Read Biblia Mixe de Quetzaltepec Eclesiastés 2 Bible Online

Eclesiastés 2 - Biblia Mixe de Quetzaltepec bible

Eclesiastés 2

¹Ënätës ojts kë'ëm nämyä'äy nätyajxëty: Tyam minës n'ëkjuuky'äty ijxtëmës kë'ëm ntimy myäy ntimy tyäjyën, minës n'ëktukxony yë juukyajtën. E ya'atë winma'any natëkë winma'any näjyëtu'un.

²Etsës të npaaty yë winma'any ko yë xikën ëwë'kën nëkoopë yë'ë ets ko nyätyijyë ntukxo'onmëty yë juukyajtën natëkë'ajtp yë'ë.

³Etsës të nmay të ntajy ets wijyajtën yë'ëjës mëët nätyukmajts'ityë, tëë n'uukyës yë tsatym nyëë mëti'ipë tëë nyimaanaxyën, etsës të n'uuky të një'kxy ijxtëm tu'uk yë naaxwiinyëtë ja'ay kyu'uxyën mëët yë nëë etsës n'ijxmatsa'any pën yë'ë mëpaat yë naaxwiinyëtë ja'ay tuny ma naaxwiiny naaxkëjxy wäänë jyuuky'ajtkojyën.

⁴Mëj këjääjës winë të ntuny; ojtsës yë nkutujkëntakn mëj nkojy, tëëjës yë naax nkam mëj mpëjktä'äky maas yë tsatsymkyam mëjatyëty nmëët'atyën.

⁵Ojts mpëjktä'äky yë nkam ntu'u maas kë'ëm nyaj'ity nyajwintëyën yë aay ujts, aaytyëëm ujtstëëm.

⁶Tëës mëj nipotsë yë nëë mëti'ipës ntukyajxo'kpyën yë nkam ntu'ujës;

⁷tëëjës njuy may yë tuunpë naaxwiinyëtë ja'ay to'oxytyëjk, ojts yë ntuunpës npaaty mëti'ipë jap maas yë ntëjkën të myëxu'unk'atyën, may'äämpyës yë jëyujk tsajpkaa të nmëët'aty ets kupixyny, ni'ik may këtiinëm mëti'ipë të yajkutuktë jëyëjp maas ënäty ëjts ka'ap ntëkënëm yajkutujkpë yaa Jerusalén.

⁸Tëë nipëjkpetyës may yë pu'ts pujxn, poop pujxn, wit meeny këtiinëm jyëtu'un'atë mëti'ipë jëyëjp të yajkutuktë. Tëës nmëët'aty yë xuxpë wojpë, ëëwpë yaxpë, kanaakës yë to'oxytyëjk të nmëët'aty ets tëëjës yë njuukyajtën yajxon ntukxony.

⁹Mëj'äämpyës të n'ity, ni'ikës winë may të nmëët'aty këtiinëm yë nmëku'uktëjkës mëti'ipë të y'ënä'ämtën yaa Jerusalén. Oyës winë jëtu'un të npaaty të n'ixy ets të ntuny të nkäjpxy yë wijyajtën je'eyëmës të nmëët'aty.

¹⁰Tëës winë ntuunta'ay mëti'ipë ntsojkën'ajtypyën; tëë n'ety nxoontä'äky janaam jatsojk. Tëës yajxon ntukxony yë ntuunkës, etsës yë'ë të nkuma'ayën'aty.

¹¹Ënätës të nmëmay të nmëtajy mëti'ipëjatyës të ntunyën ets wi'ixës tii të nmëmay të nmëtajyën ets mëti'ipës mëj këjää të nituunkën ets të nijawës ko nëkoopë tääpë tuunk të nyatëkë'aty, jëtu'un tä ja'ay poj tmatsa'anyën ets ko kajtëm yaa nitii naaxwiinyëtë tii mëpaat ntukjotkëtäkëmën.

¹²Ënätës të nmëmay të nmëtajy näjyëtu'un yë wijyajtën, yë tsuuajtën ets kunëpap'ajtën: ¿Tiitën jyaak timtyunëp yë ja'ay mëti'ipë yajkutukaanpën? yi'iyë mëti'ipë tëë y'ëktuun y'ëkjajtëpën.

¹³Ets të npaaty yë winma'any ko oy ni'ik yë wijyajtën ets këtii yë tsuuajtën, jëtu'un tä ni'ik y'oyëtyën yë të'kxën jajën ets këtii yë kootsajtën.

¹⁴Yë ja'ay mëti'ipë wijyën oy winë t'ixy tkoy, e mëti'ipë tsuujën jëtu'un jyëtity akootstuuypyën. Je'eyëp ko tëëjës nijawë ko tu'knax yë ja'ay kyëjxta'aja'antë.

¹⁵Ënätës të näy'ënä'änyë kë'ëm: Ma tsuuja'ay kyëxa'anyën nän jamës ëjts nkëxa'any, paaty yë wijyajtën tiijës nyajwa'anëty. Tääpë nän natëkë winma'any yë'ë.

¹⁶Jä'ä ko mëti'ipë ja'ay wijyën ëkë mëti'ipë ja'ay tsuujën ka'ap nimëti'ipë yajja'amyätsa'antë; ko nyäxy yë xëëw jëmëjt tääts winë yajja'atyëkooynyë, yë wijyjyä'äy ets tsuuja'ay tu'knax y'oka'an tyëkoya'antë.

¹⁷Ënätës të n'ëxëëk'ixy yë juukyajtën, jä'ä ko tu'kë'ëyë mëti'ipë tuunëpën jajtëpën aak ëjtsën nja'ap xytyukkëtakpety. Aak natëkë winma'any yë'ë ets nëkoopë je'eyë juukyajtën ntuk'ëyë'kmëty.

¹⁸Ojtsës näjyëtu'un n'ëxëëk'ixy yë tuunk ëyo'on mëti'ipës të ntuny të nkäjpxyën naaxwiiny naaxkëjxy, jä'ä ko tu'kë'ëyë mëti'ipë të nituunkën yë'ë nëjkx tmëwë'ëmta'ay mëti'ipës ënäty xykyutëjkëpën.

¹⁹E ja ja'ay mëti'ipës ënäty xykyutëjkëpën oy ja ënäty wyijyëty ets oy ja ënäty tsyuujëty, je'eyëm ja tjä'ä'ajta'aja'any mëti'ipës ënäty të nyajnituunkën ets npaaty të n'ixyën mëëtës yë njot nmëjaaw ets wijyajtën kujk'ajtën naaxwiiny naaxkëjxy. Tääpë nän natëkë winma'any yë'ë.

²⁰Koos të n'ixy mëti'ipës të ntunyën naaxwiiny naaxkëjxy, je'eyës të nmëmony të nmëtuky jä'ä ko ënäty je'eyë të nyajnituunkës,

²¹jä'ä ko jëna'ajëty jyäty kyëpety je'eyë winë tyäty nyituunkë ets mëët yë jot winma'any, wijy'ajt kujk'ajtën ets jot mëjaaw tii yajpaaty yaj'ixy ets yë'ë jyä'ä'ajtnëp ok mëti'ipë ka'ap të tyajnimëjaawtä'äkyën. Tääpë nän natëkë winma'any yë'ë. Ets ka'ap jëtu'un jyamëtëyëty.

²²Yë ja'ay, ¿tii pyätyp y'ijxyp ko mëk nyäyajtunyë naaxwiiny naaxkëjxy?

²³Je'eyë të y'ëyoy ko të jyuuky'äty, jëtu'un tä jeexyë tsëmy kë'ëy tyajye'eyën; tsu'um koots ka'ap yë wyinma'any tyajpo'kxy. Tääpë nän natëkë winma'any yë'ë.

²⁴Yi'iyë mëpaat yë naaxwiinyëtë ja'ay mëpaat tuny ets kyäyëty y'uukëty ets tukxoonta'akëty mëti'ipë nyijëtu'unëpën, jä'ä ko yi'iyës të nwinjawë ko tääpë yë'ë Tios yäjkpy.

²⁵Jä'ä ko ¿pën jotkujk yajpaataanp? pën ka'ap yë'ëjëty yë Tios yajjotkujk'aty.

²⁶Yë Tios, yë'ë yäjkpy yë wijyajtën, ijxpëky'ajtën ets xoontakën ets yë'ë myoopy mëti'ipë nyi''ijxkëtäkpyën; e mëti'ipë tuuntëkoopy kajpxtëkoopyën je'eyë yajxon tyajtuny ets tnipëjkpety yë wit meeny ets tuk'oy'atëty yë'ë mëti'ipë ënäty nyi''ijxkëtäkpyën. Tääpë nän natëkë winma'any yë'ë ets nëkoopë juukyajtën ntuk'ëyë'kmëty.