Read Biblia Mixe de Quetzaltepec Isaías 47 Bible Online

Isaías 47 - Biblia Mixe de Quetzaltepec bible

Isaías 47

¹Mijts to'oxy'ëna'k, Babilonyë ja'ay, jënak jam ma myajpaatyën, ma mjaaknätyu'uk'atyën ets naaxwayjoty m'u'unyëty, mijts Caldeo to'oxy'ëna'k nëwääts jam m'ënyääytyaknkëjxy ma myajkutukyën; naaxkëjxy u'unyë, jä'ä ko ka'ap m'ëk yajtijjanë yu'unk ets ëmaay.

²Koonë'ëk ja tsaa mëti'ipë mtukjëtsymyeepyën ets ja tsajpmok xymyä'äjëty; näwyinwijtu'utët, pëjkmuk yë m'ëxmuk, niwijtstu'ut yë mtekpyoonty ets mnëënaxëty;

³niwa'ats ëxwa'ats m'itëty, wä'än tyaj'ixy ja m'ëmaayajtën. Minës n'ëktuunwinpity ijxtëmës ëxëëk të njaty të nkëpetyën, ni pën xykya''akajpxtukëtyës oy jënu'un pën jyanu'kxta'akëty.

⁴Mëti'ipë ëëts xyaj'ëwaatsëpëtsëëmpën ja Wintsën, wa'atspë yajpaatyën jam Israel, mëti'ipë xyëëwajtypyën Wintsën, mëti'ipë maaytyääyëpën winë, jëtu'un y'ënä'äny:

⁵Amonyë naaxwääts mijts to'ox ëna'k, Caldeo ja'ay; akootstuuy tëkë, jä'ä ko ka'ap m'ëk yajtijjanë yajkutujkpë ma ja naax kajpnën.

⁶Ko ojts ntukjoot'anpëkyës yë nnaax nkajpnës, ojts nkë'ëyäkyës yë nkë'ëmnaax nkë'ëmkajpnës ets ëxëëk yajtun yaj'ënëëmëty, ets ojts npëjktä'äkyës mkë'ëjoty. E mijts ka'ap nijënu'un xypya'ëyooy, ni'ikyënëm ojts ja mëjja'aytyëjk xytyuktsëëmë'ëky je'emtypë tsëmy kë'ëy.

⁷Ets m'ënany: Ëjts xëmë wintaj'ataanp yajkutujkpë'ataanp. Mijts ka'ap ojts nijënu'un xymyëmay xymyëtajy wi'ix mkukëxëja'anyën.

⁸Paaty tyam n'ënëëmë ets xymyëtoow'itëty yajxon mëti'ipë yam ntuk'ënëëmëjäämpyën, mijts to'oxytyëjk mëti'ipë wit meeny y'atsojkpyën ets ka'ap nijënu'un mkumay mkutajë jam ma mkutujktaknën, ets mnämyä'äy mnätyajxëty: Ëjts, ëjts nätyu'uk; ka'apës nijëna'a nku'ookëtëty ets ka'apës nijëna'a u'unktuk nwë'ëmëty.

⁹Mäjtsk ja ëyo'on jotmay mëti'ipë mniminanëpën, ets tu'kxëëyë tyuna'any jyata'anyë: Ku'ooky mwë'ëma'any ets u'unktuk, oy mjatuny mjaakäjpxy ets oy jënu'un yu'utsykyäjpxy xyjyanijawë ets xyjyatukjaty.

¹⁰Mijts yi'iyë të xymyëmay të xymyëtajy ja m'ëxëëktu'un m'ëxëëk kajpxën ets të m'ëna'any: Ni pën xykya'ixyës. Ja mwijyajtën ets ja m'ijxpëkyajtën yë'ë të mnätyukwin'ëënyë, ets të mmay të mtajy: Ëjtsyë jëtu'un tu'uk, ka'ap pën wiinkpë.

¹¹Je'eyëp ko minaanp ja ëyo'on jotmay ma mijtsën, oy jënu'un tii xyjyatunëty ma mpatoy mpano'okyën, ka'ap tii xytyunëty. Ja ëyo'on jotmay mëti'ipë mtukëtakëpën, ka'ap tjëkyepy xykyukä'äkëty; ka'ap ënäty tii xy'aawëty xyjyotëty ko ja amay jotmay mtukja'tëtëty.

¹²Tuun'ëtë'ëts ja mpano'k mpanajxën ets ma mkäjpxypyokyën mëti'ipë mpatso'ontakën ko m'ëna'k'ajty, ets kë'ëm xy'ixëty pën mtu'unxëyëp ets pën mtsë'këyëp yë ja'ay.

¹³Tëëxë kanaak xymyëët'aty m'ëëwij mkajpxwijpë, ets mmëtsipkä'äxnëp ijty ko nyimay'ajnëtë. Wä'än ënät tyam tmëjwa'aktë ja mxëëwmääpyëtëjk, mëti'ipë nyija'awëtëpën wi'ix yë mëtsa'a tyajkajpxtëtyën, mëti'ipë winpo'ojaty mtuk'ëwa'anëyëpën tii tunan jatanëp ets jeexyë mijts mtso'oky.

¹⁴Je'eyëp ko ix, jëtu'un yë nyaxtë aay pu'uxmën, jëtu'unyë tyooytyëkoytyë, ka'ap tjëkyepy nyäyajtso'okëtëty jëënjoty. Jä'ä ko ka'ap jyëtu'unëty tä jëënpajkën ets jëënyä'änkën mëti'ipë jyëkyejpy yajnawäätsëty ets jam ja'ay jyokxpëktëty.

¹⁵Jëtu'un të kyëxtë ja mpatooy mpanajxpëty, mëti'ipë janty'oy të xyjyawën ko të mjuuky'äty. Nitu'ukjaty aak këëk tu'u të tpëjknëtë, ets ni pën të kyawë'ëmy mëti'ipë jeexyë myajtsokëpën.