Read Biblia Mixe de Quetzaltepec Eclesiastés 3 Bible Online

Eclesiastés 3 - Biblia Mixe de Quetzaltepec bible

Eclesiastés 3

¹Yaa naaxwiiny naaxkëjxy aak myëët'ajtääpy winë nyixëëw nyijëmëjt; nyixëëw nyijëmëjt pyätyp ko tii tyunyë jyätyë:

²Nyixëëw nyijëmëjt pyätyp ko pën myëxu'unk'aty ets ko pën y'ooky. Ko pën kyojy mye'kxy ets ko pën wyixy nyuky ma ja mëti'ipë të yajkojy të yajpenyën.

³Nyixëëw nyijëmëjt pyätyp ko pën yaja'ay'ooky ets ko pën yajtsooypyetsy. Ko pën tii tyaj'oyë ets ko pën tii tyajma'aty.

⁴Nyixëëw nyijëmëjt pyätyp ko jyi'iy yä'äxy ets ko pën xyi'iky y'ëwë'ëky. Ko pën o'kpë tnimony tnituky ets ko pën xyëëwtuny.

⁵Nyixëëw nyijëmëjt pyätyp ko pën tsaa tka'atswä'kxy ets ko pën jatëkok tkoonmuky, ko pën nyämyënenyë ets ko pën tsyënaaywyä'kxy.

⁶Nyixëëw nyijëmëjt pyätyp ko pën tii t'ixmatsy ets ko pën nyäy'awijtsë'ëkyë. Ko pën tii tpëjkë'ëky tuunë'ëky ets ko pën tii t'ijxpëky.

⁷Nyixëëw nyijëmëjt pyätyp ko pën wit tukëëtsë ets ko pën wyit'axuyë. Ko pën amonyë y'ity ets ko pën kyäjpxy.

⁸Nyixëëw nyijëmëjt pyätyp ko pën tsyoky jyawë ets ko pën y'ëxëëk'ixy. Ko pën tsip nipëjktaakë ets ko pën jotkujk yajpaaty.

⁹¿Tii yë ja'ay tyimpaat tyim'ixëp ko je'eyë mnäyajtunyë?

¹⁰Tëës n'ixy ko yë Tios yë'ë ja'ay të tuunkmo'oy ets tmëët'atëty tii tyunëpën.

¹¹Yë Wintsën aak nyixëëw nyijëmëjt ojts tukpata'ay ets oy winë kyëxë'ëkëty ets aak oyëty t'oytyuuny; ojts näjyëtu'un yë naaxwiinyëtë ja'ay tyajkojy mëët yë jyot wyinma'any ka'apë kyixy tyukyën, oy yë naaxwiinyëtë ja'ay tkaja'aykyujkëtyä'äy wi'ix'äämpy myëjwiin kyëjääjëtyën mëti'ipë Tios të tuny të tkäjpxyën ets mëti'ipënëm tyunäämpy kyajpxäämpyën.

¹²Ëjts nija'apës ko yë naaxwiinyëtë ja'ay yi'iyë tsyojkpy wi'ix tukxoonta'akëtyën yë jyuukyajtën,

¹³jä'ä ko pën ëëtsajtëm ka'ayëm ukëm jää n'ijxmëty wi'ix yë ntuunk'ajtëm ntuk'oy'ajtëmën, mëti'ipë Tios të xymyo'oyëmën.

¹⁴Ets nän nija'apës ko tëkokyë mëti'ipë yë Tios të tyajkojyën kë'ëyxyëëw kë'ëyjyëmëjt yë y'ita'any. Mëti'ipë të tyajkojyën ka'ap tjëkyepy ni'ikyë nyaj'o'oyëmëty ëkë ni'ikyë nyajma'tmëty; tëë winë tyajkojy ijxtëm mëpaat yajtuk'oy'ätyën ets yë'ë yajmo'ojëty tu'uk ja.

¹⁵Tëkokyë mëti'ipë jääjën tääyëm yë'ë ets ka'ap jää tii yajpaaty mëti'ipë ka'ap jyääyëmëtyën. Tios kë'ëm tyuknipëjktakëp ets jatëkok tyunëtëty jyatëtëty mëti'ipë tëë y'ëktuun y'ëkjajtëpën.

¹⁶Ëjts tëëjës n'ixy wi'ix yaa naaxwiiny naaxkëjxy yë kutuunktëjk tnimeenypyëktën këtiipë tii oy tnipaye'eytyëty ets tuntë ja ka'apë myëtëyëtyën ma jeexyë tyu'uye'eyën ja jaantypë mëtëypyë ja nipaye'eyën.

¹⁷Paatyës ëjts n'ëna'any ko yë Tios yë'ë nyija'ap wi'ix tuna'any yë ja'ay mëti'ipë oy ja'ay'ajtpën ets ja'ay mëti'ipë ëxëëk ja'ay'ajtpën, jä'ä ko myëët'ajtääpy yë nyixëëw nyijëmëjt jëna'a winë tyunyë jyätyën ets ma winë yajtuny yajkäjpxyën.

¹⁸Näyjyëtu'unës n'ëna'any, ko yë Tios tëë t'ëwa'atsy yë në'ë tu'u ets naaxwiinyëtë ja'ay t'ixëty ko mëti'ipë tyuunpy kyäjpxypën jëtu'un tun winë tä aayjëyujk ujtsjëyujkën.

¹⁹Jää ënät yajwinjawë ko yë naaxwiinyëtë ja'ay ets aayjëyujk ujtsjëyujk tu'knax kyukëxëja'antë; tu'knax yë o'kën tëko'oyën jyää'aty wintu'uk paatu'uk ets tu'knax näjyëtu'un ja juukyajtën tsuxk'ajtën jyää'aty. Ka'ap tii mëk'ajtën yë naaxwiinyëtë ja'ay tmëëtëty mëti'ipë aayjëyujk ujtsjëyujk ka'ap tmëët'atyën; tääpë nän natëkë winma'any yë'ë,

²⁰ko y'ooktë tyëkoytyë aakjam jyajta'aja'antë ma tu'uk nyijkxyën; naax ojts yajtuk'oytyuntë ets nän naax jatëkok y'awinpita'antë.

²¹¿Pën nyija'ap ko ja naaxwiinyëtë ja'ay y'ooky tyëkoy jam ja jyot jya'awën nyijkxy tsajpjotm, e yë aayjëyujk ujtsjëyujk ko y'ooky tyëkoy jap jyëjptä'äky naaxpa'tkë'p?

²²Tëës nijawë ko ka'ap maa wiinkpë tii jaak'oypyë mëti'ipë yë naaxwiinyëtë ja'ay mëpaat tukxoontä'äkyën, yi'iyë patëp tukxoonta'akëty ko tyunëty ye'eyëty, jä'ä ko yi'iyë jëtu'un pät nitëjkëyëp, jä'ä ko ka'ap tjëkyepy pën tyuk'ëwa'anxëtëty tii tunan jatanëp ko ënäty të y'o'knë.