Read Biblia Mixe de Quetzaltepec Eclesiastés 7 Bible Online

Eclesiastés 7 - Biblia Mixe de Quetzaltepec bible

Eclesiastés 7

¹Ni'ik tsyowpaaty ko ja'ay mëj'äämpy y'ity ets këtii ko ja'ay nye'onkuutsyë mëët yë pa'akxu'kpë. Ni'ik tsyowpaaty ko o'kën tëko'oyën y'ity ets këtii ko pën myëxu'unk'aty.

²Ni'ik tsyowpaaty ko nëjkxmëty ma ja'ay nyaaxtëkën ets këtii ko nëjkxmëty ma ja'ay xyëëwtunyën; jä'ä ko yë o'kën tëko'oyën kopkpëky ko yë naaxwiinyëtë ja'ay tpata'aja'any ets mëti'ipë juuky'ajtëpën oy ko jeexyë tja'amyätstë.

³Ni'ik tsyowpaaty ko nyaxmëty ets këtii ko nxikmëty, jä'ä ko oy ëxëëk yë wiin jëjp ntu'unmëty jap jootjoty winma'anyjoty jotkujkëp jap.

⁴Yë wijyajtën myëmääpy myëtäjpy yë o'kën tëko'oyën ets tsuuwinma'any yi'iyë myëmääpy myëtäjpy wi'ix xyi'ika'any xyona'anyën.

⁵Ni'ik tsyowpaaty ko tu'uk wijyjyä'äy xy'ojmëty ets këtii ko tu'uk tsuuja'ay xytyukxoontakmëty.

⁶Ko yë tsuuja'ay xyi'iky jëtu'un yajmëtoy tä yë zarsa kepypyijyën ko wyintooykyëtä'äky, tääpë nän natëkë winma'any yë'ë.

⁷Yë tsiptu'un tsipkajpxën yajkujo'py yë ixpëkyjyä'äy ets wit meeny mëti'ipë pokyjyä'äy mooyëpën yajma'typ yë oypyë tu'unën kajpxën.

⁸Ni'ik tsyowpaaty ko nyaj'apatëmëty tu'uk yë tuunk ets këtii ko nyajtso'ontakmëty. Ni'ik tsyowpaaty yë ëwxijtën mä'kxtujkën ets këtii yë jotmëk'ajtën.

⁹Këtii joot'an mnätyukyajtëkoyëtëty, yë tsuuja'aytyëjk yë'ë ënätyë joot'anpëjktëp.

¹⁰Kajëna'a mkanäyajtëwëtëty tii ko tëëyëp aak'oy ijty winë, jä'ä ko tääpë jëtu'unpë yajtë'ëwën tsuuwinma'any yë'ë.

¹¹Ma ja'ayëtyën mëti'ipë naaxwiiny naaxkëjxy tsënaaytyëpën, tyuk'oy'ajtëp yë wijyajtën ets ku'uxyë y'itë. Jä'ä ko yë wyijy'ajtën ni'ik tsyowpaaty këtiinëm jyëtu'unëty yë kuma'ayën.

¹²Jä'ä ko yë wijyajtën jëtu'un kyuwa'any tä yë wit meenyën, je'eyëp yë wijyajtën yäjkpy ets kyuwäämpy yë juukyajtën ma wijyjyä'äyën.

¹³Ix yajxon wi'ix yë Tios winë të tuny të tkäjpxyën; ¿Pën y'ëk'u'uytyëwëp? mëti'ipë yë Tios näy xëkety të tpëjktä'äkyën.

¹⁴Ko myajpaatëty akujk jotkujk, mtukxoonta'akëp; e ko ka'ap oy mjotkujk'ajtën xypyaatëty mëmay mëtajëp ko aakyë'ë Tios yäjkpy ets naaxwiinyëtë ja'ay ka'ap tnijawë tii nimiin nikëtakëp.

¹⁵Tëkokyë ya'atë tëëjës n'ixta'ay ntuunta'ay ma yaa naaxwiiny naaxkëjxy njuuky'ajtkojëmën; yë oyjyä'äytyëjk nän je'eyëm y'ooktë ets oy të jyajuuky'atë ets ëxëëkja'aytyëjk jeky jyuuky'atë ets ëxëëk të jyajuuky'atë.

¹⁶Ka'ap y'oyëty ko ntimy oyjyä'äynyi'ikëmëty ets nän ka'ap y'oyëty ko ëxëëkpë ni'ik nyajmëjtëjkëmëty. ¿Wi'ix ko kë'ëm ëxëëk näyajjajt näyajkëpäjtëmëty?

¹⁷Ka'ap y'oyëty ëxëëk ja'ay näyajnajxëmëty ets ka'ap y'oyëty ko ntimtsyuu'ajtmëty. ¿Ka'ap mëpaat kë'ëm tsojkyë näyaj'o'këmë?

¹⁸Oy ko tii ta'tspëky nmajtsmëty ets ka'ap nmajtstutmëty. Mëti'ipë ja'ay jyä'ämyejtsypyën yë Tios aak'oy winë wyimpëtsë'ëmxëty.

¹⁹Ni'ik yë ja'ay jotmëk nyäjyawëty mëti'ipë wijyën, këtiinëm jëtu'un ko nimajk njatukjotmëk'ajtmëty yë yajkutujkpë naaxjoty kajpnjoty.

²⁰Je'eyëp ko ka'ap maa naaxwiiny naaxkëjxy ja'ay janty wa'atspë tyimjuuky'ätyën ets aak'oy winë timy tyuunta'ay ets nijëna'a kyapokytyuny.

²¹Këtii tu'kë'ëyë xytyimmëpëjkta'ajëty mëti'ipë ja'ay kyäjpxyp myëtyäkpyën, jëtu'un ka'ap xypyëjkta'akëty oy mtuunpë wi'ix muum mnikäjpxy mnimëtya'akëtëty.

²²Mijts wa'ats xynyijawë ko nän mnikäjpxy mnimëtyäkpy yë mjëëky mëku'uk tëkatsy.

²³Tëkokyë ya'atë tëëjës nija'awëtyä'äy jä'ä ko jëtu'unës ojts njot nwinma'any mpëjktä'äky koos wijy kujk nyajpaata'any; je'eyëp ko ja wijyajtën xymyëjëkäm'ajtptëmës jä'ä.

²⁴Tsipës mpaatëty yë winma'any etsës nija'awëtya'ajëty tëkokyë mëti'ipë jää ijtpën. Këk ets në'p oy mëti'ipës njanijawëjäämpyën paatyës ka'ap oy nwinjawë.

²⁵Ënätës ntëjkëy määpyë tajpë etsës ntëjkëy ijxpëjkpë, mpaata'anyës ja jot winma'any mëti'ipë mëpaat y'oypyëtsimyën, etsës ojts may ja winma'any npaaty oyëtypë. Tëës nijawë ko ka'ap y'oyëty ko tsuu nëpap nyajpatmëty ets ko ka'ap ko tsuu poj nja'ay'ajtmëty.

²⁶Tëës npaaty tu'uk yë winma'any mëti'ipë yajma'typën yë juukyajtën: tu'uk yë to'oxytyëjk mëti'ipë yë jot winma'any je'eyë tyuk'ëyi'kpyën ets tyajjaty yë aaw jot tsumpyën xotypyën. Mëti'ipë ja'ay jyä'ämyejtsypyën yë Tios kyukä'äkëp yë jëtu'unpë, e mëti'ipë najtspëkë ja'ay'ajtpën poj'am jam kya'ajëty.

²⁷Maas ëjts ja nwinma'any të mpëjktä'äky koos mpaata'any ja mëti'ipës n'ixtääypyën, ëjts mëti'ipë kë'ë amaaypyën, tëëjës nijawë,

²⁸ko ka'ap mpaatynyëmës ja mëti'ipës n'ixtääypyën. Tu'ukës je'eyë ja'ay të npaaty ma nitu'kmilpën mëti'ipë wijyën, je'eyëp ko nitu'uk yë to'oxytyëjk jam të kyayajpaaty.

²⁹Yi'iyës të nijawë ko yë Tios wa'ats yë naaxwiinyëtë ja'ay të tyajkojy, je'eyëp ko yë naaxwiinyëtë ja'ay kë'ëm yë jyuukyajtën tyajtsiptëkë.