Read Biblia Mixe de Quetzaltepec Isaías 39 Bible Online

Isaías 39 - Biblia Mixe de Quetzaltepec bible

Isaías 39

¹Jä'ä xëëw jä'ä jëmëjt ojts yë yajkutujkpë Merodac-baladán, yë myaank yë Baladán, mëti'ipë yajkutujkpën jam Babilonyë, ojts tnijawë ko ënäty ja Ezequías mëk të pyikyë ets ko tëë jatëkok tsyo'oky y'akëtä'äky; ënät ja tyuunpë tkejxy mëët ja oy aaw oy ayuk ets tukmëkäjxëy tu'uk ja näynyamo'ojë.

²Ezequías janty'oy nyäjya'awëyë, ojts tuk'ijxta'ay tëkokyë jënu'un ënäty winë tmëëtëtyën, tä yë poop pujxnën, pu'ts pujxnën, nëë mëti'ipë pa'akxu'kpën tsowëtypë ets ma tyaj'ityën pëjkë'ëky ja pujxn mëti'ipë myëtsiptuunpyën ets tëkokyë jënu'un winë pëjkë'ëky tmëët'atyën. Nitii ojts tkayajninaxy, wa'ats tuk'ijxtaay jënu'un winë tmëëtëtyën ets maajaty tyaj'ityën.

³Ënät ja käjpxynyajxpë Jeséas ojts tninëjkxy ja Ezequías yajkutujkpë ets tyajtëëy: ¿Ma tääpë ja'ay tsyoontë, wi'ix të y'ëna'antë? Tääts ja Ezequías y'ëtsooy: Jëkäm tsyoontë, jam Babilonyë.

⁴Ënät ja Jeséas jatëkok tyajtëëy: ¿Tiijaty të t'ixtë ma m'akujktëjkën? Tääts ja Ezequías y'ëtsooy: Tëë t'ijxta'atë winë. Ni tu'ukës të nkayajninaxy, wa'atsës winë të ntuk'ijxta'ay.

⁵Tä ja Jeséas t'ënëmaay ja Ezequías: Mëtoow'it ya'atë aaw ayuk mëti'ipë yë Wintsën kyäjpxypën, mëti'ipë maaytyääyëpën winë:

⁶Pyatäämpy ja xëëw jëmëjt ma myina'antë yë mëtsip ets tyajnëjkxta'aja'antë tëkokyë winë mëti'ipë yajpatpën ma mkutujktaknën ets tëkokyë mëti'ipë të tpaat të t'ixtën yë m'ap m'okëty tyampaat; nëjkxëp winë tmënëjkxta'atë jam Babilonyë, nitii kyawë'ëma'any. Jëtu'un yë Wintsën të y'ënä'äny.

⁷Yë'ëpaat nëjkx yajmënëjkxtë m'u'unk m'okëty jam Babilonyë, nëjkxëp yajnëtsuktë y'ëxtsyaajëty ets jap myëtuntëty ma ja yajkutujkpë ja y'akujk tëjkën.

⁸Ezequías yë'ë tyukjotkujk'atëp ko yë'ë oy yajpaata'any mapaat jyuuky'ätyën, paaty t'ëtsooy ja Jeséas: Ja Wintsën ja y'aaw y'ayuk mëti'ipës mijts xytyuknimiimpën oy yë'ë.