Read Biblia Mixe de Quetzaltepec Isaías 15 Bible Online

Isaías 15 - Biblia Mixe de Quetzaltepec bible

Isaías 15

¹Jä'ä tsu'um ma Ar kajpn kyutëkooyën, o'ktëy ojts jyäty kyëpety yë Moab; jä'ä tsu'um ma Quir kajpn kyutëkooyën o'ktëy, jyäjty kyëpejty yë Moab.

²Jëëpy yaxp yë Dibón ja'ay jam nyëjkxtë kopkëjxm ma yajpaatyën ja tsyajptëjkëty. Yajxon yë Moab tmëmony tmëtuky ko yë Nebo ets Medebá të kyutëkoy. Tu'kë'ëyë ja naaxwiinyëtë ja'ayëty tëë ja wyinwaay y'awaay tjäjpta'atë.

³Në'ëjoty tu'ujoty aakyë'ë ja'ay wit yajtuunpy mëti'ipë kuumpën u'kxpën; jam tëjknëkëjxm aak jëëy aak yaxtëp ja'ayëty. Kajpnjoty aak moon aak tujktëp ja'ayëty, aak yuun aak këtaawtëp mëët ja jotmay.

⁴Jya''amëtoow jyapëjktsoowtëp näypyutëkë yë Hesbón ja'ayëty ets Elalé ja'ayëty; jampaat ja jëtu'unpë ja aaw ayuk jyajnë Jahas. Paatykyëjxm ja Moab ja'ayëty ka'ap t'ëknija'awënëtë tii tyuunta'aktëpën.

⁵Wi'ixpëmës yë n'aaw njot njatuny ets jeexyë yë Moab ja'ayëty ka'ap wi'ix jyatë kyëpätë; tëë ja'ay kyäkpëtsëëmta'atë ets jam të nyëjkxta'atë Soar ets Eglat-selisiyë. Tam mëti'ipë jëëpy yaxp pa'tëjkëpën jam Luhit; tam mëti'ipë nëjkxpën Horonaim mëk jyänty yä'äxy ets mëët amay jotmay ets ëyo'on.

⁶Tëë tyëtstaaynyë ma ijty ja nëë myuutyën, ja aay ujts tëë xyo'tstaaynyë ets tyëtstaaynyë ja aay kepy, nimaa tsuxk kya'ëkyaj'ijxnë.

⁷Paaty ja ja'ayëty mëti'ipë näjyëjp'ijxëtëp wiinktsow tmënëjkxta'atë ja wyit myeenyëty ets ja pyëjktä'äkyëty, myëninajxtëp jam ma wokjot txëëwatyën Álamos.

⁸Aak y'amëtoowtëp ja'ay ja näypyutëkë jampaat Moab, ma tsëpa'anën; aak jëëy aak yaxtëp ja'ayëty jampaat Eglaim ets Beer-elim.

⁹Ka'ap yi'iyëty y'ëyo'on'ata'any ko ja nëëjot të ne'pynyëtyä'äy, njaaktimkyäxäämpyës ja ëyo'on jotmay mëjpë këjääpë; tä kaa muum jyä'äymyätsyën jëtu'un jyata'an kyëpäta'antë ja ja'ayëty mëti'ipë jam näkyëxmëtakëpën ma Moab ja'ayëtyën ets kyëjxta'aja'antë ja ja'ayëty mëti'ipë ënäty juuky të jyaakwë'ëmtën naaxwiiny naaxkëjxy.