Read Biblia Mixe de Quetzaltepec Proverbios 5 Bible Online

Proverbios 5 - Biblia Mixe de Quetzaltepec bible

Proverbios 5

¹U'unk maay, ijxkuk ja'akyukë yë nwijy'ajtënës, mëtoow'it yë nkëpety'ajtënës.

²Jëtu'un janty këpety myajpaatëty ets winma'anymyëët mkajpxëty.

³Jä'ä ko yë wiink to'oxytyëjk janty'oy yajmëtoy kyäjpxy myëtyä'äky, ets y'aaw yo'kn yu'unk naxym yajmëtoy,

⁴e ko wyimpëtsëëm jyëjpëtsëëmnë ta'amëm je'eyë jya'awëkyëtaknë, ets jëtu'un yajtsëtyujt yajwintëkooynyë tsujknën mäjtsk pa'apë jyëjpëtyën.

⁵Ko jëtu'unpë yë to'oxytyëjk npajëtijtmëty, jam nitëyë xyajnëjkxmëty ma o'ktaknën. Jam yë nyë'ë tyu'u nyijkxy ma o'kpëjutën.

⁶Yë'ë ka'ap tmëmay tmëtajy yë juukyajtën, ni yë'ë tka'ixy tkatuny pën ma jëtu'un yajpaaty.

⁷Paaty mijts u'unk maay, ijxkujk ja'akyujkëkës, këtii xymyajtstu'utëty ya'atë n'ijxpëjkënës.

⁸Tim winwa'ktu'ut jëtu'unpë to'oxytyëjk. Këtii jam mnëjkxëty ma jyëën tyëjkën.

⁹Këtii nëkoo pën xymyo'ojëty ja mwit mmeeny, ets këtii pën nëkoo tjä'ä'atëty mëti'ipë myaj'u'unk'ajtypyën, këtiipë ja wiink ja'ay mëti'ipë tëkatsy ja jyot wyinma'anyëtyën myaj'ookëtëty,

¹⁰këtiipë yë ëxëëkja'aytyëjk yë'ë tjë'kxtëty tpëktëty mëti'ipë mijts të xynyitunën ets të xyajnimëjaawtä'äkyën.

¹¹E ko mijts tëkatsy winë xytyuunpëty, kë'ëm nëjkx ëxëëk xyjyaja'awënë ko ënät ja mjot mnini'kx ëtyä'äkyë'äämpy kyukëjxënë,

¹²ets nëjkx mja'ënanë: Wi'ixës ko ojts n'ëkjëjpmëkajpxëpë ja näkyajpxtë'ëwën, wi'ixës ko ojts nkatunyë këwentë ja näwyijtswinpitë.

¹³Ka'apës ojts nmëtoowkukë mëti'ipë ja yaj'ixpëjkpëtëjk jyanikajpxtën, ets ka'apës nkäjpxymyëpëjky mëti'ipës ojts xyjya'ëëwij xyjyakajpxwijtën,

¹⁴tëë t'ixtë yë ja'ayëty ko jawäänës yë ëyo'on jotmay të xykyamëmëtä'äky.

¹⁵Yajmon yë mtëëtsë mëët yë nëë mëti'ipë pëtsëëmpën ma mkë'ëm nëëjutën.

¹⁶Këtii nëkoo xy'ixtäm xy'ixyokëty yë nëë mëti'ipë mu'tpën ma mnëë jutën. Këtii nëkoo xyaj'ëxma'atëty ets xytyäm xyokëty tu'ujoty.

¹⁷Yë nëëjut ets nëë mijts yë mjä'ä, këtii mëët pën xypyëjkwa'kxëty;

¹⁸kënu'kxy yajpaaty mëti'ipë mnëëjut'ajtypyën. Kënu'kxy mëjjawë y'ity ja mto'oxytyëjk mëti'ipë mëët m'ëna'k'atyën,

¹⁹ja oypyë wa'atspë ja to'oxytyëjk. Xëmë mwinkow m'akowëtëty. Xëmë mtsokëtëty mjawëtëty.

²⁰¿U'unk maay, wi'ix ko wiink to'oxytyëjk mnätyukyajkujo'opëtëty, wi'ix ko wiink to'oxytyëjk mmatsëtëty mënänëtëty?

²¹Yë Tios wa'ats t'ixy wi'ix yë naaxwiinyëtë ja'ay tyu'uye'eyën, ka'ap t'ijxtëkoy ma ye'ey nyäxyën.

²²Yë ëxëëk ja'ay kë'ëm nyäyajtu'u'ëtukyë ko tii tkäjpxy tmëtyä'äky wiinkjaty. Yë poky mëti'ipë tyuunpyën, yë'ë nätyuktsuum nätyukmajtsëp.

²³Mëët yë'ë ko ka'ap tnijawë ja ëëwij kajpxwijën, jam nitëyë nyijkxy ma y'ookëtyën; mëët ko tsyuujëty, kë'ëm nyäyaj'ooka'anyë.