Read Biblia Mixe de Quetzaltepec Isaías 54 Bible Online

Isaías 54 - Biblia Mixe de Quetzaltepec bible

Isaías 54

¹Akujk jotkujk tim ya'ax tim jok, mijts to'oxytyëjk ka'apë u'unk maay xymyëëtëtyën, ka'apë u'unk maay tjëkyepy tyaja'tëtyën; ëw ya'ax mijts ko ka'ap nijëna'a u'unk maay të xyajminy të xyajja'tyën naaxwiiny, jä'ä ko yë Wintsën jëtu'un yajkutujkpy: May ni'ik u'unk maay tpaata'any t'ixa'any ja to'oxytyëjk mëti'ipë atu'uk moonp tujkpën këtiinëm mëti'ipë jamën yë nyiye'etyëjk.

²Yajmëjë yë m'ijtakn, yajkëjääjë yë mtsënaaytyakn; jëjptsumë yë mtejpxy, ta'tspëky nikupë,

³jä'ä ko mijts anajny aka'any mkëjääjëja'any; yë m'u'unk m'ok nëjkxëp ja naax kajpn may tniwa'aktë ets nëjkxëp twintsëna'ayëtya'atë yë it naaxwiinyëtë mëti'ipë tyam aanë'ëk tëëtsë'ëk yajpatpën.

⁴Këtii mtsë'ëkëty, ni pën mkatukxi'ikëtëty; ka'ap pën m'ojëtëty ets ka'ap pën myajtsëtyunëtëty. Nëjkxëp xyjyä'äytyëkooytyä'äy mëti'ipë ënäty të xytyuktsëtyunyën ko m'ëna'k'ajty, ets ka'ap nëjkx xy'ëkja'amyäjtsnë ko ënäty ëxëëk të mjaty të mkëpety ko mku'o'kë,

⁵jä'ä ko ja mëti'ipë ojts myajkojyën, yë'ë mpëkan m'uukanëp. Jä'ä xyëëwajtyp Wintsën mëti'ipë maaytyääyëpën winë, ja wa'ats Tios mëti'ipë yë Israel ja'ayëty y'ëwtajtëpën, mëti'ipë Tios'ajtpën ma tëkokyë naaxwiinyëtë ja'ayën.

⁶Mijts jëtu'un ojts mjaty mkëpety tä tu'uk to'oxy'ëna'k yajnike'ekyën mëti'ipë naanpëkën, e yë Wintsën yë'ë jatëkok të mmëkäjpxyë ets të m'ënë'ëmxëty:

⁷Wäänë nätyu'uk n'ëxmajtskojy, nwowäämpy jatëkok mëët tu'uk ja oy jot oy winma'any ets tu'ukyë n'ijtmëty.

⁸Koos yë joot'an xytyuktëjkëy poj'am, ojts nkuke'eky ets nwinwa'ktuty, e mëët ja tsojkën ja'awën xëmëkyëjxmëpë ojts jatëkok npa'ëyoy. Jëtu'un ja Wintsën y'ënä'äny, mëti'ipë yaj'ëwaatsëpëtsëëmpën.

⁹Jëtu'un tääjës n'ënëmaayën ja Noé, ko ja mëk komtuu nyäjxy, ko ka'apës nijëna'a n'ëkyajtu'ujanë naaxwiiny naaxkëjxy. Jëtu'un tyam nikäjpxyës ko ka'ap nijëna'a mijts n'ëktukjoot'anpëkanë ets ka'ap n'ëkëtsu'ux ya'axanë.

¹⁰Oy ja tun kopk wya'ktëkatsëty, ets jyitëty, yë ntsojkënës nja'awënës ka'ap tyëkatsa'any ets nkäjpxytyu'unënës ka'ap kyëxa'any nyaxa'any. Yë'ë jëtu'un Wintsën ënaanp mëti'ipë mpa'ëyoowëpën.

¹¹Mijts naax kajpn ka'apë mjotkujk'atyën, ma ëxëëk mjaty mkëpetyën mëët ja mëktuupoj, ma ka'ap pën mniminyën ets jeexyë myajjotkujk'atyë. Ëjts n'oytyunäämpy yë mtëjk, yë'ëjës ntuk'ëjx'atäämpy yë juuntsaa; ets tsuxktsaajës ntukpojtsë'ëkäämpy;

¹²ma tsaajën mëti'ipë yajtijpën rubí jamës yë mëjpotsy npojtsë'ëka'any mëti'ipë pya'tänëpën ja mtëjk, ets mtëjk'akaj yë'ëjës ntukpa'tänëjäämpy yë berilë tsaa, ets mnapotsy yë'ëjës ntuk'oytyunäämpy yë oyëtypë tsaa.

¹³Nëjkxëp yë m'u'unk m'ëna'k nyaj'ijxpëjkta'atës ets aak jotkujk nëjkx y'itë.

¹⁴Ja mëtëypyë ja nipaye'eyën yë'ë nëjkx myajjotmëktä'äkyë, ka'ap nëjkx ëxëëk mjaty mkëpety ets ka'ap nëjkx mtsë'ëkë mjawë, ja tsë'ëkë ets ja amay jotmay nëjkxëp mkukäkta'ayë.

¹⁵Ko pën mnipëtë'ëkëtëty, ka'ap ënäty y'ëjtsëty të ntuknipëjktaakë, mijts nëjkx mmëtä'äky.

¹⁶Ëk'ixtë, ëjts të nyajkojy yë pujxn oytyuunpë, mëti'ipë jëën yajmëjëpën ma jëëntooytyaknën mëti'ipë yajkojpyën yë tëypyujxn ets ja'ay tuktsiptuny; e nän ëjts yë ja'ay të nyajkojy mëti'ipë winë yajma'tääpyën ets xit ko'ow winë tuunta'ajëty.

¹⁷Je'eyëp ko ka'ap ni pën myäyë tyajkojëty ja tujn pujxn mëti'ipë jeexyë mijts myaj'atëkooyëpën. Aak amonyë nëjkx ja'ay xyajwë'ëmta'ay mëti'ipë ënäty mni'ë'ënëyëpën. Nyajmëtäkpyës ja ja'ay mëti'ipës oy xymyëtuunpën. Jëtu'un ja Wintsën y'ënä'äny.