën nimayëtëp yë ëxëëkja'aytyëjk, näjyëtu'un yë nëë poky myäyë; e yë ja'ayëty mëti'ipë ënäty oy juuky'ajtëpën, nëjkxëp t'ixtë ko ënäty ja ëxëëkja'aytyëjk ëxëëk jyatë kyëpätë.

¹⁷Mtukumëtowëp yë m'u'unk m'ëna'k ko tii oy tkatunëty, jëtu'un jotkujk myajjuuky'atëtëty; ets mmo'ojëtëty ja xoontakën.

¹⁸Ma ka'ap jyam'atyën ja ëëwij kajpxwijën mëti'ipë yë Tios jyä'ä'ajtypyën, ka'ap jam ni pën nyäjyä'äkyukëty ets ni pën jam tii oy tkatuny. Yë naax kajpn jotkujk yajpaaty ko ja'ay tuntë mëti'ipë Tios y'ënä'ämën'ajtypyën.

¹⁹Ko mëtuunpë je'eyë yajtukmëkäjpxy ko tii oy tkatuny, ka'ap tja'akyukë, jyamëtoow'ijtyp ja ijty, je'eyëp ko ka'ap tpatuny.

²⁰Yë tsuuja'ay wä'än jëna'a wyinma'anytyëkëty, këtiinëm yë ja'ay mëti'ipë je'eyë mëtyakpën ets ka'ap tmëmay tmëtajy mëti'ipë kyäjpxypën.

²¹Ko ja'ay tsojkni'ikë yë tyuunpë ma myutsk'atyën, ko myëjnë'ajnëty ka'ap nëjkx wyinkutsë'ëkëty.

²²Mëti'ipë ja'ay ëxëëk ëtëtsp ënaanpën ets janty pojën winë timtyunankojy, je'eyë xëmë tsyippaata'any ets ka'ap tii oy tunëty.

²³Mëti'ipë ja'ay mëj këjxm näjya'awëyëpën, o'ktëy muum jyäty; e mëti'ipë yu'unk naxym näpyëjktakëp;, oyjya'awëyëp ja'ay.

²⁴Ja'ay mëti'ipë ka'ap nnikäjpxyën ja mä'tspë ets tëë t'ixy ko të myeetsy, kyë'ëm juukyajtën kya'oy'ijxyp, jä'ä ko ëxëëkjaty yaj'ënëëmëja'any ets ka'ap ja tuuntëko'oyën nikajpxa'any.

²⁵Mëti'ipë ja'ay myënaaxwiinyëtë ja'ay tsyë'këpën, kyë'ëm winma'any ëxëëk yajjajt yajkëpäjtëp; e mëti'ipë ja'ay yë Tios tyuk'ijxpejtypyën, Tios këwent'atanëp.

²⁶May yë ja'ay tsojkën'aty ets y'oyjyawëtëty yë yajkutujkpë, yë Tios yë'ë tu'uk nipaye'epy.

²⁷Mëti'ipë ja'ay oy tsuj juuky'ajtëpën, ka'ap oy nyäyjyawëtë ma ëxëëkja'aytyëjkën; ets ëxëëkja'aytyëjk näjyëtu'un ka'ap oy nyäyjyawëtë ma oyjyä'äytyëjkën.