Read Biblia Mixe de Quetzaltepec Isaías 36 Bible Online

Isaías 36 - Biblia Mixe de Quetzaltepec bible

Isaías 36

¹Majkmajkts jëmëjt ënäty y'apety ma ja Ezequías tyëjkëyën yajkutujkpë, jää jëmëjt ojts yë Senaquerib, mëti'ipë jam Sirië yajkutujkpën tnitëkë tëkokyë ja naax kajpn mëti'ipëjaty ja Judá nyitënääpyën ets jä'ä tkajpnniwaantaay.

²Jam Laquis, jam ojts tsyoontë ja wyintsëntëjk mëti'ipë ja tsiptuunpë ja'ay nyiwintsën'ajtëpën ets nimiintë ja Ezequías mëti'ipë ënäty jam Jerusalén yajkutujkpën. Jam nyäpyëjktakëtë ma ja nëë nyikoompetyën, mëti'ipë yajtijpën Witpujtakn.

³Jam nyimiinëtë ja Eliaquim, Hilquías yë y'u'unk mëti'ipë jap wiinkëëpy kujkëëpyën ma ja yajkutujktaknën ets Sebná mëti'ipë ijty winë kyujääpyën ets Joah, yë Asaf yë myaank mëti'ipë ijty ja yajkutujkpë jyääpyë'ajtypyën.

⁴Ënät ja Asiria ja'ay mëti'ipë ja tsiptuunpë ja'ayëty nyiwintsën'ajtypyën, y'ënëmaayëtë: Mijts, ¿wi'ixën ko ka'ap mony mtuky, tiitën ko janty jotkujk mtimyaj'ijtëp?

⁵¿Ëkë jä'äjën mmay mtajy ko oy aaw oy ayuk näjyëtu'un tsyowpaaty tä ja mëk'ajtënë ets ja winma'any wi'ix ja'ay tsyiptunëtyënë? ¿Pën mtimtyuk'ijxpejtyp? ets ënät ëjts xynyipëtë'ëkëty.

⁶Jëtu'unës n'ixy ko yë'ë Egiptë mtuk'ijxpejtyp. Oy, yë Egiptë ja'ayëty jëtu'un yë'ëjëty tä kepy xya'kën, ko yajmatsy tääts kyë'ëtëkë. Jëtu'un tääpë yajkutujkpë, mëti'ipë jap Egiptë ënä'ämpën ets jëtu'un tyajjaty tyajkëpety mëti'ipë tuk'ijxpäjtëpën.

⁷Pën mijts xynyëmääpyës: Ëëtsëty yë'ëjës yë Wintsën ntuk'ijxpäjtëp, mëti'ipës nTios'ajtëpën. ¿Këtii yë Ezequías ojts tjijtë'kta'ay ja Wintsën ja tsyajptëjk ets ja wintsë'këntyakn ets t'ënëmaay ja naax kajpn ko jämyë mëpaat yë Wintsën yaj'ëwtaty ma ja wintsë'këntyaknën jam Jerusalén?

⁸Nikë tun tu'uk ja käjpxytyu'unën mëët yë nwintsënës, mëti'ipë jam Asiria yajkutujkpën ets tyam nmo'ojëty nimäjtsk mil yë kwaay pën mpatyp yë nyija'ay mëti'ipë tyuk'u'unyëtëpën.

⁹Mijts ka'ap mmayëtëty xyajkä'äkëty nitu'ukën yë Asiria ja'ay ¿wi'ixën jap Egiptë xypyaata'any ja mëti'ipë kwaay tyuk'u'unyääytyëpën?

¹⁰Ets näjyëtu'un, ¿jä'ä mmay mtajyën ko ka'apës yë Wintsën xypyutëkë etsës yë mnaax mkajpn nyajkutëkoyëtyë? ¿Yë Wintsënës të xykyexy etsës ya'atë naax kajpn nyajkutëkoyëty.

¹¹Ënät ja Eliaquim, Sebná ets Joah t'ëtsoowtë ja Asiria ja'ay mëti'ipë tsiptuunpë nyiwintsën'ajtypyën: Tun mëyajtën, arameë ayukës tukmëkajpxtëk ka'apës nwinjawëtë hebreo ayuk, jä'ä ko tam ja'ay potsykyëjxm jyatëtë wa'ats jam tmëtowtë.

¹²E ja Asiria ja'ay, ja tsyiptuunpë wintsën, tyaa y'ëtsooy: Ëjts ka'apës myiitsëty të nnimintë ets ka'apës yë'ëjëty të nniminy yë mwintsënëty ets ya'atë ayuk ntukmëtowëtyës mëti'ipës yë yajkutujkpë të xytyukmëkäxënës. Ëjts yë'ëjës të nyajtuknikexy yë tampë ja'ayëty potsykyëjxmëpë kyu'ijxnaxtën ets nijawëtëty ko kyë'ëmtë'ëny jyë'kxantëp ets kyë'ëmta'aty y'uukantëp.

¹³Ënät ja Asiria ja'ay mëti'ipë ja tsiptuunpëtëjk nyiwintsën'ajtypyën, mëk jyänty yujk'ënany, hebreo kyäjpxyp: Mëtowtë yajxon wi'ix m'ënë'ëmxëtën ja yajkutujkpë jampë y'ëne'emyën Asiria:

¹⁴Këtii nëkoo Ezequías mnätyukwin'ëënëtë. Yë'ë ka'ap myäyëtëty myajtso'okëtëty.

¹⁵Pën Ezequías jëtu'un m'ënë'ëmxëtë ets yi'iyë tu'uk Wintsën xytyuk'ijxpätëty ets pën mnëmaayëtëp: Yë Wintsën yë'ë xyajtso'oka'anëm yë'ë ka'ap nijëna'a t'ëwa'atsëty ets Asiria ja'ayëty o'ktëy tuntëty ya'atë naax kajpn,

¹⁶këtii xymyëpëktëty. Yë yajkutujkpë, Asiria ja'ay, jëtu'un m'ënë'ëmxëtë ets mëët ja tsip xykyajpx'oyëtëty ets tu'k'utëyë je'eyë mtimnyäkyë'ëyakëtëty, jëtu'unts xyjyë'kxtëty xypyëktëty ja mkë'ëmtsatym mëti'ipë të xynyiyu'ujëtën ets ja xe'enky tsya'am xyjyë'kxtëty mëti'ipë mkamjotm myaj'itëpën ets akujk jotkujk xy'uuktëty xypyëktëty ja nëë mëti'ipë të xynyipotsëtën.

¹⁷Ok nëjkx myajnëjkxëtë ma tu'uk ja kajpnën jëtu'unpë kyëxë'ëkyën tä mkajpnëtyën, ma y'ity wyintëyën yë tsajpmok ets tsatym. Jotkujk yë mtsajpkääky xyajkojtëty ets mkaytyëty m'uuktëty.

¹⁸Pën Ezequías mnëmaayëtëp ko yë Wintsën yë'ë myajtso'okanëtëp, këtii xymyëpëktëty. Nitu'uk yë tios të tkayajtso'oky yë naax kajpn mëti'ipë yë'ë y'ëwtajtëpën maajaty yë Asiria ja'ay mëët të tsyiptuntën.

¹⁹¿Maaxën ënät yajpatëpë ja wyintsënëty, mëti'ipë tyijtëpën Hamat ets Arpad? ¿Maaxën ënäty yajpatëpë ja wyintsënëty, Sefarvaim? ¿Näyajtso'okëtëp jëtää ko ja Samaria ets ja Asiria ja'ayëty ëxëëk tyunëtë?

²⁰¿Mëti'ipë tios ma tääpë naax kajpnën të tputëkë ja nyaax kyajpn ma ja Asiria yajkutujkpë mëët të tsyiptuntën? ¿Wi'ix ko m'ëna'antë ko yë Wintsën yë'ë yajtso'okäämpy yë Jerusalén kajpn?

²¹Ja Israel ja'ayëty amonyë ojts y'itë, nitu'k'aaw kya'ëtsoowtë, jä'ä ko jëtu'un ënäty ja yajkutujkpë të y'ënë'ëmxëtë ko y'ëtsowtëty.

²²Ënät ja Eliaquim mëti'ipë akëëpy kujkëëpyën ma ja yajkutujkpën ets ja Sebná mëti'ipë kujääpyën ets ja Joah mëti'ipë ja yajkutujkpë jyääpyë'ajtypyën, tkë'tstaaytyë ja wyit tyujkxy ets ojts tninëjkxtë ja Ezequías ets tukmëmëtya'aka'antë wi'ix ënäty ja Asiria ja'ay të y'ënä'änyën, mëti'ipë tsiptuunpëtëjk nyiwintsën'ajtypyën.