Read Biblia Mixe de Quetzaltepec Cantares 5 Bible Online

Cantares 5 - Biblia Mixe de Quetzaltepec bible

Cantares 5

¹Tëës ntëkë jam maas yë npëjy kyamën, to'oxytyëjk mëti'ipës ntsojkpy nja'apën. Tëës npaaty ja mirra ets ja on mëti'ipë oy xu'kp jojkpën, tëëjës njawë ja uuxpa'ak ets tëëjës n'uuky yë tsatym nyëë mëti'ipë tëë nyimaanaxyën ets tsi'tsknëë. Jëëkytyëjk mëku'uktëjkëty, kaytyë uuktë, uuktë jënu'un xytyimtsoktë.

²Ëjts maapës ënäty, je'eyëp ko yë njot nja'awënës ka'ap myä'äy. Ënätës të nmëtoowpaaty ko yë ye'etyëjk, mëti'ipës ntsojkpy nja'apën tpijkxnoky yë tëjk'aaw ets y'ënä'äny: Yaj'ëwa'ats yë tëjk, mijts to'oxytyëjk mëti'ipës ntsojkpy nja'apën, tëëjës yë nkëpajk y'ujktsta'ay mëët yë maanik. Tëës yë nkuwaay xyo'kta'ay mëët yë koots maanik.

³Tëës yë nwit njäänë; ntuktëkëpës ënät jatëkok. Tëës yë nteky npujnë; ëxëëkëp ënät jatëkok mëët yë naaxway.

⁴Jap yë ye'etyëjk mëti'ipës ntsojkpy nja'apën yë kyë'ë të tkutijë ma potsy jutën ma tëjk'akajpa'ajën. Yë'ës ojts xyajjotuky

⁵Ënätës të nipëtë'ëky etsës të nya'ëwa'atsy yë tëjk'aaw ets të tyëkë yë ye'etyëjk mëti'ipës ntsojkpy nja'apën. Ets të kyëxka'ay nkë'ëkëjxyës tu'ktsuny yë mirrë koos yë tëjk'aaw të nyaj'ëwa'atsy. Koos të nmëtoy të kyäjpxy, ënätës njot nwinma'any të tyëkë yaxpë. Täätsës yë tëjk'akaj të nyaj'ëwa'atsy, e koos të n'ixy ka'ap ënäty jap pën. Täätsës të n'ixtaaytyä'äky ets ka'ap të npaatyës, tëëjës njamëkäjpxy ets ka'apës të xy'ëtsoy.

⁷Ets të xypyaatës ja ja'ayëty mëti'ipë yë naax kajpn kyëwent'ajtëpën; tëëjës xykyoxtë xytsyiiktë ets tëëjës xyajtsëtyutë; mëti'ipë kyëwent'ajtëpën yë tëjkëtyakn ets pëtsëëmtakn ma naax kajpn yajnitëkën ëxëëkës të xytyuntë ets tëëjës yë nwinyä'äp xynyëkë'tsëtë atsip.

⁸Miitsëty to'oxytyëjktëjkëty Jerusalén ja'ayëty, pën jam muum xypyaatë yë ye'etyëjk mëti'ipës ntsojkpy nja'apën jam xy'ënëëmëtëty ko o'kpës yam mëët yë tsojkën ja'awën ma yë'ëjën.

⁹¿Tii tyimmëët'ajtyp yë ye'etyëjk mëti'ipë mtsojkpy mja'apën mijts to'oxytyëjk oypyë tsujpë yaj'ixyën, ma oyëtypë tsujëtypë to'oxytyëjktëjkën? ¿Tii tyimmëët'ajtyp yë ye'etyëjk, mëti'ipë mtsojkpy mja'apën mijts to'oxytyëjk ko xy'amëtoy etsës ntuntëty mëti'ipë m'amëtoopyën ma ëëtsëtyën?

¹⁰Yë ye'etyëjk, mëti'ipës ntsojkpyën umy yë'ë, tä yë tsajpmoktë'ëtsën, pojën yaj'ixkäpy ma yë myëtsajpmokën.

¹¹Yë kyëpajk jëtu'un tä pu'ts pujxnën; axy wäänjaty yë wyääy ets jëtu'un yëkëty tä wëëkyën;

¹²jëtu'un yë wyiin kyëxë'ëky tä yë pakën tëëpë tyi'iyën tsi'tsk nëëjoty, mëti'ipë jap të nyäxyën ma nëë nyijë'tpetyën;

¹³jëtu'un yë y'apënuuky kyëxë'ëky tä yë mëj pëjykyamën ma oy xyuuky jyokyën. Yë y'atääm jëtu'un yë'ë tä yë tsapts pëjyën ma wyikëpipyën yë mirra jëtu'un tä nëëtsunën;

¹⁴yë kyë'ë jëtu'un yë'ë tä pu'ts pujxnën mëti'ipë winë yajtuknipijtpën, mëti'ipë pu'ts tsaa mëët nyikoyëtyën; yë jyot nyini'kx jëtu'un kyëxë'ëky tä yë elefantë pajkën mëti'ipë yajxon të yajnitsetsy të yajnixeeyën ets të yajtukputsayë yë tsuxk uky tsyaa;

¹⁵yë tyekpyoonty jëtu'un yë'ë tä yë jaam tsaajën ets kyëxwä'äky ma pu'ts pujxnën; yë wyiin jyëjp jëtu'un yaj'ixy tä yë Líbano kepyën, mëti'ipë aak ajë kepyën;

¹⁶Yë pya'kxwiin pa'ak jyawë. Oy ntsojkën'ajtmëty. Jëtu'un y'ixëty yë ye'etyëjk mëti'ipës ntsojkpyën, mëtowtë yajxon miitsëty to'oxytyëjktëjkëty mëti'ipë Jerusalén kukajpnajtëpën.