Read Biblia Mixe de Quetzaltepec Proverbios 9 Bible Online

Proverbios 9 - Biblia Mixe de Quetzaltepec bible

Proverbios 9

¹Ja ixpëkyajtën ojts ja tyëjk tkojy, ets tpëjktäky wëxtujk yë nyixeny.

²Tääts tyaj'o'ky yë tsajpkaa ets ja tyëjk tnixëëwtuuny; ojts ja uuky tnipëjktaakë, xu'kxpë ets pa'akpë, ets mëj këjää t'a'ijxëy ja ka'ayën ukën.

³Ënät ojts tkexy ja tyuunpëtëjk jam kopkkëjxm ets tukyaax tukjokëtëty.

⁴Mintë yaa ëna'ktëjkëty, tsuupë myajpaatën. Ojts tnikäxë ja ka'apë wyijy'atën.

⁵Min kaytyë ja ntsajpkääkyës ets min uuktë ja nëë mëti'ipës të nyaj'oyën.

⁶Këtii xëmë tsuu myajpaatë, oy mjuuky'atëty: jëtu'un mnaxtëty mtëkëtëty tä ja'ayën mëti'ipë niwijy nikujk yajpatpën.

⁷Tuk'ënëëmë yë ëxëëk ja'ay ka'apë nijënu'un jyä'äkyukën; ets xy'ëk'ixëty pën këtii tsaatsy ma'at m'ëk mëkäjpxyë, ets pën këtii je'eyë m'ëk yajjoot'anpëkyë.

⁸Oj yë ëxëëk ja'ay, ets xy'ixëty pën këtii m'ëk mëtsiptsoonyë. Tuk'ënëëmë yë ja'ay wijypyë kujkpë ma ka'ap tii oy tunyën, ets xy'ixëty pën ka'ap m'ëk oyjyawëty.

⁹Kajpxwij ja wijyjyä'äy, ets xy'ëk'ixëty pën këtii ni'ikyë wyijytyä'äky. Yaj'ijxpëk yë këpetyjyä'äy, ets xy'ëk'ixëty wi'ix ni'ikyë kyëpetyä'äkyën.

¹⁰Yë wijyajtën yë'ë mëët tsyo'ontä'äky ko yë Tios yajmëjjaw yajjaantyjyawë, ko yajnijawë ja ni'ik wa'atspë këpetyajtën ënäty nikëxë'kp.

¹¹Oy ko jyää'aty wijyajtën, jeky mjuuky'ata'any ets këjääjëjaanp ja xëëw jëmëjt ma mjuuky'ata'anyën.

¹²Pën mijts mwijy mkujk, mijts kë'ëm mtuk'oy'atëp. Pën ëxëëk mja'ay'äty, kë'ëm ëyo'on mnätyukpaatëtëty.

¹³Yë tsuuwinma'any jëtu'un tä tu'uk yë to'oxytyëjkën mëti'ipë pi'tskajpxpën, kunëpap jyä'äy'äty ets winma'anytyuk.

¹⁴Je'eyë yajxon nyänyikëy nyänyiwitsëty ets t'awä'tspety yë tyëjk aaw, jam nëjkx kyuwa'akë ma ja kajpn kopkën,

¹⁵ets tmëkäjpxy ja mëti'ipë najxtëpën, mëti'ipë oytyu'u ye'eytyëpën.

¹⁶Mintë miitsëty yä'äy'ëna'këty jënu'un ka'ap tii xyjyatën xynyijawëtën. Jëtu'un tkäjpxynyikexy ja ja'ay mëti'ipë ka'ap kyëpety'atën.

¹⁷Yë nëë mëti'ipë yajmä'tspën, wäänë pa'ak jyawë, yë tsajpkääky mëti'ipë yajkääpyën ayu'utsy, ni'ik xu'kx jyawë.

¹⁸Ka'ap nijawëtë ko tëkokyë jënu'un të twoyën aak o'këntum yajpaatë.