Read Biblia Mixe de Quetzaltepec Proverbios 31 Bible Online

Proverbios 31 - Biblia Mixe de Quetzaltepec bible

Proverbios 31

¹Ya'atë jëtu'un ojts tkäjpxy yë Lemuel, mëti'ipë jam ënä'ämën Masá, tyaak ojts jëtu'un tyukmëmëtyä'äkyë.

²U'unk maay, mëti'ipës të nyajminy të nyajja'tyën naaxwiinyëtë, mëët koos ja Tios ojts ja njëëytyak nnu'kxtakën t'ëtsoowinpity, ¿wi'ix yam mijts n'ëkjaak'ënëëmëty?

³Këtii yë mjot mmëjaaw xyaj'ëxma'atëty mëët oymyëti'ipë to'oxytyëjk, kanaak yë mëj'äämpyëtypë wintsëntëjk tyëkoytyë mëët ko nëkoo na'oymyëti'ipë to'oxytyëjk nyätyukwin'ëënëtë.

⁴Lemuel, ka'ap y'oyëty ko yë ënä'ämpëtëjk ets yajkutujkpëtëjk y'uuktë myu'ukëtë,

⁵jä'ä ko tsojk tja'atyëkoytyëty ja ënä'ämën tëyajtën, ets ka'ap t'ëkja'amyäjtsnëtëty ja ëyoopëja'ay.

⁶M'ëxmatsëp yë nëë mëti'ipë mukpën, wä'än yë'ë t'uuktë mëti'ipë yajpatëpën mon tuk.

⁷Wä'än t'uuktë, këtiipë nëkoo tmëmay tmëtajtëty ja y'ëyo'on jyotmayëty.

⁸Nikajpxtu'ut ja mëti'ipë ka'ap tukjaty nyäkyukajpxëtëty; niwaantu'ut mëti'ipë ka'ap nyäkyuwa'anyën.

⁹Nikajpxtu'ut ets nipaye'ey; kuwa'an yë ëyoopëja'ay ets mëti'ipë yu'unk naxym ja'ay'ajtpën.

¹⁰Yë to'oxytyëjk mëti'ipë winë janty'oy janty tsuj tyuunpyën, tsip yajpaaty. Ni'ik yë tsyowpaaty, këtiinëm oytyiijëty mëti'ipë tsowën.

¹¹Yë nyiye'etyëjk janty'oy nyäjyawëty mëët yë'ë, ka'ap nijëna'a tyëkoy'ajtxëty tii.

¹²Jotkujk ja nyiye'etyëjk tyajnäjyawëty, ets xëmë jotkujk jyuuky'äty.

¹³Nëjkxëp t'ixta'ay ja wit tujkx oyëtypë ijxtëm yë lanë wit ets linë wit; akujk jotkujk xëmë timtyuny winë jam ma jyëën tyëjkën.

¹⁴Jëtu'un tä tu'uk yë mëj kepy nëëwinye'epyë mëti'ipë juy tooky myëye'epyën, jëtu'un muum tmëtsoony jëkäm mëti'ipë tyuk'oy'atäämpyën.

¹⁵Jopyëp, ka'anëm xyiiynyë ko tyajkaaykyojy yë y'u'unk y'ëna'k ets tyuunpë.

¹⁶Ko muum yë naax t'ixy mëti'ipë oyën tääts tjuy, ko myeeny tpaaty jatëkok tääts tpeny jë'kxy ujts jë'kxykyepy.

¹⁷Oy mëk xëmë nyäyaj'ityë ets jëtu'un tyuny ye'ey amëk jotmëk.

¹⁸Y'ijx'ijtyp kyëwent'ajtyp ja wyit myeeny ma winë tooky tyäkyën ets y'ijxyp tyuunpy pën oy ja jyuy tyooky nyë'ëwitsy tyu'uwitsy; monyëm pyëtë'kojy tuunpë, ets jäänëm tyuunpëtsëmy jënäkyxyëëw.

¹⁹Kë'ëm winë t'oytyuny, kë'ëm yë wit tujkxy tyajkojy.

²⁰Xëmë tputëkë ja ëyoopëja'aytyëjk ma winë tyajmëyatën.

²¹Ka'ap jyotmaytyëkë ma y'u'unk y'ëna'kën ko tyityky'äty, jä'ä ko ja y'u'unk y'ëna'k aak myëët'ajtëp ja nyimu'ux.

²²Kë'ëm t'oytyuny yë kyoy pyä'än, ets aakyë'ë yajtuunpy oyëtypë ja wit tujkxy.

²³Yë nyiye'etyëjk aak ixy'ajtëp yë ja'ay jam kajpnjotm, ets näjyëtu'un yë ja'ay mëj'äämpy jyëkyepyë tä mëj'äämpy yajjëkyäptën yë wintsëntëjkëty.

²⁴Tääpë to'oxytyëjk yajkojpy yë nijän ets wëën oyëtypë ets tukmëtooky ja mëti'ipë ajuutyëpën.

²⁵Oy mëk xëmë yajpaaty jëtu'un tä pyäätyën ets ka'ap tmëmony tmëtuky ja komjëpompë.

²⁶Niwijy winë tkäjpxy tmëtyä'äky, ets jä'ä yaj'ixpëky mëët tu'uk ja tsojkën ja'awën.

²⁷Wa'ats oytyuny xëmë ja jyëën tyëjk tyaj'ity, ets jä'ä nyijuuky'äjtyp mëti'ipë nyitu'un nyiye'eyëpën.

²⁸Ja y'u'unk y'ëna'k ets ja nyiye'etyëjk mëj'äämpy pyëjktä'äkyë ets jëtu'un y'ënë'ëmxëty:

²⁹Yë to'oxytyëjk tää kanaak jyätyë mëti'ipë oyëtyën, e mijts jaakni'ik m'oyëty këtiinëm jyëtu'un'atë ja wiinkëtypë ja to'oxytyëjktëjk.

³⁰Yë to'oxytyëjk janty oypyë kyëxë'ëkyën, nëkoopë je'eyë ijxën tmëëtëty ets nëkoopë nnätyukwin'ë'ënëmëty, ja to'oxytyëjk mëti'ipë myëjpëjktäkpyën yë Tios, patëp yajmëjpëjkta'akëty.

³¹Mëjpëjkta'aktë jëtu'unpë ja to'oxytyëjk ma ja naax kajpnën. Tukmëjjawëtë ko winë oy tuny.