Read Biblia Mixe de Quetzaltepec Eclesiastés 9 Bible Online

Eclesiastés 9 - Biblia Mixe de Quetzaltepec bible

Eclesiastés 9

¹Tëyajtën yë'ë koos tëëjës nijawë, ko yë oyjyä'äytyëjkëty ets wijjyä'äytyëjk yë tyu'unënëty kyajpxënëty jam yë yajpaaty ma Tiosën. Yë naaxwiinyëtë ja'ay ka'ap ninu'un tnijawë yë tsojkën ja'awën ets näy'ëxëëk'ixë näkya'oy'ixë, oy janty jëtu'un wintuuy tjamëëtëty.

²Aak o'kpë aak tëkoopyë ja'ay y'itë, wä'än yë'ëjëty wa'ats ja'aytyëjk ets ëxëëkja'aytyëjk, wä'än t'oyjyä'äyëty wä'än t'ëxëëkja'ayëty, wä'än të'kxypyëty ets wä'än tpu'uxm mëëtpëty, wä'än yë'ëjëty mëti'ipë wintsë'kën yäjkpyën ets wä'än yë'ëjëty mëti'ipë ka'ap tyäkyën; näjyëtu'un yë wa'ats ja'ay ets pokyjyä'äy, mëti'ipë, jëtu'un mëti'ipë Tios xyëëwkuuykyäjpxypën ets mëti'ipë ka'ap txëëwkuuykyäjpxyën.

³Yë'ë jëtu'un ya'atë ka'ap oy n'ijxmëty mëti'ipë naaxwiiny naaxkëjxy tuunëpën jajtëpën. Näyjyëtu'un ënät jatu'kpëky ja ayuk, yë naaxwiinyëtë ja'ay jä'ä xëmë myëmääpy myëtäjpy tuuntëko'oy kajpxtëko'oyën; ja tsuuwinma'any kupoj winma'any jä'ä nätyuk'ënä'ämëp mapaat jyuuky'ätyën; ets ko y'ooky tyëkoy nitëyë yajmënëjkxnë jutjoty.

⁴Jyaak jëkyejpy njaakjëjp'ijxmëty yë ja'ay mëti'ipë juukyën. Jä'ä ko ni'ikë oy tu'uk yë uk mëti'ipë juukyën ets këtiinëm tu'uk yë kaa mëti'ipë tëë y'o'knën.

⁵Ets näjyëtu'un mëti'ipë ja'ay juuky'ajtëpën nyija'awëtyëp ko y'ooka'antë, e yë o'kpëty nitii tka'ëknija'awënëtë ets nitii tka'ëkpatnëtë, jä'ä ko ja'atyëkoy yë nyëjkxnëtë.

⁶Jääpaat jyëjpkëxtë yë tsyojkën jya'awënëty, y'ëxëëk'ijx kya'oy'ijxënëty ets jyot wyinma'anyëty; ets nijëna'a jatëkok tii tka'ëktuunëtë naaxwiiny naaxkëjxy.

⁷Paaty ni'ik oy, ko xytyukxoonta'akëty yë mkääky m'uuky mëti'ipë mpatyp m'ijxpyën; tukxoontä'äky yë tsatym nyëë mëti'ipë tëëpë nyimaanaxyën ko xy'uukëty, jä'ä ko yë Tios y'oy'ijxyp yë oypyë mtu'unën.

⁸Poop wit xëmë mnätyukxoxëtëp ets on mëti'ipë pa'akxu'kpën xëmë mnätyukujaaxëtëty.

⁹Tukxoontä'äky yë juukyajtën mëët ja to'oxytyëjk mëti'ipë mtsojkpyën mja'apën, janaam jatsojk xytyukxon xytyuk'itëty yë mjuukyajtën tsojkyëpë nyäxyën naaxwiiny naaxkëjxy; yi'iyë tu'ukyë mpatëp xytyukxoonta'akëty naaxwiiny naaxkëjxy.

¹⁰Mëti'ipë jyëkyejpyën mëpaat xytyunyën tun ets winë aaw winëjot xytyunëty; jä'ä ko jap o'kpëjutjoty ma mnëjkxa'anyën ka'ap jap tii yajtuny yajkäjpxy, ka'ap jap tii yajmëmay yajmëtajy ets ni ijxpëjkën ets ni wijyajtën jap kyä'ty.

¹¹Ma ya'atë naaxwiinyëtën nän tëëjës n'ixy ko ka'ap yë'ëjëty yajtijy pe'tym yë ja'ay mëti'ipë pe'tym pëyë'kpën ets ka'ap yë'ëjëty yajtijy jotmëk mëti'ipë mëtakpën tsipjoty; ets ka'ap yë'ëjëty xëmë tmëët'atë yë ka'ayën ukën mëti'ipë wijyëtyën ets ka'ap yë'ëjëty kyumeeny'atë ja'ayëty mëti'ipë ixpëkyëtyën ets ka'apë xyëmëty yaj'ëxaj yajkupëktë yë ja'ayëty mëti'ipë tëë këpetyëtyën; yë'ëjëty ënät yë winë tpaatë oy ko jëtu'un txëëwatë.

¹²Ets ka'ap tii jëna'ajëty nyayajtuk'oyë, ka'ap yajnijawë jëna'a yajtuk'oyëja'any: Jëtu'un tä yë nëë jëyujkën ëkë tä yë joonën muum ajotkumonë kyukäkë ma y'o'ktaknën, näjyëtu'un yë naaxwiinyëtë ja'ay nän ajotkumonë muum y'ëkëty y'ëyo'onpaaty.

¹³Näy tëëjës n'ixy naaxwiiny naaxkëjxy mëti'ipës nmëmääpy nmëtäjpyën ets jä'äs nyajnaxy tu'uk mëj ijxpëjkën:

¹⁴ma tu'uk yë mutsk kajpnën, ma niwäänë ja'ay tsyëënën, jam tu'uk yë yajkutujkpë të tnitëkë yë naax kajpn ets tyajnatuky mëët yë pujxn mëjatyëtypë mëti'ipë myëtsiptuuntëpën yë tsiptuunpëtëjkëty.

¹⁵E jam tu'uk yë ëyoopëja'ay tsyëënë je'eyëp ko wijy ets mëët yë wyijajtën jyëkyejpy tu'uk yë naax kajpn tyajtso'okëty, je'eyëp ko yë'ë ni pën kyaja'aymyetsyë.

¹⁶Ëjts jëtu'un n'ëna'any ko ni'ik mëpaat tsyowpaaty yë wijyajtën këtiinëm yë jotmëk'ajtën, oy yë oyoopë ja'ay wijypyë pën kyatunëtëty këwentë ets oy pën kyamëj'ixëtëty ets tkämëtoow'itëty yë y'aaw y'ayuk.

¹⁷Jaak'oy yajmëtoy yu'unkpë naxymyëpë y'aaw y'ayukëty mëti'ipë kyajpxtëpën yë wijyjyä'äytyëjkëty ets këtiinëm jyëtu'unëty tu'uk yë yajkutujkpë mëti'ipë yaxp jojkpën.

¹⁸Ni'ik tsyowpaaty yë ixpëkyajtën këtiinëm yë pujxn mëti'ipë ja'ay myëtsiptuunpyën. Ko tii oy tkatuny mëj këjää ëyo'on jotmay y'ity.