Read Biblia Mixe de Quetzaltepec Isaías 34 Bible Online

Isaías 34 - Biblia Mixe de Quetzaltepec bible

Isaías 34

¹Winkon mëjwa'aktë miitsëty naax kajpnëty ets xymyëtoow'itëty; mëj naax mëj kajpn ja'akyukëtë ya'atë aaw ayuk. Wä'än ja naaxwiinyëtë tmëtoow'ity ets tëkokyë mëti'ipë jää yajpatëpën, tëkokyë ja naaxwiinyëtë ja'ayëty wä'än tmëtoow'ijta'atë mëti'ipë yam yajkajpxaanp yajmëtya'akaanpën.

²Jä'ä ko yë Wintsën tëë tukjoot'anpëjkta'ay ja naax kajpn ets tëkokyë ja ja'ay, jëtu'un të y'ënä'äny ko tyajkutëkootya'aja'any ets tyaj'o'kta'aja'any wä'än timpyënëty.

³Xii yaa muum ja o'kpë jyëpijpnëja'any, aakyë'ë xyuuka'any jyoka'any oymyaajëty, aak ne'pny muum yaj'ixaanp nëë wok käätswok, tunjot kopkjot.

⁴Nëjkxëp ja mëtsa'a pyu'utakta'ay, jëtu'unyë nëjkx ja tsajp wyimpëtijtmuky tä mëj witën, nëjkxëp ja mëtsa'a pyi'tsta'atë ets nëjkx kya'ata'atë tä kepy'ääy kyä'äyën.

⁵Jëtu'un jam tsyoona'any ja amay jotmay tsajpkëjxm tä ja'ay tëypyujxn tjëpijpminy tjëpijxëpyën, jam kyëta'aka'any Edom, mëti'ipë tëë yajtuknipëjktaakën ets kyutëkoyëty.

⁶Nëjkxëp ja Wintsën ja tyiypyujxn nye'pynyëtyä'äy ets y'onku'tsta'ay jëtu'un ijxtëm ko ja'ay tyaj'ookyën yë kupixyny ayääkë ets tsajppax ayääkë ma y'o'ktaknën. Mëj këjää ja Wintsën ja o'kën tëko'oyën tyaj'ita'any jam Bosrá ets jam Edom.

⁷Jëtu'un kyëtaawa'antë tä tsajpkaajën, tä tsajpkaa u'unkën ets tä tsajpkaa ayääkën; ne'pnyëtya'ajëjaanp ja nyaax kyam, ets nëjkxëp ja on jyiiywya'kxta'ay ma ja naaxwayën.

⁸Jëtu'un nëjkx ja Wintsën ja tsyip y'äkë tyajnaxy, jää jëmëjt nëjkx tyaj'ity ja tëytyu'unën, mëët ko ënäty ja Sión kajpn o'ktëy të jyäty të kyëpety.

⁹Ja wokjot mëti'ipë jam ma Edom y'itjotmën, o'tsnën jyajta'aja'any ja naax, yë naaxway tsääpyëm toopyëm jyajta'aja'any; ja naax kam jëtu'un nëjkx jyajta'ay tëë yowë tyooynyë, jëtu'un nëjkx jyäty kyëpety tä jam Sodomë ets Gomorra jyäjtyën.

¹⁰Xëëny koots tyoyä'äny jyoka'any; winë xëëw winë jëmëjt jëtu'un y'ita'any, ni pën nëjkx jam kya'ëktsënaaynyë ets ni pën nëkx jam kya'ëknajxnë.

¹¹Yë'ë jam ju'k ets wääk'oo tsënaaytyaknpëkaanp, yë wëëky ets lut jam näpyä'änanëtëp. Jä'ä yë Wintsën tyaj'awinpita'any tääpë naaxwiinyëtë anë'ëk tëëtsë'ëk ets ni pën nëjkx jam kyatsëënë.

¹²Nijëna'a nëjkx jam pën kya'ëk'ënä'ämnë, kya'ëkyajkutujknë; ja mëti'ipë jeexyë ënä'ämtëp yajkutujktëpën nëjkxëp y'o'kta'atë.

¹³Jam ma ja akujktëjkën aak äpnyjyot, aak mëëyjot, aak aats jot nëjkx y'awinpijta'ay. Maywyax nëjkx jam yä'äxy jyoky ets may lut nëjkx jam nyäpyä'än nyämyu'uxyë.

¹⁴Tu'ukyë nëjkx y'itë ja kuuyxyëpëjy mëët ja pa'uk, ja tsajppax aakyë'ë nëjkx nyäya'ax nyäjyokëtë; nëjkxëp yë poj ka'oypyë jam y'atsë'ëk y'ajawë koots ets jam tpaata'any ja pyo'kxtakn.

¹⁵Jam ja ju'k nyäpyä'äna'anyë ets tyaa tpëjkta'aka'any ets y'u'unk'ixa'any, ets tyajyääka'any tyajpäta'any. Jam näjyëtu'un yë me'ty tyu'ukmuka'antë yä'äy to'oxy.

¹⁶Jap pa'ixtë ma ja Wintsën ja nyokyën ma winë jaaypyety myiinta'ayën, nitu'uk ya'atë jëyujk kyatëkoy'ata'any, tu'kyä'äy tu'kto'oxy jap myina'antë kuja'ay jä'ä ko jëtu'un yë Wintsën të tuknipëjktaakë ets tëë tyajtu'ukmujkta'ay tu'k nasxäjë.

¹⁷Nitu'ukjaty tëë tmooytyä'äy y'ijtakn ets tëë tukni''ijxëtyä'äy maajaty y'itëtyën, ets jam yajpaata'antë winë xëëw winë kyëjxm.