Read Biblia Mixe de Quetzaltepec Eclesiastés 8 Bible Online

Eclesiastés 8 - Biblia Mixe de Quetzaltepec bible

Eclesiastés 8

¹¿Pën y'ëkmëpaatëp yë wijyjyä'äy? ¿Ets pën y'ëkja'aykyukëp wi'ix ko winë tyunyë jyätyë tä yaj'ixyën? Yë wijyajtën këxë'kp ma wiin ma jëjpën; ets oy tyajkëxë'ëky yë wiin jëjp. Ko tmëmëtowtën ja yajkutujkpë

²Mtunëp ja ënä'ämën mëti'ipë ja yajkutujkpë të tni'ënä'ämën, jä'ä ko jëtu'un të xytyuny ja waantakën ma Wintsënën.

³Këtii jëtu'unyë xywyimpëyë'ktu'utëty. Këtii xypyutëkëty ja ja'ayëty mëti'ipë tu'ukmujktëpën ets tuknipëjktaakëtë ja ëxëëkpë, jä'ä ko yë yajkutujkpë ko jyoot'anpëkëty, tsojk tii tunëty.

⁴Yë yajkutujkpë mëët jä'ä ko tmëët'aty kutujkën ko kyäjpxy, ka'ap tjëkyepy pën yajtëwëtëty tii ko jëtu'un winë tuny.

⁵Mëti'ipë mëtoopën ets käjpxyjyä'äykyujkëpën ka'ap tii jyata'any kyëpäta'anyë, mëti'ipë ja'ay wijyën nyija'ap wi'ix tii oy tunëtyën ets jëna'a tii oy tunyën.

⁶Yaa naaxwiinyëtë aak tää nyiwinma'any wi'ix tii mëpaat oy yajtunyën, je'eyëp mëti'ipë ka'ap yajnijawën

⁷yë'ë mëti'ipë tunan jatanëpën, ka'ap maa pën mëti'ipë jeexyë winë nyikäjpxypën.

⁸Ni pën ja'ay tkamëët'aty yë kutujkën ma juukyajtënën ets ni pën ja'ay tkamëtaty mëk'ajtën ets tyajtu'uwë'ëmëty ets ni pën ja'ay näjyëtu'un tkamëët'aty yë mëk'ajtën ma o'kënën. Ka'ap tjëkyepy nkukäkmëty ya'atë tsiptuunk, oy jënu'un ëxëëk ja'ay ëxëëk y'ëtë'ëts y'ëna'anëty ka'ap yë'ëkyëjxmëty tsyo'oka'any.

⁹Tëkokyë ya'atë wi'inma'any aak ënätës të mpata'ay koos të ntuknipëjktaakë ets n'ixa'any ntuna'anyës wi'ix yaa naaxwiiny naaxkëjxy ja'ay myëku'uk t'ëxëëktuny.

¹⁰Tëës näjyëtu'un n'ixy wi'ix yë ëxëëkja'aytyëjkëty yajnixoonta'aktën ko y'ooktë, oy ënäty nijëna'a yë tsajptëjk të tka'ixy'atë ets ma ja nyaax kyajpnëtyën ka'ap ni pën y'ëkja'aymyäjtsënëtë. Tyaapë nän nëkoopë yë'ë,

¹¹jä'ä ko mëët ko ojts jëtu'unyë nyayaj'ijxninaxy ja nyëë pyoky mëti'ipë ënäty të tuuntëkoyën ets ka'ap ënätyë yajtukumëtooy, yë naaxwiinyëtë ja'ay xëmë ëxëëk tuun'ëtë'ëtsa'any.

¹²Jëtu'un'äämpy ja ja'ay mëti'ipë tuuntëkoopy kajpxtëkoopyën jeky jëna'ajëty jyuuky'äty. Yi'iyës njaaknija'ap ko yë ja'ay mëti'ipë yë Tios y'ëwtajtypyën oy jyuuky'äty;

¹³e yë ja'ay mëti'ipë ëxëëk juukyajtpën, ëxëëk jyatë kyëpätë mëët ko të tkamëët'atë näywyinkutsë'kën ma Tiosën.

¹⁴E jëtu'unts yaa jyäty kyëpety naaxwiiny naaxkëjxy, ko yë oyjyä'äytyëjkëty jëtu'un jyatë kyëpätë tä jeexyë y'ëxëëk ja'ay'atën ets ëxëëkja'aytyëjk jëtu'un xyony juuky'atë tä jeexyë y'oyjyä'äy'atën. Tyaapë nän nëkoopë yë'ë.

¹⁵Paatyës ëjts yë'ëjës ni'ik nyajmëjnajxyp yë xoontakën. Yi'iyë jëtu'un mëpaat yë naaxwiinyëtë ja'ay tuny, kyäyëty y'uukëty, y'uukëty jyë'kxëty ets y'äts xyoonta'akëty, jä'ä ko yi'iyë jëtu'un jyaak jëkyejpy tunëty ma yaa yë Tios naaxwiinyëtë naaxkëjxy të pyëjktä'äkyën.

¹⁶Koos ojts ni'ikyë näkyë'ëyäkyë ma ja ijxpëjkënën ets ma ja nija'awënën mëti'ipë yaa naaxwiiny naaxkëjxy yajtuunp yajkajpxpën, jëna'ajëty ka'ap yë tsuu nyiminy,

¹⁷etsës të nwinjawë ko ka'ap yë naaxwiinyëtë ja'ay myäyëtëty ets tja'akyujëtya'ajëty mëti'ipë yë Tios tyuunpyën ets mëti'ipë tuunëp jajtëpën naaxwiiny naaxkëjxy. Oy jënu'un tja'ixta'ajëty ets tjapaata'anëty yë nyiwinma'any wi'ix ko jëtu'un tii tyunyë jyätyë ka'ap tpaatëty; oy yë ixpëkyjyä'äy jya'ëna'anëty ko tëë tpaaty nyiwinma'any, yë'ë ka'ap tii myäyë tpaatëty.