Read Biblia Mixe de Quetzaltepec Isaías 25 Bible Online

Isaías 25 - Biblia Mixe de Quetzaltepec bible

Isaías 25

¹Wintsën, mijts nTios'ajtyp; mijts nyajmëjnajxyp ets nmëjja'aw nkënu'kxyjya'apës yë mxëëw, jä'ä ko tëë xytyuny mëjwiin këjää winë ijxtëm ojts xynyikäjpxyën, jëtu'un tyimtso'ontäky tëëyëp.

²Tä tsaapajkjotmën ja naax kajpn të xytyuunta'ay, ets xit ko'ow ja naax kajpn të y'awinpity ma ijty ja'ay nyäkyëwent'atëtën; ojts ja mëtsip ja kyumoontëjk xyjyijtaayë, ets ka'ap ojts pën t'ëk'akojënë.

³Paaty ja naax kajpn mwinkutsë'ëkëty mëti'ipë ta'tspëky yajpatpën, mtsë'këyëp yë jotmëk kajpn.

⁴Jä'ä ko mijts jëtu'un të mnaxy tä tu'uk tsoktaknën ma y'amin y'a'ookën yë ëyoopëja'ay, ma y'amin y'a'ookën yë ja'ay mëti'ipë winë yajmëyäjtypyën ets mëti'ipë mon tuk yajpatpën, ma ka'ap nitu'umëtyën ets ka'ap ni'a'anmëtyën. Ko xyäjtë yë ëxëëkja'aytyëjk jëtu'un tä jeexyë tyitykpyojyën, ko pyotm'aty.

⁵Ëkë tä tyäty anpëxikyën të'ëts naaxjoty. Mijts myajyu'unkëp yë mëtsip yë jyot wyinma'any ma ya'axtë jyoktën, jëtu'un tä xy'apëjktukyën yë xëëw'an mëët yë yoots nëma'a. Mijts atsip xyaj'ëmony yë ëxëëkja'aytyëjk.

⁶Jam ma Sión kopkën, yë Wintsën mëti'ipë maaytyääyëpën winë, tnipëjktaakëja'any tu'uk ja ka'ayën ukën, aakyë'ë pyëjkta'akäämpy oyëtypë jë'kxy pëky, oyëtypë kääky uuky, xu'kxëtypë ets pa'akëtypë.

⁷Ma ya'atë naax kajpnën, yaa ja Wintsën nëjkx jëna'a tkë'ëtswä'kxy ja wit mëti'ipë tëkokyë ja naax kajpn ayä'ptujkëtëp, ja wit mëti'ipë ijty winpijtëtëpën.

⁸Nëjkxëp ja Wintsën tyajjëwä'äky ja o'kën tëko'oyën xëmëkyëjxm, pyo'ta'ajäämpy yë wyiin nëë mëti'ipë jëëytyëp yaxtëpën ets jyëpëjkta'ajäämpy naaxwiinyëtë apëtsëmy ja nänyëxi'ik nätyukxi'ikë ma nyaax kyajpnën. Yë Wintsën jëtu'un të y'ënä'äny.

⁹Jä'ä xëëw nëjkx ja aaw ayuk y'ënä'äny: Ya'atë jëtu'un Wintsënajtp mëti'ipë nTios'ajtëmën, yë'ë të ntuk'ijxpäjtëmë ets yë'ë të xyajtsokëmë. Tsojk ntukxoontakëmë ets ntukxo'on ntuk'ijtëmë, jä'ä ko yë'ë tëë xyajtsokëmë.

¹⁰Yë Wintsën yë'ë kyuwa'anäämpy yë Sión kajpn, ets Moab tnaaxkutäänëja'any tä ja'ay t'ateeny tukteenyën aay pu'uxmën.

¹¹Jëtu'un ja Moab yë kyë'ë tyajyu'kxa'any tä ja'ay nyëëyunyën je'eyëp ko ko kyë'ë tnajtsxajë ni'ikyë kyiny.

¹²Yë Wintsën nëjkxëp tkujijnajxta'ay yë pyoty ta'tspëkpyë ets nëjkxëp tjijtë'ëky ets tyajnaaxkukëtawë.