Read Biblia Mixe de Quetzaltepec Isaías 41 Bible Online

Isaías 41 - Biblia Mixe de Quetzaltepec bible

Isaías 41

¹Amoonta'atë miitsëty, naax kajpnëty nëëpë'aaypyë yajpaatën. Naax kajpnëty amëk jotmëk itë. Mintë ets nikajpx nimëtyakmëty ya'atë winma'any; tsojk ntu'ukmujkëmë ets ntukxo'on ntuk'ijtëmë.

²Pën yajmiin tu'uk ja yajkutujkpë maatsow xëëw pyëtsimyën ets myëtäky? ¿Pën ojts ja naax kajpn myo'oyë ets tjä'ä'atëty, ets mëët ja tyiypyujxn tukpux tukka'atsëty ets aay pu'uxmën jyata'atëty kujy jëpipy?

³¿Pën y'ëwatsyp ets tpapo'ojëty jëkämpaat ijxtëm jeexyë ka'ap tyeky tyajnaaxpaatyën?

⁴¿Pën ya'atë jëtu'unpë të tuny të tkäjpxy? ¿Pën të tyajkutuky ets winë tyunëtëty naaxwiiny naaxkëjxy, tyimtso'ontäky ets tyampaat? Ëjts, mëti'ipë Wintsën'ajtpën, tu'kpajkpë ja Tios, xëmëkyëjxmëpë y'ityën.

⁵Ja naax kajpn mëti'ipë yajpatëpën mejypyë'aay, ojts t'ixtë ets tsyë'ëkëtë; yu'kxtaay ja naaxwiinyëtë oy tyimmaajëty. Tää ja wyinkontë, tää ja myintë.

⁶Tu'kë'ëyë ja'ay mëti'ipë tsäjtspën ëkë mëti'ipë kojpën jyotmëkmoopy yë myëku'uk.

⁷Mëti'ipë winë tsyejtypyën ets kyoopyën jyotmëkmoopy yë mëti'ipë pu'ts pujxn tyuunk'ajtypyën; mëti'ipë tii wyojpta'tsypyën yajjotkujkëp mëti'ipë kya'apëtijtypyën yë pujxn ko nyi'ëëtsy, ets t'ënëëmë ko oy ja pujxn nëë, ok twojpta'atsy ja awinax këtiipë yu'kxëty.

⁸Mëtoow'itë ya'atë aaw ayuk, miitsëty Israel ja'ayëty, mëti'ipë Jacob nyaax'ajtyp kyajpn'ajtypyën, ja ntuunpës mëti'ipës të nwin'ixyën, ja naax kajpn ma tsyëënëtën ja nmëku'ukës Abraham ja y'u'unk y'ok.

⁹Ëjts mijts të nyajtsoony ma naaxwiinyëtë jyëjpkëxyën, jëkäm ënäty myajpaaty ko ojts nyaxtsoy ets t'ënëmaay: Mijts ntuunpë'ajtyp. Ëjts mijts të nwin'ixy ets ka'ap nijëna'a të n'ixtijy.

¹⁰Këtii mtsë'ëkëty, ëjts yajpatpës ma mijtsën, ëjts mijts xyTyios'ajtp. Ëjts mijts nmëjaawmoopy ets nputëjkëp, mëëtës ja nkë'ë nmajts'ity ets xëmë mmëta'akëty.

¹¹Tëkokyë mëti'ipë ënäty m'ëxëëk'ijxëp mka'oy'ijxëp, tsëtyu'unmëët wyë'ëma'antë; mëti'ipë ënäty tsiptunantëpën mëët mijts, wa'ats nëjkx kyutëkooytya'atë.

¹²Nëjkxëp ja mmëtsip xyjya'ijxta'ay, ka'ap maa xypyaata'any; mëti'ipë tsiptunaanpën mëët mijts jëtu'un nëjkx nyäxy ijxtëm jeexyë tii kyatimkyä'tyën.

¹³Jä'ä ko yë mWintsën Tios, mkë'ëkëjxy mmajts'ityë; tëë n'ënëëmë ko këtii mtsë'ëkëty.

¹⁴Jëtu'un yë Wintsën y'ënä'äny: Mijts Israel, Jacob yë nyaax kyajpn, oy mutskëty ets mxyëëpëty, këtii mtsë'ëkëty, tyam mputëkëty. Ëjts Wintsën, wa'atspë yajpaatyën ma Israel ja'ayëtyën, ëjts mijts xynyitsokpë'ajtp.

¹⁵Jëtu'un mijts nyajtuna'any tä tu'uk kepyën mëti'ipë tsajpmok wyinjëjtypyën, jemypyë ets mëti'ipë oy yë tyëtsën; mwinjëtsäämpy ja tun kopk, way way xytyuunta'aja'any, tä tsajpmok akën xyaj'awinpita'any ja tun kopk.

¹⁶Ets nëjkx xywyimpojy, wä'än tpapojta'ay; wä'än yë tuupoj yë'ë yajnëjkxyë. Ets mijts akujk jotkujk yë Tios xytyukxoonta'akëty, ja Wa'atspë yajpaatyën jam ma Israel kajpnën.

¹⁷Yë ëyoopëja'aytyëjk nëkooyë nëë t'ijxtaaynyëtë ets ka'ap maa tpaatë. Tëë ja yyä'än tyëtstaaynyëtë mëët ja tëëtsë; ëjts maas nWintsën'atyën npa'ëyowantëpës yam; ëjts, mëti'ipë yë Israel ja'ay y'ëwtajtëpën, ka'apës n'ëxmatsa'antë.

¹⁸Nyajkupëjäämpyës yë mëjnëë të'ëts'itum ets nëë nyajmuuta'anyës joy ituuy; mo'ontsjot nyaj'awinpita'anyës yë të'ëts'itjot, nyajkomäämpyës yë nëë wok ma y'anë'ëk tyëëtsë'ëkëtyën.

¹⁹Jam ma ka'ap tii y'ity wyintëyën, jamës nyajyona'any, acacië kepy, arrayanes kepy ets olivë kepy; jam ma tëë naaxwiinyëtë tyëëtsë'ktaaynyën jamës nyajyona'any tsiin kepy, mëët yë ajë kepy ets wiinkëtypë kepy,

²⁰ets tëkokyë yë ja'ay nijawëtëty, tmëmay tmëtajtëty ets tja'akyukëtëty, ko Tios winë të tyajkojy, mëti'ipë jam yajpatpën ma Israel ja'ayëtyën ets yë'ë winë të tpëjktä'äky.

²¹Yë Wintsën, mëti'ipë Jacob kyutujkpë'ajtypyën, jëtu'un y'ënä'äny: Mintë miitsëty awinaxëty, ets mnanyikajpxtu'utëtëty, min nikajpxtë wi'ix mëpaat ka'ap ëxëëk mjatë mkëpätën.

²²Min nikajpxtë mëti'ipë miimp këtakpën ets mëti'ipë të tyuny të jyätyën ets yajja'akyukëty; nikajpxtë tii tunan jatanëpën ets wi'ix jyëjpkëxa'anyën.

²³Tuk'ëwa'anëtyëk ëëtsëty tii nëjkx ok tyunyë jyätyën, ëkyajnikëxë'ëk ko miitsëty mjanty tios'atë. Ëktuntë tii winë, wä'än t'ixy pën oy ëkë pën ëxëëk pyëtsimy, yë'ë mëti'ipë mëpaat yajtsë'ëkën.

²⁴E miitsëty nitii xykyakëjxm'atë, ets nitii tjëkyepy xykyatuntëty. Ëxëëk tsuu ënäty ja ja'ay mëti'ipë m'ijxpatëpën.

²⁵Ëjts ojts tu'uk ja'ay nyajminy jamtsow ma xëëw pyëtsimyën, xyëëw ojts ntukmëkäjpxyës ets ojts myiny jam anëkëjxmtsow, jëtu'un tä mo'ontsën të t'ateeny të tukteeny yë yajkutujkpëtëjk, jëtu'un tä yajtu'tskojpën tpiintä'äkyën yë mo'onts.

²⁶¿Pën ojts tëëyëp tnikäjpxy, ma winë tsyo'ontäkyën ets yajnijawëty? ¿Pën ojts tëëyëp t'akäjpxy ets yajwinjawëty ko mëtëy ojts jya'ëna'any? Nitu'uk miitsëty ojts wi'ix mka'ëna'antë, nitii ayuk ojts pën tkamëtoy mëti'ipë mkajpxtën.

²⁷Ëjts tëy, ojtsës winë ntuk'ëwaanëtë yë Sión ja'ayëty, ojtsës nja'ay nkexy ets nikajpxëty ko tsojk jatëkok jyä'äy wyimpita'antë.

²⁸Koos nja'ixy, nimaa wiinkpë tios kyakëxë'ëky; mëti'ipë jeexyë ëëwij kajpxwijpën, ni pën tka'ëtsoowwinpity ja mëti'ipës të njayajtëyën.

²⁹Nitii tkakëjxm'atë yë'ëjëty, oy jeexyë tu'ukën. Nitii kyamayëtë tuntëty; naaxpotsy yë je'eyë mëti'ipë tukwa'atsën.