Read Biblia Mixe de Quetzaltepec Isaías 23 Bible Online

Isaías 23 - Biblia Mixe de Quetzaltepec bible

Isaías 23

¹Ma yaj'akäjpxyën wi'ix yë Tirë kajpn jyata'any kyëpäta'anyën: Je'eyë jyaak mu'uy jyaak niitsy ja kepy nëëwinye'epyë mëti'ipë jam Tarsis tso'onpën, jä'ä ko tëë ja mëtsip tyajma'ta'ay ma jyajta'aktën. Tëë mya'ta'ay ma jya'tën mëti'ipë tso'onpën jam Chipre.

²Yë Tirë ja'ayëty ets Sidónja'ayëty amonyë y'itë. Ja jyä'äyëty wyinnajxtëp ijty ja mëjmejy

³ets mëjnëëjot. Jam ijty myeenypyaatë Sihor ets Nilë ko ja aaypyajk ujtspajk tjuytyë, ets jam tooktë ma wiinkëtypë kajpnën.

⁴Mtsëtyunëp mijts Sidón, ma mëj'äämpy të m'ityën ko të xytyukmeenypyääty ja juukymyejy, jä'ä ko nëjkxëp jëna'a m'ëna'any: Ëjts ka'apës ja n'u'unk nmaay n'ëkpatnë, ka'ap jëtu'un ja njotës y'ëkpëjknë tä ijty tëëyëpën koos n'u'unk'ijxy. Ka'apës ja n'u'unk nmaay n'ëkmëët'ajnë mëti'ipës nyajyääkëpën ets mëti'ipës nyaj'ijxpëkëpën.

⁵Ko ënäty ja Egiptë ja'ayëty tnijawëtë wi'ix ja Tirë kajpn jyajnën kyëpäjnën, nëjkxëp tmëkjawëtë,

⁶ets nëjkx y'ëna'antë: Nëjkxtë jam Tarsis. Jë'ëtë ya'axtë jam, miitsëty ninu'un mtsëënëtën jam mejy ëkë'ëm.

⁷Ya'atë kajpn jëtu'un ijty tëëyëp yajnikajpxp ko tääyëm yë'ë, ko yaa ijty ja'ay y'ätstë xyoonta'aktë. Ya'atë kajpn nëjkxp ijty oymyaajëty ets ma tuknipëjktaakën wyë'ëma'any, jam ijty wyi'imy.

⁸¿Pën ya'atë jëtu'unpë ënä'ämën të tpëjktä'äky ets ja Tirë kajpn o'ktëy jyatëty, ma ja yajkutujkpë y'ityën mëti'ipë ja jyä'äy ajuupy ato'ktëpën, mëti'ipë ja jyä'äy kumeenyëtyën ets mëj'äämpy y'itën?

⁹Yë Wintsën mëti'ipë maaytyääyëpën winë yë'ë të tyajkutuky ets tyaj'amoonta'aja'any ja ja'ay mëti'ipë näjya'awëyëpën amëj akëjxm ets o'ktëy tyajjata'any ja ja'ay mëti'ipë mëj'äämpy ijtpën.

¹⁰Mijts Tarsis ja'ayëty, tim naaxtuntë je'eyë, jä'ä ko miitsëty ka'ap jëtu'un ja kutujkën xy'ëkmëët'atanë tä ijty tëëyëpën.

¹¹Yë Wintsën tëë yë myëk'ajtën tyaj'ixyë ma mejyjyotën. Tëë ja mëj naax mëj kajpn t'atsë'ëk t'ajawë, ja naax kajpn mëti'ipë ënäty ta'tspëky yajpatëpën jam Canaán, wa'ats të tyajkutëkooytyä'äy.

¹²Ets të t'ënëëmë ja Sidónja'ayëty: Ixmats ja äjtsk pujtk mijts to'oxy ëna'k mëti'ipë të yajwitsy të yajjëtutyën. Mijts oy jap mjanëjkxëty Chipre, ka'ap jotkujk'ajtën xypyaata'any.

¹³Ixtë wi'ix të jyätyën ya'atë it naaxwiinyëtë, ma të tsyoony të jyä'tyën ja kepy nëëwinye'epyë. Ojts yë Caldeo ja'ayëty mëjjëty tëjk tkojtë, yajkutëkooytyë ja akujktëjk jam Sidón, xit ko'ow tuuntaaytyë. Yë'ë ojts poky tmëët'atë, ka'ap yë'ëjëty Asiria kajpn.

¹⁴E Tyam ënät miitsëty Tarsis ja'ayëty, je'eyë jë'ëtë ya'axtë, jä'ä ko ja naax kajpn mëti'ipë myajkojën ta'tspëky, tëë ja kyutëkoy.

¹⁵Jä'ä xëëw yë Tirë kajpn, ka'ap nëjkx pën jyä'ämyetsyë, jëtu'un tëkë'px majk jëmëjt y'itëty, ijxtëm tu'uk yë yajkutujkpë y'ëne'emyën, tëkë'px majk jëmëjt. Ko kya'pxëty, jää nëjkx ja Tirë kajpn tniwä'äky ijxtëm tu'uk ja ëy y'ënä'änyën: ma yajkuuy'iyën ja to'oxytyëjk mëti'ipë jyot nyini'kx tyo'kpy yäjkpyën.

¹⁶Mijts to'oxytyëjk mëti'ipë ja mjot mnini'kx mto'kpy myäjkpyën, mëti'ipë ijxtëkoy ja'atyëkoy juukyajtpën, këëyë'ëk ja mkow ets xytyukjëtitëty ja kajpn jot, akujk jotkujk kow pëk ets m'ëwëty mya'axëty ets y'ëkyaj'ixëty pën myajja'amyäjtsp.

¹⁷Ko tëkë'px majk jëmëjt kya'pxëty, jää nëjkx ja Wintsën jatëkok tja'amyetsy ja Tirë kajpn. Jää nëjkx jatëkok ja tyuunk tyajtso'ontä'äky ma ja jyot nyini'kx tooky tyäkyën mëët yë wiinkëtypë kajpn naaxwiinyëtë apëtsëmy.

¹⁸E ja wit meeny mëti'ipë ënäty të tpaaty të t'ixyën, jä'ä nëjkx ja Wintsën yajtukmëyoxy, ka'ap nëjkx yajpëjkë'ëk; yë'ë yajmo'ojantëp ja ja'ayëty mëti'ipë myëtuuntëpën ja Wintsën ets tukjuytyëty yë kyääky y'uukyëty ets wyit tyujkxyëty.