Read Biblia Mixe de Quetzaltepec Isaías 52 Bible Online

Isaías 52 - Biblia Mixe de Quetzaltepec bible

Isaías 52

¹Ëkma'aywyij, ëkma'aywyij, mijts Sión Kajpn, jotmëk näpyëjkta'akët. Jerusalén kajpn, ja wa'ats kajpn, näxyoxët mëët ja oywyit; jä'ä ko ja ëxëëk ja'ayëty ka'ap jam jatëkok tyëkëja'antë ma mijtsën.

²Jerusalén kajpn, pëtë'ëk, näwyinxitët ets mnaaxwäätsëty ma ja kutujktaknën. Sión kajpn, ma mijts myajpaatyën tä tu'uk to'oxy ëna'kën tsumpyë matsypë, näyo'käjtu'utët, ëxmajtsnë yë mkepy mëti'ipë mtëytyuunëpën.

³Jä'ä ko yë Wintsën jëtu'un y'ënä'äny: Ëjts nitu'kjënu'unën të nka'ëxajës ko ojts myajnitooktë, tyam nän nitu'kjënu'unën kyatsokyë ets nyaj'ëwaatsëpëtsëmtëty.

⁴Yë nkajpnës jap ojts tëkok nyijkxy Egiptë ets jap tsyënaaytyë jaaypyo'kxyjyä'äyën; ok yë Asiria ja'ayëty ëxëëk tyuunëtë.

⁵E tyam, ¿tiijës n'ijxyp? Nanëkookyëjxm yë nnaax nkajpnës të tyajnëjkxtë tsumy matsy jap Babilonyë. Mëti'ipë ëxëëktuun tsaatyuuntëpën amëj akëjxm, xyontë y'itë ets janaam jatsojkës xyajjoot'anpëktë.

⁶E pyatäämpy ja xëëw jëmëjt ma ja nnaax nkajpnës nijawëtëty ets tja'akyukëtëty ko maas nWintsën'atyën xëmës të njanikäjpxy.

⁷Janty oy janty tsuj yaj'ixy yë ja'ay mëti'ipë oy aaw oy ayuk myëmiinpy yajmiinpyën tunjotypë kopkjotypë, mëti'ipë nyikäjpxypën ko ka'ap y'ëkjää'atanë jëën tsip, mëti'ipë nyikäjpxypën ko pyaatantëp ja ja'ay ja ëwaatsëtuuy'ajtën ets t'ënëmaay ja Sión kajpn: Yë mWintsën, yë'ë yajkutujkpë'ajtp.

⁸Mëtow wi'ix ya'axtën jyoktën ja mkëwent'ajtpëtëjk ets akujk jotkujk ni'ëmukë tukyaax tukjokëtë ko tëë ja'ay myëta'aktë, jä'ä ko tëë kë'ëm timy'ixtë wi'ix ja Wintsën të wyimpityën jam Sión.

⁹Tukyaax tukjokëtë ko të mmëta'aktë, mijts Jerusalén kajpn ma axit ako'owë të myajpaatyën, jä'ä ko tëë yë Wintsën tpa'ëyoy yë nyaax kyajpn ets tëë tyaj'ëwaatsëpëtsëmy yë Jerusalén kajpn.

¹⁰Tëë ja naax kajpn tnija'awëtya'atë wi'ix ja Wintsën ja myëj'ajtën të tyaj'ixyën. Jëkämpaat ets naaxwiinyëtë apëtsëmy yajnijawë ko ja Wintsën të xyajnitsokëmë.

¹¹Tso'onta'atë, tso'onta'atë jam ni'ëmukë Babilonyë, këtii nëkoo tii xy'ëktuuntëkooynyëtë, pëtsëmtë jam Babilonyë. Wa'ats mnäyaj'itëtëty miitsëty mëti'ipë mënëjkxantëpën yë Wintsën y'apëjk y'atu'unën.

¹²Je'eyëp ko këtii janty jëtu'un mtimy'ëtë'ëts mtimy'ëna'antëty jëtu'un tä ja'ay kye'ekyën, jä'ä ko yë Wintsën yë'ë mmajts'itanëtëp oy muum mnëjkxtëty.

¹³Ja ntuunpës oy ja tyuunk wyimpëtsëma'any; mëj'äämpy y'ita'any ets kumay nyaxa'any.

¹⁴Jëtu'un ijxtëm mayjyä'äy pya'ëyoowën ko ojts ja wyiin jyëjp tyëkajtstaaynyë ko y'o'knë ets ka'ap y'ëkyajja'ay'ijxnë,

¹⁵jëtu'un nëjkx may ja naax kajpn mëj'äämpy pyëjktä'äkyë ets nëjkx mëj'ixy t'ixtë; Ja yajkutujkpëtëjk ka'ap nëjkx wyinma'anypyaatë wi'ix tnimëtya'aktëtyën jä'ä ko nëjkxëp tja'akyukëtë ets twinmëtowtë mëti'ipë ënäty ka'ap nijëna'a të tmëtowtën.