Read Biblia Mixe de Quetzaltepec Proverbios 6 Bible Online

Proverbios 6 - Biblia Mixe de Quetzaltepec bible

Proverbios 6

¹U'unk maay, pën mtuk'ënu'kxyp tii yë mjëëky mmëku'uk ëkë mtukwinwa'anëp pën nëkoo tii,

²kë'ëm mnämyo'oyë ja jotmay ets mnäyajtu'u'ëtukyë mëët ja mkë'ëm'aaw mkë'ëm'ayuk.

³E ko ëwaatsëtum mnäyajwë'ëma'anëtëty, u'unk maay, ma myajpaatyën mmëku'uk kyë'ë'amjotm, mmëktun ja mjot mwinma'any, koonëm xytyukyakëty mëti'ipë të xytyuk'ënu'kxyën.

⁴Këtii mma'ajëty ets ninu'un mkapo'kxëty.

⁵Kä'äk, jëtu'un tä yë jëtyu'u kye'ekyën ko pën yaj'ooka'anyë. Kä'äk, jëtu'un ijxtëm yë joon tkuke'ekyën yë y'o'ktakn.

⁶Mijts nuux, ëk'ix yë nuj, ix wi'ix winë tunyën, ets xyjyatëty wi'ix winë xytyunëtyën.

⁷Oy tkamëëtëty pën ënä'ämëtëpën ets oy tkamëëtëty pën ënëëmëtë tii tyunëp,

⁸yë'ë jää tnipëjktaakë yë jyi'kxy ma pyojë'ëky wyaatsë'ëkyën, ets tnipëjkpety may'äämpy mëti'ipë të tnitsëmy të tnikë'ëyën.

⁹Mijts nuux, pëtë'knë, këtii nëkoo mma'ay.

¹⁰Pën mijts je'eyë mma'ay ets mku'uuy mkuwëjpxy, ets je'eyë mnäkyë'ëmëkityë ko mki'itwinpity,

¹¹Myaj'ëmaaytya'akäämpy winë, ets ja ëyo'on ëxëëk nëjkx mtunyë, jëtu'un tä jeexyë pën mtukja'tyën mëët yë pujxn.

¹²Mëti'ipë ja'aykupojën ets ëxëëk ja'ay'ajtpën, aakjä'ä nyimëtyäkpy ka'apë tyiyajtënëtyën;

¹³je'eyë wyinme'eky, tyeky ets kyë'ë mëët winë tnikäjpxy ko tii tni''ixë.

¹⁴Ja jyot wyinma'any ëxëëk yajpaaty, aakjä'ä myääpy tyäjpy wi'ix winë ëxëëk tunëtyën ets wi'ix pën tyajjoot'anpëkëtyën.

¹⁵Paaty yë'ë ajotkumonë ëyo'on jotmay tyukëta'aka'anyë; tu'k ijxmi'kxyë o'ktëy jyata'any, ets ka'ap nëjkx y'ëktsooypyatnë.

¹⁶Tëtujk ets wëxtujk ja winma'any mëti'ipë Wintsën y'ëxëëk'ijxypyën:

¹⁷ko ja'ay nyämyëjaw nyäjyääntyjyawëty, ko ja'ay wyin'ëëny, ko ja'ay yaja'ay'ooky nanëkookyëjxm,

¹⁸ko ja'ay ëxëëk myëku'uk nimay nitajë, ko ja'ay nipe'tym'äty ëxëëkpë,

¹⁹Ko ja'ay nipi'tskäjpxy myëku'uk, ets ko ja'ay yajtsiptuny.

²⁰U'unk maay, ijxkuk ja'akyukë mëti'ipë mteety mtukni''ijxëyëpën, këtii xyjyä'äytyëkoyëty mëti'ipë yë mtaak të mtuk'ijxpëkyën,

²¹Mëët'at jap xëmë ma mjot mwinma'anyën, jëtu'un xymyëët'atëty ijxtëm jeexyë tii xymyëët'atyën këxtsumy myo'kntuuy.

²²Yë'ë mtu'uwinwowëtëp ko muum mnëjkxëty yë'ë mkëwent'atëtëp ko mma'ajëty mpo'kxëty; yë'ë mmëkajpxanëp ko ënäty mma'aypyëti'iky.

²³Mëtëy yë'ë ko yë ënä'ämën tëyajtën ets ijxpëjkën xëmë tyi'kxy jyäjy. Ko tii nyajtukmëkajpxmëty ets ko nyaj'ëëwij nyajkajpxwijmëty, jëtu'un tä ntu'upatmëtyën ma juukyajtënën.

²⁴Yë'ë mkuwa'anëtëp ko ja to'oxytyëjk muum mpaatëtëty mëti'ipë ëxëëk ja jyot wyinma'anyën, mëti'ipë janty'oy yajmëtoopën kyäjpxy myëtyä'äky,

²⁵Këtii xykyupëkëty ets yë'ë mwin'ëënëtëty ko oy kyëxë'ëky. Këtii xykyupëkëty ets yë'ë mtukyajka'ajëtëty ko janty'oy wyintë'kxy.

²⁶Yë to'oxytyëjk mëti'ipë nyini'kx tyo'kpy yäjkpyën, paatykyëjxm jëtu'unpë tuunk'aty jä'ä ko kyäyä'äny y'uuka'any, e yë to'oxytyëjk mëti'ipë jam yë nyiye'etyëjk ets wiink ye'etyëjk tsojkën'aty, yë'ë y'ijxyp mëti'ipë kuwit kumeenyën.

²⁷Mëti'ipë ja'ay yë jëën nätyukatsymyëko'onëyëp kopkpëky ko tyoyëty yë wyit.

²⁸Mëti'ipë jëënpajkëjxy ye'epyën, kopkpëky ko tyeky tyoy

²⁹Mëti'ipë näyajkujo'pëpën mëët yë wiink to'oxytyëjk, ëxëëk tmëjata'any.

³⁰Ka'ap pën twiink'ixy yë mä'tspë, ko yi'iyë tmeetsy mëti'ipë jyë'kxäämpyën,

³¹jää tëy ko yajkupaatë ma jam myeetsyën, kwanë ko nëjkx tyajwinpijta'ay ets ëpëky wëxtujk'ok tyajni'ikëty mëti'ipë ënäty të tony të tmeetsyën, ets nëjkxëp tyajktaaynyë mëti'ipë ënäty myëët'ajtypyën.

³²Tsuu yë ja'ay mëti'ipë wiink to'oxytyëjk mëët jyëtityën. Mëti'ipë jëtu'unpë tyuunpyën, kë'ëm nyäyajtëkoyë.

³³Nëjkxëp tmënaxy tyajnaxy yë nätsyiik näkyoxë, ets ni pën kyamayëtëty tjo'otsëty ja mëti'ipë ënäty të tuntëkoyën.

³⁴Jä'ä ko yë ja'ay mëti'ipë nyi'äkë'ajtypyën yë tyo'oxytyëjk, jëtu'un tä jëënën, ka'ap pyokymye'kxy ko jyoot'anpëky.

³⁵Ka'ap tmëpëky oy pën wi'ix jya''ënëmaayënë ets oy tii jyayajmooynyë.