Read Biblia Mixe de Quetzaltepec Isaías 40 Bible Online

Isaías 40 - Biblia Mixe de Quetzaltepec bible

Isaías 40

¹Jëtu'un ja Wintsën y'ënä'äny, mëti'ipë miits mTiosajtëpën: Yajjotkujk'atë, yajjotkujk'atë ja nnaax nkajpnës.

²Mëët ja yu'unk aaw yu'unkjot ënëëmëtë ko tëë kyixy nyäxy ma mëtuunpë ëyoopë të y'itën, ko tëë tkumëtoowta'ay ja nyëë pyoky, ko tëë tmënaxy tyajnaxy ja ëyo'on jotmay mëti'ipë ja Wintsën mmooyëtën.

³Jëtu'un tu'uk ja aaw yo'kn yajmëtoy y'ënä'äny: Yaj'oyëtë ja në'ë tu'u ma ja Wintsën nyaxëtyën, tuk'akäätsëtë tëywyijtsnë ma nyajtswa'akëtyën ja nWintsën'ajtëm Tios, jam të'ëts'itjotm ma ka'ap tii y'ity wyintëyën.

⁴Tukjä'pëtya'atë ma tyukmu'kx tyukëkëtyën, tajkijpxyëtë ma nyitun nyikopkëtyën, yaj'awinpitë joy ma yä'äpëtyën.

⁵Jëtu'un ja Wintsën tyaj'ixa'anyë ja myëj'ajt y'oyajtën, ets tu'kë'ëyë ja'ay t'ijxta'aja'antë. Wintsën kë'ëm të tnikäjpxy.

⁶Jëtu'un tu'uk ja aaw yo'kn të yajmëtoy y'ënä'äny: Mëk yujkya'ax, etsës të nyajtëy: ¿Wi'ixës n'ëna'anëty? Ko tëkokyë yë naaxwiinyëtë ja'ay jëtu'un yë'ëjëty tä aay ujtsën, tä pëjyën kamjotypë tu'ujotypë yajpaatyën.

⁷Yë ujts pojën tsyi'itsy, yë pëjy pojën xyootsy ko yë Wintsën tyajnaxy yë pyoj ma yë'ëjëtyën. Tëyajtën ko naaxwiinyëtë ja'ay jëtu'un tä aay ujtsën.

⁸Yë ujts pojën tsyi'itsy ets pëjy pojën xyootsy, e yë Wintsën yë y'aaw y'ayuk itaanp xëmë ets nijëna'a kyatëkatsa'any.

⁹Jam mpätëty Sión, tunkëjxm ets jam mëk mkukajpxnaxëty, jam xynyikajpxëty ja oykyäjpxy oymyëtyä'äky. Këtii mtsë'ëkë mijts Jerusalén, amëk jotmëk timkajpx, tukmëtoowta'a ja Judá y'itjot nyaaxjot: Tyaa ja Tios mëti'ipë miits mTiosajtëpën.

¹⁰Mëët yë mëk'ajtën ja Wintsën myiny, yë'ë winë të tmëmëtakta'ay mëët ja myëk'ajtën ets mëët ja kyë'ë. Ja nyaax kyajpn jä'ä yajmiimpy mëti'ipë të tyaj'ëwaatsëpëtsëmyën, mëti'ipë jeky të y'ityën wojpë'ëky käjpë'ëky.

¹¹Jëtu'un myiny tä tu'uk ja'ayën mëti'ipë y'ijx'ijtyp kyëwent'ajtypyën yë kyupixyny, tsyä'änë'kpy yë kyupixyny u'unk; tääts tmu'uxy kyätykyijxy, ëtyä'äkyë'äämpy tyajnëjkxy ja mëti'ipë tim mëxu'unkën.

¹²¿Pën jëtää yë mëjmejy të t'ëk'atsa'tëpë, ëkë yë kyë'ëwa'axy mëët të t'ëkkijpxpë yë tsajp? ¿Pën jëtää yë naaxway të t'ëk akijpxnajxpë jënu'un jye'emtyëtyën, ëkë të t'ëk kijpxtääpyë jënu'un jye'emtyëtyën yë tun kopk?

¹³¿Pën jëtää të t'ëk tuk'ënëmääpyë yë Wintsën ma winë oy të tkatunyën ëkë të t'ëk tukni''ijxëpë wi'ix tii t'oytyunëtyën?

¹⁴¿Pën jëtää të t'ëk kajpxwijpë ets të t'ëk tukja'akyujkëpë winë? ¿Pën të tyuknipëkyë wi'ix winë tëy tëtä'äky tnipaye'eyëty? ¿Pën të tyukni''ixëty ja wijyajtën? ¿Pën të myo'oyë ja ijxpëky'ajtën?

¹⁵Yë'ë, jëtu'un yë mëj naax mëj kajpn t'ixy tä nëë tu'ktsunyën, tä tu'uk naaxwayën jap kijpxënjoty; yë kajpn mëti'ipë nëë'itkujky yajpatëpën jëtu'un t'ixy tä tu'uk yë jinën.

¹⁶Oy jeexyë ja jëyujk jam Líbano tyimyajmëtso'ontääpyë, mëët ja nyija'axy ka'ap myëta'akëty ets Wintsën yajtukwintsë'ëkëty nino'oky nixämy.

¹⁷Tëkokyë yë naax kajpn nitii tkakëjxm'atë ma yë'ëjën; mëët yë'ë nijënu'un kyatsoowpaaty.

¹⁸¿Tii mëët xy'ëk'ijxkijpxtëty yë Tios? ¿Wi'ix ja y'awinax xy'ëkyajkojëtëty?

¹⁹Tu'uk ja'ay mëti'ipë pujxn y'oytyuunpyën, yajxon tyajkojy tu'uk pujxntsetsy, tääts tu'uk yë pu'ts pujxn oytyuunpë tuknikoy yë pu'ts pujxn ets t'oytyuunë yë yo'ktëy mëët yë poop pujxn.

²⁰Mëti'ipë awinax tsäjtspën, yë'ë juunkepy y'ixtääpy këtiipë pyu'utëty, ets t'ixta'ay yë ja'ay mëti'ipë yajxon tyuktsätsëpën këtiipë kyujëpijpnaxëty.

²¹¿Këtiitën ijty jëtu'unpë xynyijawëtë? ¿Këtiitën nijëna'a jëtu'unpë xymyëtowtënëmë? ¿Këtii ni pën ojts mtuk'ixëtë? ¿Këtiitën nijëna'a jëtu'unpë xyjyä'äkyukëtë?

²²Yë Tios jam yë kyutujktakn tmëëtëty ma naaxwiinyëtë ja nyiwits nyijuuxën, yë'ë wa'ats t'ixy tuny yë naaxwiinyëtë ja'ay tä yaj'ixyën yë pujtpë. Jëtu'un yë tsajp tyä'ptëy tä ja'ay wit tyä'ptëyën, jëtu'un twijtstëy tä ja'ay tëjk nikäm twijtstëyën.

²³Ka'ap mëj timpyëjktä'äky ja'ay mëti'ipë mëj'äämpy yajëkyäjpën, yë'ë jëtu'unyë tyajtëkoy mëti'ipë ënä'ämtëpën yaa naaxwiiny naaxkëjxy.

²⁴Jëtu'un tä pi'k ujts u'unkën naaxkëjxy yonyën mëti'ipë yajnaanpäänpën, mëti'ipë ëka'any tiktskäkpën. Pën yë Wintsën yaj jëënpojpy ma yë'ëjëtyën, xootsantëp ënätyë, ets wyimpapojy mëët mëktuupoj tä aay pu'uxm wyimpapojyën.

²⁵Jëtu'un ja Wintsën Wa'atspë tyajtëy tyam: ¿Tiis mëët xy'ijxkijpxa'antë? ¿Pën xy'ëkmëpaatëpës?

²⁶Jam yujk'ixtë tsajpwinm ets xy'ixtëty: ¿Pën jam winë të tyajkojy? Mëti'ipë të tuknipëjktakëtyä'äyën maajaty y'itëtyën nitu'ukjaty ets aak xyëëw tyukmëkäjpxyp. Nëkooyë tmëët'ajnë mëk'ajtën ets mëjaaw paaty nitu'uk kyatëkoy'äty

²⁷Israel, Jacob yë nyaax kyajpn, ¿wi'ix ko mijts m'aak'ëxëëkja'ap winë? ¿Wi'ix ko m'ëna'any: Yë Wintsën ka'ap t'ixy wi'ixës njaty nkëpetyën, yë Tios tii tkëwentëty oyës wi'ix njatëty nkëpätëty?

²⁸¿Tii këtii ënäty xynyijawë? ¿Këtii të xymyëtoyë? Yë Wintsën, yë'ë Tios xëmëpë y'ijtëyën, mëti'ipë yajkojën yë naaxwiinyëtë, ka'ap nijëna'a y'ënu'kxë ets myëjaawkëxy; yë wyijy'ajtën xëmëkyëjxm yë y'ity.

²⁹Yë'ë myëjaawmoopy mëti'ipë të y'ënu'kxën, ets jyotmëkmoopy mëti'ipë pëma'ayën.

³⁰Yë'ëpaat yë yujkyeeky ëna'k y'ënu'kxë, yë'ëpaat mëti'ipë oy mëkën jëtu'unyë jyënuunkëtä'äky,

³¹yë'ë tëyëty mëti'ipë yi'iyë Wintsën tyuk'ijxpäjtëpën xëmë amëk jotmëk yajpaata'antë ets jëtu'un nyäjyawëja'anëtë nipe'tym kupe'tym tä witsnën; jyëkyejpy mëk pyëyë'ëktëty ets jyëkyejpy pe'tym ye'eytyëty. Ka'ap y'ënu'kxëja'antë.