Read Biblia Mixe de Quetzaltepec Eclesiastés 12 Bible Online

Eclesiastés 12 - Biblia Mixe de Quetzaltepec bible

Eclesiastés 12

¹Ja'amyäts mëti'ipë myajkoj mpëjktakën tyam ma m'ëna'k'atyën ma ka'anëm mmëja'ayënëm; minaanp ja xëëw jëmëjt ma nëjkx m'ëna'anyën: Nijënu'unës xoontakën; nkapaaty ma juukyajtënën.

²Tyam jëtu'un mëpaat xyjyä'äymyetsy mëti'ipë winë të tyajkojy të tpëjktä'äkyën ma tyi'kxy jyäjyën ja xëëw po'o ets ja mëtsa'a ets jyää'atyën ja yoots nëma'a ko tyuuta'ay.

³Minaanp ja xëëw jëmëjt ma je'eyë tsyëtyuya'antën ja mëti'ipë y'ijx'ijtëpën ja këmoontëjk ets ma ka'ap ja jotmëkja'aytyëjk y'ëkjotmëk'atanëtë; ma wäänë jyaak wë'ëma'antën yë jëtsy nyimääpëtëjkëty; ets ma ka'ap y'ëk'ijxkä'äkanëtë mëti'ipë ijxnajxtëpën ventanëjoty.

⁴Ko ënäty jyä'ty jëtu'unpë ja xëëw jëmëjt, nëjkxëp ja tëjk'aaw y'ëtujknë tëja'ptsowpë; ka'ap nëjkx y'ëkyajmëtoownë jëtsymyääpë ets ja joonëty ko ënäty y'ëwtë;

⁵ka'ap nëjkx t'ëkmakxnë ja it ets nëjkxëp tmëët'ajnë ja tsë'ëkë ko muum jyanëjkxa'anëty. Ets ja almendrë nëjkx pyijy, ka'ap nëjkx ja nëë jëyujk t'ëtsu'utsanë ets ka'ap nëjkx yuu y'ëkpatënë. Jä'ä ko yë'ë ënäty wiinkoonëp ja y'ijtakn xëmëkyëjxmëpë ets në'ëjoty tu'ujoty nëjkxëp yajnijëëy yajniyaxnë.

⁶Ja'amyäts mëti'ipë ojts myajkojyën, tyam ma m'ëna'k'atynyëmën ma ka'anëm pyotynyëmën ja tejpxy, ma ka'anëm pyu'unyëmën ja tu'ts mëti'ipë pu'ts pujxn mëët y'oytyunyëtyën; ma ka'ap myëpu'ujënëm ja wa'ats nëë ma ka'anëm tyijnyëmën ja kepy mëti'ipë myë'ëwtijtypyën ja tejpxy ko nëë yajjuuty nëëjutjoty.

⁷Kom ok, naaxway jatëkok y'awinpity ja jot nini'kx, e ja jot ja'awën jam jatëkok wyimpity ma Tiosën, mëti'ipë jot ja'awën yäjkpyën.

⁸Ëjts, mëti'ipë kë'ë ëmaaypyën, tyamës jatëkok nyikäjpxy: Natëkë winma'any, natëkë winma'any. Aak natëkë winma'any oytyiijëty.

⁹Ko ja kë'ë ëmaaypyë tjak ni''ijxpëjkëy winë, ni'ik ojts winë tkajpxwä'kxy ma ja ja'ayën. Ojts näjyëtu'un may ja aaw ayuk tmä'kxy mëti'ipë juukyajtën nyimëtyäkpyën ets t'oytyuuntaay ijxtëm oy yajmëtowëtyën.

¹⁰Jä'ä y'ixtaaytyääpy ja aaw ayuk mëti'ipë oy yajmëtowëpën ets tjaay ja winma'any mëti'ipë mëtëyën.

¹¹Yë y'aaw y'ayukëty yë wijyjyä'äytyëjkëty, jëtu'un tyuktëkë tä kumën, ko tyu'ukmujkta'ay jëtu'un ta'tspëky y'itë tä yajkupën ta'tspëky yë kepy'akujpë'ëk, mëti'ipë tu'uk yë kupixyny këwent'ajtpë të tnikupën

¹²Mëj këjää ja kajpxwijën yajpaaty ma yë'ëjëtyën. Yë nokjyääyk ka'ap jyëjpkëxy ets oy jënu'un mëj këjää n'ijxpëjkmëty kë'ëm näyaj'ënu'kxëmëty.

¹³Jëtu'un jyëjpkëxy ja kë'ë ëma'ayën. Yë Tios yë'ë mmëjjaw mkënu'kxyjyawëp ets yë'ë mpatunëp yë y'ënä'ämën tyiyajtën, jä'ä ko yi'iyë jëtu'un mëpaat yë naaxwiinyëtë ja'ay tuny.

¹⁴Yë Tios yë'ë xyajtëwa'anëmë wi'ix tu'uktu'uk të njuuky'ajtëmë, oy ënäty ëxëëk ëkë oy të njuuky'ajtëmë ets oy ënäty tii yu'utsy me'ty të ntu'unëmë.