Read Biblia Mixe de Quetzaltepec Isaías 18 Bible Online

Isaías 18 - Biblia Mixe de Quetzaltepec bible

Isaías 18

¹Janty mon janty tuk yajpaaty ja naax kajpn ma yajmëtoyën y'amu'uy ja uux, ma ja kajpnën jampë yajpaatyën Etiopíë nëë awinaxy,

²mëti'ipë jyä'äy kyejxypyën jam ma Nilë mëjnëëjën, mëti'ipë nëëjoty ye'epyën. Pe'tym jyänty nyëjkxtë ets ja aaw ayuk tyaka'antë ma ja kajpnën mëti'ipë kutsë'ëkën oy tyimmaajëty, ma ja kajpnën mëti'ipë mëkën, ta'tspëkyën, mëti'ipë nëë'itkujky yajpatpën.

³Tëkokyë miitsëty naax kajpnëty nëjkxëp xy'ixtë xymyëtowtë ja xuxn ets ja ijxpäjtën ko ja tsip ënäty tyuna'anyë.

⁴Ëjts jëtu'unës yë Wintsën të xy'ënëëmë: Ëjts wa'atsës n'ixy ntuny winë jam maas nyajpaatyën, jëtu'un tä jëënën ko pyotm'aty, jëtu'un tä myaanikyën ko xyëkopk'aty, ma ja pëjktä'äky pyëti'ikyën.

⁵Ko ënäty ja tsatym të pyëjktä'äky ets ënäty të myëjaawnë, ka'anëm ënäty ja pëjktä'äky pyëti'ikynyëm, wa'ats nëjkx yajxe'enty pyujxta'ay tsatym, ets nëjkx jam kajpnpë'am yanitsëëmpety.

⁶Jam nëjkx wyë'ëmta'ay kamjotm yë'ë nëjkx yajtukniwë'ëmtë lut majkwejkxy, ja uk ets ja kaa. Ja lut, majkwejkxy jam nëjkx xyëkopknaxtë, ets ja jëyujk jam nëjkx pyotmnaxtë.

⁷Jä'ä xëëw nëjkx ja ja'ayëty tuknimintë ja wintsë'kën ja Wintsën mëti'ipë maaytyääyëpën winë, ja ja'ayëty mëti'ipë yenyëtyën ets mëti'ipë wyääy kyopk të'kxtëpën jajtëpën, mëti'ipë kutsë'ëkëtyën oymyaajëty, ja jotmëk kajpn ets mëjpë, mëti'ipë nëë'itkujky yajpatpën. Nëjkxëp yajwoowmintë jam Sión. Ma yaj'ëwtatyën ja Wintsën mëti'ipë maaytyääyëpën winë.