Read Biblia Mixe de Quetzaltepec Eclesiastés 5 Bible Online

Eclesiastés 5 - Biblia Mixe de Quetzaltepec bible

Eclesiastés 5

¹Ko mnëjkxëty tsajptëkoty mkëwent'atëp yë mjot mwinma'any; mijts këtii yë'ë xymyëmay xymyëtajëty jëna'a yë mwintsë'kën xyaka'any jëtu'un tsuuja'aytyëjkën, yë'ëmës mëmay mëtaj wi'ix xymyëmëtowëtyën yë Wintsën.

²Këtii mjot'ëtë'ëtsëty ets ënätyë tii xywyaanta'aka'anëty ma Tiosën, jä'ä ko yë Tios tsajpjotm yë yajpaaty ets mijts naaxkëjxy. Paaty mijts wäänjaty mëtya'akëty,

³jä'ä ko nëkooyë ja'ay je'eyë tyäty myäy tyäty tsyäjy amëkëp ko myä'äy ets ko nëkooyë myëtyä'äky tsuu poj jyaak mëtyakta'ay.

⁴Ko tii xywaanta'akëty ma Tiosën, ënätyë xykyuuytyunëty, jä'ä ko yë'ë ka'ap t'oy'ixy ko tii je'eyë yajwinwanë. Mtunëp jëtu'un mëti'ipë ënäty të xy'ëwaanën,

⁵jä'ä ko ni'ik oy ko ka'ap tii nëkoo nwinwa'anëmëty ets këtii ko tii nwinwa'anëmëty ets ka'ap jëtu'un yëk yajtuunë.

⁶Këtii xykyupëkëty ets mwiin m'aaw myajtëkoyëtëty, këtiipë ok m'ëna'anëty ma ja Wintsën ja kyäjpxynyajxpën: tëëjës ntëkoy. Këtii nëkoo Tios je'eyë xyajjoot'anpëkëty këtiipë tyajkutëkoyëty mëti'ipë të xy'oytyunyën.

⁷Mijts myajkëxë'ëkëp yë näwyinkutsë'ëkë ma Tiosën, oy pën tëkatsy tyajtu'uye'eyëty yë jyuukyajtën ets oy pën je'eyë tii ëxëëk tnikäjpxy tnimëtya'akëty.

⁸Këtii xytsyë'ëkëty ko muum ma naax ma kajpnën o'ktëy yajtunëty yë ëyoopëja'ay ets je'eyë yajwop yajka'atsëty jëtu'un tä jeexyë yajnipaye'eyën ets ijxtëm jyapaatë'atyën, jä'ä ko tu'uk yë yajkutujkpë tyuunpy winë ëxëëk ijxtëm yë jyot wyinma'anyën jä'ä ko tam yë mëj wintsën tmëëtëty mëti'ipë kuwanëpën ets yu'tsëpën ets mëti'ipë yu'tsëpën nän tam tmëëtëty mëti'ipë näjyëtu'un kuwanëpën.

⁹Yë'ë tyaapëty nätyijëtëp ko naax kajpn tyajwinpätë ets yajkutujkpë tmëtuny yë nyaax kyajpn.

¹⁰Mëti'ipë ja'ay yë wit meeny je'eyë y'ixk'ajtypyën ni'ikyë tmaytsyoky; mëti'ipë ja'ay je'eyë tyäty kyumeeny'ata'anyën ka'ap nijëna'a nyäjyawëty myeenypyääty. Tyaapë nän natëkë winma'any yë'ë,

¹¹jä'ä ko ja'ay tii mëj këjää tmëët'aty näjyëtu'un tyajtuny. ¿Tii tim yajpatp tim yaj'ijxp, ko je'eyë xëmë tmëmay tmëtajy ja'ay wi'ix myeenypyaatëtyën?

¹²Ja'ay mëti'ipë tuunpën, mëti'ipë ka'ap tmëmay tmëtajyën oy kyäyëty wäänë ëkë oy kyäyëty ku'uxyë, maap po'kxp oy tsuj; e ja'ay mëti'ipë kumeenyën yë wyit myeeny ka'ap yajma'ay yajpo'kxyë.

¹³Tëës n'ixy ntuny wi'ix naaxwiiny naaxkëjxy jyäty kyëpetyën yë ja'ay mëti'ipë wit meeny nyipëjkpejtypyën, yë'ë nyipëjkpejtyp mëti'ipë ëxëëk myëjat myëkëpätëpën,

¹⁴jä'ä ko mëti'ipë ja'ay kyatukjajtypyën wi'ix y'ajuy y'atookëtyën tsojk wyit myeeny tyajkëjxta'ajëty ets pën myëët'ajtyp tu'uk yë myaank, ¿tii nëjkx tmo'oy?

¹⁵Jëtu'un tä myiinyën naaxwiiny, näjyëtu'un wyimpita'any; niwa'ats ëxwa'ats tä myëxu'unk'ajtyën, ka'ap ninu'un tmënëjkxa'any mëti'ipë ënäty të tnitunën.

¹⁶Ya'atë je'eyë mëpaat yajnimony yajnituky, jä'ä ko jëtu'un tä ja'ay myinyën naaxwiinyëtë, näjyëtu'un jatëkok nyëjkxa'any. ¿Tii të tuny të tpaaty ko jyuuky'äty? nëkoopë je'eyë të tyäty tyuny.

¹⁷Nëkoo je'eyë të pyajuuky'äty akootstuuypyën ets je'eyë xëmë të nänyä'ämë të tyajnaxy ets pëjkën ijxën, monyëtukyë.

¹⁸Yi'iyës ëjts oy njaak'ijxyp ko ja'ay kyäy y'uuky ets ko tukxoontä'äky mëti'ipë jam pëtsëëmpën ma kyam tyu'ujën mëti'ipë të tnitunën naaxwiiny naaxkëjxy ma yaa wäänë jyuuky'ajtkojyën mëti'ipë Tios xymyo'oyëmën, jä'ä ko jëtu'unyë jëtu'un mëpaat njak winma'anypyätëmë.

¹⁹Näyjyëtu'un ënätnëpë ko yë Tios kë'ëm yë ja'ay tkënu'kxy mëj këjää winë tmo'oy ets myoopy yë juukyajtën ets tkayëty tjë'kxëty mëti'ipë nyijëtu'un nyiye'eyëpën ets mëti'ipë paat'ajtëpën, jä'ä ko yë ja'ay tpaaty t'ixy mëti'ipë nyijëtu'un nyiye'eyëpën nän Tiosëtën mooyëp.

²⁰Ets jä'ä ko Tios mooyëp ets tsuj xoontä'äky yajpaatëty, ka'ap tmëmay tmëtajy nëkooyë pën tii pyätyp kyapatyp ma jyuuky'ajtënën.