Read Biblia Mixe de Quetzaltepec Cantares 2 Bible Online

Cantares 2 - Biblia Mixe de Quetzaltepec bible

Cantares 2

¹Jëtu'unës ëjts tä yë pëjyën mëti'ipë jam Sarón joyjotm yajpatpën, jëtu'unës ëjts tä yë pëjyën joytyuuypyë pyijyën.

²Yë to'oxytyëjk mëti'ipës ntsojkpy nja'apën, jëtu'un yajpaaty ma myëto'oxytyëjkën tä tu'uk yë tsapts pëjyën äpnyjyotypë.

³Yë ye'etyëjk mëti'ipës ntsojkpy nja'apën, jëtu'un yajpaaty ma myëye'etyëjkën tä tu'uk yë mansaan kepyën yuukjoty. Janty oyës näjyawëty koos pyë'aay n'u'unyë etsës xynyi'äpkë. Pa'akëm y'atëkë y'ääytyëëm y'ujtstëëm.

⁴Koos të xywoownëjkxy ma ka'ayën ukën të tnipëjktaakën, janty oyës näjyawëty koos xywyintë'kxy.

⁵Yajmëkpëjktëkës jatëkok mëët yë ujts ma'atsy mëët ujtstëëm të'ëtspë, tukjë'kxtëkës yë mansaan, jä'ä ko jëtu'unës näjyawëty tim o'kpës yowë mëët yë tsojkën ja'awën.

⁶Wä'än yë y'anajnykyë'ë tpëjktä'äky maas yë najts'uunën ets wä'än y'a'oykyë'ë xytyukmënenyës.

⁷Tyam n'amëtow npëjktsowtë miitsëty to'oxytyëjktëjkëty, mëti'ipë jam Jerusalén kukajpnajtëpën, ko këtii xyuxtëty yë to'oxytyëjk mëti'ipës ntsojkpyën. Ixmatstë wä'än tma'ay, kë'ëm wyijëty jëna'a tuknipëjktaakë.

⁸Tää myiny ja mëti'ipës ntsojkpy nja'apën. Nmëtoopyës ko tää myiny. Pëyi'ikyë myiny jam kopkkëjxm, pëyi'ikyë myiny jam tunkëjxm.

⁹Jëtu'un ja ye'etyëjk mëti'ipës ntsojkpyën tä tu'uk jëtsyu'ujën; tä tu'uk jëtsyu'u u'unkën. Tap tëjk ëkë'p, ma tëjk'aawën, jam ma tëjk nyi'ëwa'atsajtën y'ijxnaxy, jam y'ijxwoony ma wäänë y'ëwa'atsëtyën.

¹⁰Jëtu'unës të xy'ënëëmë yë ye'etyëjk mëti'ipës ntsojkpyën: Pëtë'ëk, mijts mëti'ipës ntsojkpy nja'apën; mëti'ipës ntsojkpyën mëët yu'unk'aaw yu'unkjot.

¹¹Ëk'ix, tëë ja potm nyajxnë ets ka'ap y'ëktuunë.

¹²Jam kamjotm tam pyëjnëtë ja ujts, ëëwnëtëp je'eyë ja joon jëyujk, kujk ja kuuk tyëjkënëtë ëëwpë.

¹³Tam ja higos tsyaamë'knë ets tsatsymtsya'am kujk kyëjääjë xyu'kën jyojkën. Pëtë'ëk mijts mëti'ipës ntsojkpyën mëët yu'unk'aaw yu'unkjot.

¹⁴Ja muuxy tsaajotypë tsyëënën, mëti'ipës njä'ä'ajtypyën, mëti'ipë muum këjxm näpyëjktakëpën; ets yu'utsy muum yajpaaty, pëtsëm wä'änës n'ëk'ixy mwiin mjëjp, wä'änës nëkmëtoy m'aaw m'ayuk. Janty oyës näjyawëty ko n'ixy. Janty pa'akëm njawës jyotkëtä'äky koos nmëtoy m'aaw m'ayuk.

¹⁵Majtsmujkta'atë yë wax, yë wax mutskëtypë mëti'ipë yajma'typën ëëts yë tsatsymkyam, mëti'ipë jam kujk pëjtso'onpën.

¹⁶Yë ye'etyëjk mëti'ipës ntsojkpy nja'apën ëjts yë njä'ä, ets yë'ëjës xyjyä'ä'ajtp, yë'ë jam tkëwent'aty yë kyupixyny pëjy akujky.

¹⁷Ma xyiinyëja'anyën ets ma xëëw y'aanta'aka'anyën jää jatëkok minëty mijts mëti'ipës ntsojkpy nja'apën; jëtu'un mnäjyawëtëty tä jëtsyu'ujën, tä jëtsyu'u ayääkën mëti'ipë nëpujt yujkpujtpën tunkëjxy kopkëjxy.