Read Biblia Mixe de Quetzaltepec Isaías 21 Bible Online

Isaías 21 - Biblia Mixe de Quetzaltepec bible

Isaías 21

¹Ma yaj'akäjpxyën mëti'ipë tunan jatanëpën jam të'ëts'itjotm, winkon ma ja mëjmejyën. Tä tu'uk mëk ënääwtuujën mëti'ipë ëpa'tkë'ëmtsow tso'onpën, jëtu'un myiny atsë'ëk ajawë mëti'ipë tunan jatanëpën.

²Mëk oy yajmëtoy mëti'ipës ja Wintsën të xytyuk'ëwaanën: Mëti'ipë ja myëku'uk kyë'ëyäjkpyën, tëë ja jëtu'un tuny; mëti'ipë yajkutëkoopyën winë, të ja jëtu'un tuny. Pëtë'ëk mijts Elám ets mijts Medë ja'ayëty, nëjkx mtsiptuntë. Ëjts ka'apës n'ëkupëkanë ets pën je'eyë nyikajpx nyimëtya'akëty.

³Pëjk atoonpës njawë njot nini'kx, jëtu'unës näjyawëty mpëky n'atonyë tä to'oxytyëjk jyot nyini'kx pyiky y'atonyën ko y'u'unk myääy myëxu'unk'ata'any, nitiijës nka'ëkmëtowanë mëët ja monyëtukyë, ets nitiijës nka'ëk'ixanë mëët ja tsë'ëkë jawë.

⁴Ëjts ka'apës n'ëkwinma'anypyatnë, jëtu'unyës nkutsuu nkupojënë mëët ja tsë'ëkë. Ko ijty jyënäky xëëwaty janty oyës ijty nnäjyawëty, tyam ëxëëkëmës je'eyë nnäjya'awënë.

⁵Tam ja kaaypyäjn të yajnipëjktaakë, tëë ja najxtakn y'oyë, jëtu'un ja xëëw tsyo'ontä'äky. Wa'k'oyëtë miitsëty ninu'un mtsip'ixy'atën: Oytyuntë yajxon ja m'akëëytyukëty ets yajxon y'atë'kx y'ajajëty.

⁶Jä'ä ko tëëjës yë Wintsën xy'ënëëmë: Nëjkx pëjkta'ak tu'uk këwent'ajtpë mëti'ipë nyikajpxëpën tii tyim'ijxypyën.

⁷Kanaak yaj'ixy yë kepy wintëkäämpë myintë, kwaay pajëtujtëtëp nimäjtskjaty, yaj'ijxp näjyëtu'un tä ja'ay kwaay tuk'u'unyën, tä ja'ay jëyujk jëku'ux tuk'u'unyën.

⁸Ënät mëk të jyänty yujk'ëna'any: Wintsën, maas të xypyëjktä'äkyën, jamës nyajpaaty, xëëny kootsës jam n'ijx'ity nkëwent'aty.

⁹Koos të n'ijxpaaty tu'uk kepy wintëkäämpë të myiny mëti'ipë nimäjtsk kwaay pajëtujtëpën, ja mëti'ipë jam kyëwaaykyijxy ënyääytyëpën tu'uk të kyäjpxy ets të y'ënä'äny: Tëë ja yajnitëkë, tëë ja yajnitëkë ja Babilonyë kajpn, ka'ap të myëtä'äky. Tëë tyukpu'ujëtyä'äy mëti'ipë ijty y'ëwtajtëpën.

¹⁰Naax kajpn mëti'ipës nnaax'ajtyp nkajpn'ajtypyën, mëti'ipë jëtu'un tä tsajpmokën të yaj'ateeny të yajtukteenyën, tyam ntuk'ëwaanë mëti'ipës të nmëtoyën, mëti'ipës të xytyuk'ëwaanën ja Wintsën mëti'ipë maaytyääyëpën winë, mëti'ipë ja Israel ja'ay y'ëwtajtëpën.

¹¹Ma yaj'akäjpxyën wi'ix ja Edom ja'ayëty jyata'an kyëpäta'antën: Mëkës yë ja'ay tu'uk xymyëkäjpxy ets xy'ënëëmës: Ëkmëtow këwent'ajtpë, ¿jënaak yaxp tyam tsu'um?

¹²Ets ja këwent'ajtpë y'ëtsoy: Tää xyiinyëjanë ets tää kyootsëjanë. Pën tii myajtëwantëp jyëkyejpy xyajtëwtëty, mmintëp jatëkok.

¹³Ma yaj'akäjpxyën tii tunan jatanëpën jam Arabië. Jam ja Dedán ja'ayëty tyu'uma'atë ujtsjotm,

¹⁴nëjkx jëjpaatë'ëktë, yajnëë'uuktë mëti'ipë tëtsëpën, mo'otë nëë. Miitsëty Temá ja'ayëty, nëjkx ixta'atë mëti'ipë käkpën ets mo'otë kyääky, wä'än tkay.

¹⁵Jä'ä ko yë'ëjëty yë'ë kyukäk kyupujtëp ko pën kyupuxëtëty mëët ja tëypyujxn jëjpme'epyë, ko pën kyuti'pxëtëty ets ko jam tsipjotm myëtsip yajtëkoyëtëty.

¹⁶Ënätës ja Wintsën të xy'ënëëmë: jajëmëjt yë Quedar kajpn ka'ap ënäty maanë, jëtu'un tä tu'uk tuunpë ja'ay tnimëtyä'äkyën mëti'ipë yi'iyë myëju'uny tyukjuuky'äjtypyën,

¹⁷Wäänë jam Quedar jyaak wë'ëma'any ja ti'px mëti'ipë tsiptuunpë ja'ay myëtsiptuuntëpën. Yë Wintsën mëti'ipë Israel ja'ay y'ëwtajtëpën yë'ë jëtu'un ënaanp.