Read Biblia Mixe de Quetzaltepec Isaías 10 Bible Online

Isaías 10 - Biblia Mixe de Quetzaltepec bible

Isaías 10

¹Janty mon janty tuk miitsëty myajpaatë, ko xyajkojtë ja ënä'ämën mëti'ipë ka'ap myëtëyëtyën ets xynyikajpxtë ko tëë tu'uk ja ënä'ämën xyajpëtsëmtë mëti'ipë ëxëëktuunpën,

²ma ka'ap xypyutëkëtën ja mëti'ipë ëmaay amutsk yajpatpën, ets ka'ap xy'ijxpaatë ja ëyoopëja'aytyëjk, mëti'ipë yajpatëpën maas nnaax nkajpnën, ma ni'ikyë ja ku'ookpyë to'oxytyëjk mëk xytyuunkmo'otën ets ni'ikyë xymyäätstë ja ku'ooky u'unk.

³¿Tii mtuunta'akantëp ko ënäty pën myajtëwëtë mëti'ipë mtuuntëkooytyëpën, ets ko ënäty mtukmin mtukja'tëtë ja tëytyuunpë? ¿Pën ja näypyutëkë m'amëtowantëp? ¿Maa ja maywyit maymyeeny xypyëjkta'aka'antë?

⁴Oy ënäty miitsëty ka'ap të mnëjkxtë tsumy matsy wiink naax wiink kajpn, jam nëjkx mkëxtë ma ja ja'ay y'ooktën. Ja Wintsën ka'ap ja jyoot'an xyääma'any, ni'ikyë ja ëyo'on jotmay tyajmina'any.

⁵Yë Asiria kajpn yë'ëjës nyajtunäämpy tä jeexyë tu'uk kepy nkajpë'ëkyënës mëti'ipës ntukwopantëpën koos të xyajjoot'anpëktë.

⁶Nkäxäämpyës tu'uk yë kajpn ëxëëkpë kyajpn'atyën ma ja kajpnën mëti'ipës të xyajjoot'anpëkyën; yë'ë myajts'ta'ajäämpy ets tpëjkëtya'aja'any mëti'ipë myëët'ajtëpën, tääpë kajpn jëtu'un nëjkx t'atään tuktääntë tä ja'ay naax tä'än'ookyën.

⁷E yë Asiria yajkutujkpë ka'ap jëtu'un myäy tyäjy ets ka'ap jyëtu'unëty tuknipëjktaakë. Yë'ë jä'ä myäy tyäjy ko tyimyajkutëkooyäämpy ja naax kajpn.

⁸Yë'ë tyaa y'ënä'äny: Tëkokyë yë yajkutujkpëtëjk aak'ëjts yë xymyëtuuntëpës.

⁹Ëjts aak tu'knaxës n'ixy myëjëty naax kajpn yë Calnó ets Carquemis, yë Hamat ets Arfad, yë Samaria ets Damaskë.

¹⁰Jëtu'un ijxtëm ja naax kajpn të nmëmëtä'äkyënës mëti'ipë may ja tyiosëtyën, mëti'ipë ni'ik may ja tyiosëty këtiinëm ja Jerusalén kajpn ets ja Samaria kajpn.

¹¹Jëtu'un ijxtëm ojts ëxëëk ntunyës ja Samaria kajpn jëtu'unës ntuna'any ja Jerusalén kajpn, mëët kanaak ja y'awinax mëti'ipë y'ëwtajtëpën.

¹²Ko ënäty ja Wintsën të tyajnaxy ja tsyip y'äkë ma ja Jerusalén ja'ayëtyën, tääts tëytyu'una'any ja Asiria yajkutujkpë, mëët ko ënäty amëj akëjxm të jyuuky'äty.

¹³Yë Asiria yajkutujkpë jëtu'un të y'ënä'äny: Ëjts nimëjaawës winë të npaaty; mëët koos nwijyëty yajxonës winë të ntuknipëjktaakë. Tëës nyajtëkatsy ja tsëpa'an ets tëëjës mëj këjää wit meeny npaaty, ets koos njotmëkëty, wa'atsës të nmëmëtakta'ay ja yajkutujkpëtëjk.

¹⁴Tëës ja wiink naax wiink kajpn ja wyit myeeny npëjkë ets ja nyaax kyam, jëtu'un tä joontsaa yajkoonpëtsëmyën ma joonpä'änën mëti'ipë tyaak të nyike'ekyën. Ka'ap pën wi'ix të y'ëti'itsy, ka'ap pën ja kyäkn të tyajyu'kxy ets ka'ap pën ja y'axokx të tyajyu'kxy.

¹⁵¿E yaats ënät nnäyajtë'ëwëmëty: Wä'än jëtää kë'ëm yë jatyë kyepypyuxëtyë ets ka'ap tyajmëyatëty mëti'ipë yajyu'kxëtëpën, ëkë ja jë'tn mëj'äämpy nyäyajnaxëtëty oy kyajam'atëty ja mëti'ipë yajtuunëpën? Ijxtëm tu'uk yë tajkën, kepy yë je'eyë, pën ka'ap pën yajtunyë wi'ixën txëëwatëty tajk.

¹⁶Paaty ja Wintsën mëti'ipë maaytyääyëpën winë, yajmëjaawkukëxëjäämpy ja ja'ay mëti'ipë mëk näjya'awëyëpën, yë'ë yajminäämpy mëk jëënpa'am ets toopyëm ja jyot nyini'kx tjawëtëty.

¹⁷Ja Tios kënu'kxypyë, mëti'ipë të'kxpën jajpën jam Israel, jëtu'un y'awinpita'any jëënyä'änkën, ets tu'kxëëyë tyatooytyëkoyä'äny ja aayjyot pejyjot ets ja äpnyjyot.

¹⁸Nëjkxëp tyajkutëkooytyä'äy ja tun kopk, oy ënäty oy të jyakëxë'ëky. Jëtu'un tyaj'awinpita'any tä tu'uk pa'amja'ayën mëti'ipë tëë myëjaawkëxyën.

¹⁹Wäänë nëjkx jyaak wë'ëmy ja aay ujts, oynyapënëty nëjkx tjaakyajkëxy.

²⁰Ja niwäänëpë ënäty të jyaakwë'ëmtën ja Israel ja'ayëty ets ja Jacob ja y'u'unk y'ok mëti'ipë jaakyajpatëpën juuky, ka'ap nëjkx t'ëktukjotkujk'ajnëtë mëti'ipë ënäty o'ktëy të tyunëtën, yë'ë nëjkx tuk'ijxpätë ja Wintsën, ja Wa'atspë, mëti'ipë yajpatpën ma Israel ja'ayëtyën.

²¹Niwäänë nëjkx ja ja'ay jyaak winpitë ma Tiosën.

²²Oy jëtu'un tä jinën jyanimay'atë ja Israel ja'ayëty, niwäänë y'ita'antë mëti'ipë winpitantëpën. Tëë yajtuknipëjktaakë ko jyää'ata'any ja ëyo'on ko ënäty ja nipaye'eyën y'ity.

²³Ja Wintsën mëti'ipë maaytyääyëpën winë, tëë tuknipëjktaakë ko tyajkutëkoyä'äny ja Jerusalén kajpn ets mëtëy y'ënä'äny.

²⁴Jëtu'un ja Wintsën y'ënä'äny mëti'ipë maaytyääyëpën winë: Nnaaxës nkajpnës mëti'ipë tsënaaytyëpën Sión, këtii yë Siria ja'ayëty xytsyë'ëkëtëty, oy mjawopa'an njaka'atsa'anëtëty mëët yë kepy tsaa tä mtuunëtën yë Egiptë ja'ayëty.

²⁵Jä'ä ko wiinkoonp ja xëëw jëmëjt ma ja ëyo'on jotmay t'ixa'antën yë ntsip n'äkës yë'ë yajkutëkoyanëtëp.

²⁶Yë Wintsën mëti'ipë maaytyääyëpën winë, yë'ë tëytyunanëtëp ijxtëm jam jyäjty kyëpejtyën Madián, ma ja tsaajën mëti'ipë yajtijpën Horeb ets nëjkx tyaj'ixyë ja myëj'ajtën tä tyaj'ijxën jap Egiptë.

²⁷Jä'ä xëëw nëjkx ja mtsëmy mkë'ëy myajtuknipëjktu'uty, ets nëjkx yajnëkejy ja kepy mëti'ipë mtsëëm'ijtypyën, jëtu'un tä tsajpkaa kepy tsëëm'ityën mëti'ipë tyukyuupyën.

²⁸Jam jyä'ty Aíat, Migrón nyäxy, jam Micmás ja tsyimy kyi'iy tyajwë'ëmy,

²⁹tëë nyëënaxy, jam të myaawë'ëmy Gueba; tsë'këtëp yë Ramá ja'ayëty, ja Saúl ja jyä'äy tëë kyäkta'atë.

³⁰Ya'axtë joktë miitsëty Bat-galím ja'ayëty. Wä'än jampaat tyajmëtoy ja m'aaw myo'kn Laisa, oy njapa'ëyoy mijts Anatot.

³¹Tëë kye'eky ja Madmená, ja Guebim ja'ayëty tëë nyäyu'tsta'ajëtë.

³²Ya'atë xëëw jam ja mëtsip të wya'akwë'ëmy Nob; tëë y'ënä'äny ko yajnitëkëty ja Sión kajpn, jam tunkëjxm ma ja Jerusalén kajpn yajpaatyën.

³³Ixtë ja Wintsën mëti'ipë maaytyääyëpën winë, ixtë wi'ix tyajkëtayën mëjëtypë kepy; awäx tukwäxë yë kepy jyajta'ay ets jëtu'un nyaaxkëtakta'ay.

³⁴Mëët ja jatyë të yajpujxkëtaawta'ay ja kepy ets ja yukjot të yajpujxëtijta'ay, tëë pyëtë'kta'atë ja kepy mëti'ipë jamën Líbano.