Read Biblia Mixe de Quetzaltepec Isaías 33 Bible Online

Isaías 33 - Biblia Mixe de Quetzaltepec bible

Isaías 33

¹Janty mon janty tuk mijts myajpaaty mëti'ipë naax kajpn mye'tsypyën ets mits ka'ap myajmeetsy; mëti'ipë jyiiky myëku'uk kyë'ëyäjkpyën ets mijts ka'ap pën mkë'ëyäkyë. Ko ënäty tëë xyajkutëkooytyä'äy ja naax kajpn, tääts nëjkx mijts mkutëkoy, ko ënäty tëë ja mmëku'uk xy'ayäky xykyë'ëyäky, tääts nëjkx mijts myajkë'ëyäky.

²Wintsën, pa'ëyoow najts'ëyo'owëtëk ëëtsëty, ëëtsëty jamës ja winma'any npëjkta'aktë ma mijtsën. Mijts ëëts xypyëtëkëtëp winjopy, mijts ëëts xyaj'ëwaatsëpëtsëmtëp ko ntsippaatëtyës.

³Ko ënäty mijts nkäjpxy, nëjkxëp kyäkta'atë ja nmëtsipëtyës; ko ënäty mijts xytyuktëkë ja tsip, jëtu'unyë ja naax kajpn axit ako'owë jyajtaja'antë.

⁴Ja myëtsiptëjk jëtu'un tyukja'tyë tä maymyu'ujën, jëtu'unyë tyukëtä'äkyë ets pyëjkëtyä'äyë winë.

⁵Yë Wintsën myëët'ajtyp ja mëj'ajtën jä'ä ko jam tsajpkëjxm jyuuky'äty; yë'ë Sión kajpn të tyaj'utsy mëët ja mëtëypyë nipaye'eyën ets ja tëyajtën.

⁶Ja naax kajpn xëmë tyaj'ita'any jotkujk. Yë ixpëkyajtën ets nija'awën, yë'ë mëk tsoowpatp ets yajnitsokp. Ko yë Wintsën ntsë'këmëty nja'awëmëty, mëj këjää tsyowpaaty.

⁷Mëtoow'it wi'ix ya'axtën jyoktën ja jotmëkja'aytyëjk jap tu'u akë'p ets wi'ix jyë'ëtën ya'axtën ja ja'ayëty mëti'ipë aaw ayuk myënëjkxtëpën ets jeexyë ja tsip yajkajpx'oyë.

⁸Aanë'ëk tëëtsë'ëk ja në'ë tu'u yajpaaty, nimaa pën kyanaxy kyatëkë. Ja aaw ayuk mëti'ipë ja naax kajpn tëë tjakäjpxy'ätyën ets ka'ap ja tsip tyunëtëty, ni pën tkayajtuny ets ni pën tkawinkutsë'ëkë.

⁹Jëëytyëp yaxtëp ja ja'ayëty ko ja o'kën tëko'oyën y'ity, anë'ëk tëëtsë'ëk ja Líbano naaxjot yajpatnë, ja Sarón itjot aanë'ëk tëëtsë'ëk të y'awinpijnë, ja Basán kopk ets ja Carmel kopk tëë wyinwatstaaynyë.

¹⁰Ënät ja Wintsën y'ënä'äny: Ëjts yam ntuktëkëjäämpy tääpë jotmay, tyamës nyaj'ixa'anyë ja nmëk'ajtën n'oyajtën.

¹¹Mëti'ipë mwinma'ny'ajtëpën ets mëti'ipë mtuuntëpën jëtu'un tä pu'uxmën, tä aaykyëta'akën; jëtu'un nwinpiixëja'any tä ja'ay jëën twinpiixën ets patoyë kye'eky.

¹²Kuyjyaamën nëjkx ja naax kajpn y'awinpity; tä äpny muum nyitoyën jëtu'un nëjkx nyitoytyë.

¹³Mëti'ipë jëkäm yajpatëpën mëtowtë tiijatyës të ntunyën, mëti'ipë wiinkonëtyën ijxpaatë ja nmëk'ajtënës.

¹⁴Jam Sión, janty tsëtyuuytyëp ja pokyjyä'äytyëjkëty ets ja ëxëëkja'aytyëjk janty tsë'këtyëp ets y'ëna'antë: ¿Pën jëtää y'ëkmëmëta'akëp ya'atë mëj jëën mëti'ipë no'ktëkoopyën mëti'ipë jam toopyën jäämpën ma o'ktaknën?

¹⁵Mëti'ipë ja'ay mëtëy tii tyuunpyën, nän mëtëy winë tkäjpxy tmëtyä'äky; mëti'ipë ja'ay ka'ap jyiiky myëku'uk tëytyunyën ets mëti'ipë ka'ap tkupëkyën ja näynyamo'ojë mëti'ipë yajktëpën ja ja'ayëty, ka'apë y'oy'atën ja jyot wyinma'anyëty; mëti'ipë ka'ap tmëtowa'anyën ko pën tnikäjpxy tnimëtyä'äky ja yajja'ay'o'kën, ets tim winpi'tsp këtiipë t'ixëty ja ëxëëktu'un ëxëëk kajpxën.

¹⁶Tääpë ja'ay jotkujk jyuuky'ata'any, jam tsaatunkëjxm tsoktakn tmëët'ata'any; ma nyäkyuwa'anëtëtyën, myëët'atäämpy xëmë ja kyä'äyën y'ukën, ets nëë ka'ap tyaj'ëmaaytya'aka'any.

¹⁷Nëjkxëp jatëkok ja yajkutujkpë ja myëj'ajtën xy'ijxë; ja naax tsëpa'an jëkämpaat nëjkx nyäxy.

¹⁸Ko ënäty jëna'a xyjyä'äymyetsy wi'ix ojts ja atsë'ëk ajawëpë xyajnaxyën, ënät nëjkx m'ëna'any: ¿Ma ënät tyam ja ja'ay mëti'ipë ijty yajkëpäjtpën? ¿Ma ënät tyam ja mëti'ipë ijty y'ijxyp tyuunpyën wi'ix ja meeny yaj'yäkyën ets wi'ix tyunyën? ¿Ma ënät tyam ja mëti'ipë ijty myëtyoowtääpyën ja mëjëtypë këjxmëtypë ja potsy?

¹⁹Pyätyp ja xëëw jëmëjt ma nëjkx ka'ap m'ëk yajpatnën jam ma ja naax kajpnën mëti'ipë tëkatsy ja wyinma'anyëtyën, mëti'ipë ëxëëkëty kajpxtëpën mëtyaktëpën, mëti'ipë pi'tskajpxtëpën ets wiinkajpxtëpën.

²⁰Ixtë ja Sión kajpn, ma xëmë ja xëëw tyunyë jyätyën; najts'ixëtë jam Jerusalén, jam ma yajpaatyën ja jotkujk'ajtën, mëti'ipë mëkën, mëti'ipë ta'tspëkyën ma ja tsiptuunpëtëjk jyajta'aktën, mëti'ipë ta'tspëky nikupën ets ka'ap nijënu'un nyitejpxy pyoty.

²¹Oy tsuj jam yë Wintsën nyänyikëxë'ëkyë. Oy jam jyänty yaj'ixy yë nëëjot wokjot, mëjjëty ets komëty, ma ka'ap nijënu'un tjëkyepyën wi'ix ja mëtsip tyëkëtyën.

²²Ja nyitejpxy ka'ap nëjkx myäyë wi'ix tmajts'itëtyën; ja nyinikäm ka'ap nëjkx wyo'onwä'kxy. May nëjkx ja wit meeny yajpëjkëtë ja mëtsip, yë'ëpaat ja tekymya'at ets ja kë'ëma'atpë nëjkx tpaaty ja wit meeny. Jä'ä ko yë Wintsën mëtëy nyipaye'ey, mëti'ipë yajtuumpyën ja ënä'ämën mëti'ipë nkutujkpë'ajtëmën, yë'ë xyajtso'oka'anëmë.

²⁴Ni pën nëjkx kya'ëna'any: Pëjkëpës. Yë Wintsën nëjkx tnime'kxy ja nyëë pyoky ja Sión ja'ayëty.