Read Biblia Mixe de Quetzaltepec Isaías 51 Bible Online

Isaías 51 - Biblia Mixe de Quetzaltepec bible

Isaías 51

¹Jëtu'un ja Wintsën y'ënä'äny: Mëtowtë ya'atë aaw ayuk miitsëty ninu'un xytsyojkën'atën ja oypyë juukyajtën Ixtë ja tsaa maa ojts yajnëpu'uyën ets maa ojts yajmëpëtsëmyën.

²Ixtë ja Abraham, mëti'ipë miitsëty mteety'ajt m'ap'ajtëpën, ja Sara mëti'ipë myajmëxu'unk'ajtëtën. Koos ojts nmëkäjpxy nimäjtskpajk ënäty je'eyëty; e koos ojts nkënu'kxtë tääts nyimayëtë ets tpatë may ja y'u'unk y'ëna'k, y'u'unk y'ok.

³Tëy yë'ë ko yë Wintsën yajjotkujkta'akäämpy jatëkok yë Sión kajpn, mëti'ipë xit ko'ow të yajpaatyën. Aayjyot ujtsjot y'awinpita'any ja anë'ëk tëëtsë'ëkpë, jëtu'un tä ja mëti'ipë ja Wintsën y'oytyuunën jam Edén. Jam'ataanp ja jotkujk'ajtën ets xoontakën, ëy yä'äxy ets xuxpë wojpë.

⁴Naax kajpnëty, mëtoow'itë n'aaw n'ayukës: N'ijxpëjkënës yam nyakäämpy, ets ja ntëyajtënës yë'ë kyutë'kxäämpy kyujajäämpy ja naax kajpn.

⁵Tim tëë jëtu'un maas nmëta'aka'anyën, miimp këtakp ja xëëw jëmëjt maas ja ëwaatsëtuuy'ajtën nyajnaaxkëta'aka'anyën; Mëëtës ja nkutujkën n'ënä'äma'any ja naax kajpn. Ja naax kajpn mëti'ipë yajpatëpën mejypyë'aay ëjts xy'ëwxitantëp ets yë'ë tyukjotkujk'atantëp ja nmëk'ajtënës.

⁶Pa'at'ixtë jam tsajpkëjxm ets naaxku'ixëtë: Tä jok tä yootsën yë tsajp jyajta'aja'any; tä tukwit tuktujkxyën yë naaxwiinyëtë jyata'any ets naaxwiinyëtë ja'ay jëtu'un y'ooka'antë tsatsyën. E ëjts, ja nnitsokënës xëmëkyëjxm y'ita'any, ëjts xëmës nmëta'aka'any.

⁷Mëtoow'itë ya'atë aaw ayuk, miitsëty ninu'un xynyijawëtën mëti'ipë mëtëyën, miitsëty naax kajpnëty mëti'ipë kyupëjktëpën ja n'ijxpëjkënës. Këtii xymyëjpëjkta'aktëty oy pën wi'ix m'ënë'ëmxëtëty, këtii xymyëmon xymyëtukëty ko m'ojëtëty,

⁸jä'ä ko yë'ëjëty jëtu'un jyata'antë tä tukwit kyiitsyën, tä tukwit tyënë'kën. Ëjts ja nmëk'ajtënës xëmë y'ita'any, ets nitsokënës xëmëkyëjxm yajpaata'any.

⁹Pëtë'ëk, ëkma'aypyëtë'ëk, yajpëtë'ëk ja mkë'ë m'aaw Wintsën, ëkpëjkta'ak ja mmëjaaw; ma'aywyij jëtu'un tä ojts mma'aywyijyën tëëyëp. Ko xyajkutëkooy ja Rahab, mëti'ipë ënäty jëtu'unën tä tu'uk mëj jëyujkën nëëjotypë.

¹⁰Ko ojts jëtu'un xyajjaty tä ja mëj jëyujkën mëti'ipë jap nëëjotyën ets ojts xyajnëëkutëëtsë ma ënäty jap këknëëjoty y'ityën. Tu'ujën jap xyaj'awinpijty ets nyaxtëty të'ëts wa'ats ja mëti'ipë të y'ëwaatsë pëtsëmtën.

¹¹Jëtu'un nëjkx wyimpitë mëti'ipë ënäty mijts të xyaj'ëwaatsëpëtsëmyën ets nëjkx kyajpntëkëtë xoontä'äky jam Sión, mëët ja ëy yä'äxy; jam nëjkx yaj'ixtë wyiinkëjxm jyëjpkëjxm ko ënäty jotkujk yajpaatë; akujk jotkujk nëjkx y'itë, ka'ap yuu pa'am tmëët'ata'antë, ets ja jë'ëyën yaxën jëtu'unyë nëjkx tyëkooytyä'äy.

¹²Ëjts yam mijts kë'ëm njotmëkmoopy. ¿Pën mtsë'këp? ¿Naaxwiinyëtë ja'ayë? ¿Naaxwiinyëtë ja'ay mëti'ipë o'kpën, mëti'ipë jëtu'un kukëjxëpën tä aay ujtsënë?

¹³¿Wä'än jëtää xyjyä'äytyëkoyëty ja mWintsën mëti'ipë të myajkojyën mëti'ipë ojts yë tsajp twijtstëyën ets tyajta'tspëjkyën ja naaxwiinyëtë? ¿Tii je'eyën xëmë mtsëyuyä'änyë janaam jatsojk, ko ëxëëk mtunyë ja kumeenyjyä'äytyëjk, mëti'ipë jëjp'ixy yajpatëpën ets myaj'ooka'anyë?, ¿Maajën të nyijkxy ja m'ëwa'an'at?

¹⁴Mëti'ipë o'ktëy të yajtunyën pyätyp ja xëëw ma y'ëwaatsëpëtsëma'anyën; ka'ap jap pujxn tëkoty y'ooka'any ets ka'ap ja kyä'äyën y'ukën tyaj'ëmaaytya'aka'any.

¹⁵Ëjts Wintsënajtp, mëti'ipë mTios'ajtypyën jä'äs nxëëwajtyp Wintsën mëti'ipë maaytyääyëpën winë; ëjts ojts nka'ap yu'kxy yë nëëmejy ets ojts y'ëëtstë kyomtë,

¹⁶ëjts ojts nwijtstëy yë tsajp ets ojts nyajta'tspëkyës yë naaxwiinyëtë. Ëjts mijts n'ayukmooy, ëjts mijts të nkuwa'any mëëtës yë nkë'ë. Täätsës të n'ënëëmë yë Sión kajpn: Mijts nkajpn'ajtyp.

¹⁷Ëkma'aypyëtë'ëk, ëkma'aypyëtë'ëk, Jerusalén pëtë'ëk; Jëtu'un yë Wintsën yë tsyip y'äkë të xykyu'ëyowë tä ja'ay xa'k nëë t'uukyën ets ko t'ukëtä'äky tääts myukpëkyë.

¹⁸Nitu'uk ja m'u'unk m'ëna'k oy mkatu'uwinwowëtëty; oy jënu'un jyanimay'atë, janty nimay ja m'u'unk m'ëna'k të xyjyapaatë, nitu'uk tkamëët'aty ja oyajtën ets jeexyë mpawitsyë ko muum mnëjkxy.

¹⁹Ya'atë ojts mäjtsk xy'ëyo'on'aty: ko ja mnaax mkajpn kyutëkooy ets winë yajmä'tstaay, ets ko ojts ja mja'ay ja jëën tsip ets yuu xëëw yaj'ookëtë. ¿Pën ënät mpa'ëyowëtëp? ¿Pën ënät myajjotkujkëtëp?

²⁰Jëtu'un tä kupixyny ëkë tä tsajppax muum jyänën ets të y'ënu'kxën, jëtu'un ja m'u'unk m'ëna'k të jyatë, jëtu'unyë të myëjaawkëjxnëtë, kujy jëpipy muum të yajpaatë në'ë'aay tu'u'aay tëë tsyëtyujta'atë mëët ja Wintsën ja tsyip y'äkë, ko të tyiytyunëtë.

²¹E paaty ënät mijts naax kajpn, ka'apë mjotkujk'atyën, mëtoow'it ya'atë aaw ayuk, ma myajpaatyën tä amu'ukyë ja'ayën ets ka'ap m'uuky.

²²Yë mWintsën mëti'ipë mTios'ajtypyën, mëti'ipë pyaye'epyën ja nyëë pyoky ja nyaax kyajpn, jëtu'un y'ënä'äny: Njëpëkäämpyës yam tääpë a'ukën mëti'ipë të mtsaatsy tyunyën, mëti'ipë të myajjatyën amu'ukyë ja'ayën; ka'ap nijëna'a xy'ëk'uknëty tääpë nëë mëti'ipë ja ntsip n'äkës myëët'ajtypyën.

²³Yë'ëjës nmo'ojäämpy yë ja'ayëty mëti'ipë ëxëëk të mtunyën, mëti'ipë ijty m'ënëmaayëpën: Xii naaxkëjxy nekyo'okët, wä'änës jam nkëxye'eytyë; ets ojts mnäkyo'okyë tää myaj'ate'eny myajtukte'eny naaxwayën.