Read Biblia Mixe de Quetzaltepec Isaías 24 Bible Online

Isaías 24 - Biblia Mixe de Quetzaltepec bible

Isaías 24

¹Ixtë wi'ix ja Wintsën ja naaxwiinyëtë tuna'anyën, yajma'ta'ajäämpy ets yajwintëkooytya'ajäämpy koonëm ja ja'ay kyääkwa'kxta'atëty.

²Tu'knax tpaata'antë ja ëyo'on jotmay, wä'än tpënëty: teety, naax kajpn, yajmëtuunpë, mëtuunpë, wintaj, wintsën, juupyë këpäjtpë, ato'k ayajkpë, yajnu'kxpë ets mëti'ipë nu'kxpën, mëti'ipë kakëpäjtpën ets mëti'ipë kayajmëkëpäjtpën.

³Wa'ats nëjkx ja naaxwiinyëtë mya'ta'ay, nëjkxëp yajjëpëjkta'ay tiijaty ënäty jääjën naaxwiiny naaxkëjxy, jä'ä ko jëtu'un ja Wintsën të y'ënä'äny.

⁴Anë'ëk tëëtsë'ëk ja naaxwiinyëtë y'awinpita'any, xo'tsta'ajaanp ja aay ujts, mon tuk ja naaxwiinyëtë yajpaata'any.

⁵Jä'ä ko ja ja'ayëty tëë tyaj'ëxëëkëtë ja naaxwiinyëtë, ka'ap të tpatuntë ja ënä'ämën tëyajtën ijxtëm jyapaatyën, tëë tkumëtoownaxtë ja ënä'ämën tëyajtën ets ka'ap të tuntë ijxtëm ojts tnikajpxtën.

⁶Poky yë naaxwiinyëtë të y'ity, paaty o'ktëy të jyäty, Ja ja'ay mëti'ipë jam kukajpnajtëpën yë'ë ëyoowtëp paaty të nyiwäänëtë, ka'ap ja ja'ay y'ëknimay'ajnëtë.

⁷Ka'ap ja tsatym nyëë nëkooyënë, ja tsatsymkyam nän pëjkëtëp ijxëtëp; mëti'ipë ijty akujk jotkujk juuky'ajtëpën, tyam mon tuk yajpatnëtë.

⁸Tëë kyixy ja xoontakën ma ja ja'ay të xyu'uxtën ets të y'ëwtën, tëë myoonkëtä'äky ma ja ja'ay të myuktën ets të xyoonta'aktën.

⁹Ka'ap pën y'ëk'uk y'ëkjë'kxnë ma äjtsën xoontakën y'ityën; ja ja'ayëty mëti'ipë uktëpën, ta'am tja'awënëtë ja tsatym nyëë.

¹⁰Ja naax kajpn ma ijty ka'ap jyotkujk'atyën, axit ako'owë tyam yajpatnë, ka'ap ma ja tëjknë ma ja'ay tsyëënëtyën.

¹¹Je'eyë ja'ay yaxnëtë jä'ä ko ka'ap maa uukynyë mëti'ipë mukpën; tëë ja äjtsën xoontakën pyi'tsta'ay; jëtu'un yaj'ijxnë wiink it wiink naaxwiinyëtë yowë ja'ay të nyëjkxtaaynyëtë tsumy matsy.

¹²Xit ko'ow ja kajpn të jyäty, ja tëjk akaj, kujy jëpipy të jyajta'ay.

¹³Aakjëtu'un oy myaa'ajnë naaxwiinyëtë apëtsëmy, jëtu'un të jyäty tä ja'ay aceitunas twinwopyën, ëkë tä yajwin'ixyën yë tsatymtyëëm ko të yajpëjkmujkta'ay ja pëjktä'äky.

¹⁴Mëti'ipë ënäty juuky të jyaakwë'ëmtën, akujk jotkujk nëjkx wyë'ëmtë. Jam ma xëëw kyëtä'äkyën, nëjkxëp y'ëwtë ya'axtë ko ënäty t'ixtë ja Wintsën ja myëj'ajtën y'oyajtën mëjwiinpë këjääpë.

¹⁵Jampaat ma ja xëëw pyëtsimyën ets ma ja mejypya'ajën, nëjkxëp ja Wintsën xymyëjpëjkta'aktë, mëti'ipë Tyios'ajtëpën yë Israel ja'ayëty.

¹⁶Jam ma naaxwiinyëtë jyëjpkëxyën, jampaat të yajmëtoy ko ja'ay y'ëwtë ya'axtë: Wä'än tyajmëjjaw tyäjkënu'kxyawë ja Mëtëypyë. E ëjts jëtu'unës të n'ëna'any: Janty mon janty tukës nyajpaaty. Pëjkëpës, këxaanpës. Ja ja'ay mëti'ipë ayajk kë'ëyajkpën, tëë ja myëku'uk tkë'ëyäky, tëë jëyëjp tmëmay tmëtajtë wi'ix tuna'anyën.

¹⁷Ja naaxwiinyëtë ja'ay jëtu'un nëjkx yajpajëtitë tä ja'ay aayjëyujk ujtsjëyujk tpajëtityën, ets tä jam tyimka'ajanë ma të yajxokyën.

¹⁸Mëti'ipë ja käkpën jutjoty nëjkx kyukääkë, e mëti'ipë jutjoty ja pëtsëëmpën jam nitëyë nyëjkxa'any ma të yajxokyën. Mëk komtuu jam tsajpjotm tsoonaanp ets nëjkx ja naaxwiinyëtë y'ëtëtstä'äky.

¹⁹Yajxon ja naaxwiinyëtë mëk yu'kxa'any, këëykëëynyë y'ëtë'ëtsa'any, ets piw nuuk jyajta'aja'any.

²⁰Tä ëmu'ukyë ja'ayën, jëtu'un y'ëtëtsta'aka'any, tä mëëytyëjkën mëti'ipë nyixeny pejyën jëtu'un pyojyu'kxa'any. Yajxon ja nyëë pyoky jye'emty'ajnëtë, ka'ap t'ëkjëkyäjpnë wi'ix tmëpëtë'ëktëtyën.

²¹Jä'ä xëëw nëjkx ja Wintsën tëytyuny ja tsajpkëjxmëpë y'ënä'ämtën, ets ja naaxwiinypë yajkutuktën;

²²wa'ats tpëjkmujkta'aja'any ets jutjoty t'apëkëja'any. Jap tsum matsy tyaj'ita'any, ok tmo'oja'any tëytyu'unën.

²³Ko ënäty ja Wintsën mëti'ipë maaytyääyëpën winë yë'ë yajkutuky jam Sión; pi'itsaanp yë xëëw ets po'o ets ja wintsëntëjkëty mëti'ipë jam kukajpnajtëpën y'ixantëp ja Wintsën ja myëj'ajt y'oyajtën.