Read Biblia Mixe de Quetzaltepec Isaías 56 Bible Online

Isaías 56 - Biblia Mixe de Quetzaltepec bible

Isaías 56

¹Jëtu'un ja Wintsën y'ënä'äny: Tuntë ja mëtëypyë ja nipaye'eyën, ja mëti'ipë tëy jaantyën, jä'ä ko tsojkës nyaj'ëwaatsëpëtsëma'any ja naaxwiinyëtë ja'ay; yë'ëjës nyaj'ixanëp koos xymyääpyës wi'ixës ja'ay nyaj'ëwaatsëpëtsëmëtyën.

²Jotkujk ja'ay yajpaaty mëti'ipë pyanëjkxypyën ya'atë tëyajtën ets mëti'ipë kyuuytyuunpyën tëy tëtä'äky, mëti'ipë po'kxpën po'kxënxëëwëtë ets ka'ap jää tii ëxëëk tuny tkäjpxy.

³Pën tu'uk jaaypyo'kxyjyä'äy näkyë'ëyajkëp ma Wintsënën, ka'ap tjëkyepy y'ëna'anëty: Ëjts ëpëkyës yë Wintsën xypyëjktä'äky ma nyaax kyajpnën. Ets ja'ay mëti'ipë të yaj'ixtsyaapëkyën, ka'ap tjëkyepy y'ëna'anëty: Ëjts jëtu'unës tä tu'uk të'ëts kepyën.

⁴Jä'ä ko yë Wintsën jëtu'un y'ënä'äny: Pën yë ja'ayëty mëti'ipë ixtsyaapëkyëtyën pyo'kxtëp yë po'kxënxëëw ets tyuuntëp jëtu'un winë ijxtëmës ntsokyën ets pën xëmë tja'amyätstë ja nkäjpxytyu'unënës,

⁵ni'ikës winë nmo'oja'antë këtiinëm jyëtu'unëty ko jeexyë ja y'u'unkëty y'ëna'këty tmëët'atë, ëjts nëjkx kë'ëm n'ënëëmëtë ko jap yë xyëëw wyë'ëma'antë tsajptëkoty xëmëkyëjxm ma potsywyiinën, etsës yë xyëëw nmo'oja'antë mëti'ipë xëmë yajtukja'amyätstëpën.

⁶Ja jaaypyaat jaaypyo'kxyëty mëti'ipë näkyë'ëyajkëtëpën maas ëjtsën ets xymyëtuuntëpës ets xytsyojktëpës; ënantëp koos xymyëtuna'antë, ka'ap wyi'ixëty, nëkoo ko tpo'kxtë yë npo'kxënxëëwës ets twinkutsë'ëkëtë ets mëk yajpaatë ma ja nkäjpxytyu'unënës,

⁷nyajminantëpës jam maas yë ntun nkopkën wa'atspë, jotkujk nyaj'ita'antës maas yë ntëjkën. Nkupëkäämpyës yë wyintsë'kënëty no'okpyë xämpyë ets ja wiinkëtypë ja wintsë'kën, jä'ä ko yë ntëjkës jä'ä yajtija'any: tëjk ma Tiosmëkajpxk y'ityën mëti'ipë naax kajpn jyä'ä'ajtypyën.

⁸Ëjts nëjkx nyajmujkta'ay ja ja'ay mëti'ipë ënäty jam muum yajpatëpën wiink naax wiink kajpn tsumy matsy. Wintsën jëtu'un ënaanp, mëti'ipë të tuknipëjktaakën ets ja Israel ja'ayëty tyu'ukmujkta'atëty mëti'ipë të yajpaatën axit ako'owë.

⁹Miinta'atë ëwa'anjëyujkëty; yukjotypë mtsëënëtën, mëti'ipë tsyu'tstëpën ja tsajppax ets kupixyny,

¹⁰jä'ä ko ja ja'ayëty mëti'ipë ijx'ijtp këwent'ajtëpën, maas ja nnaax nkajpnën aak wiints të y'awinpijta'atë. Ka'ap tii t'ixtë; jëtu'un tä uk uumpën, ka'apë wyojyën; je'eyë mya'atë pyo'kxtë ets xyëëwma'atë, jëtu'un jyuuky'atë xëmë wiinkumaatë yowë.

¹¹Jëtu'un y'ëtëtsnëtë ukën ka'apë kyu'uxyën, ja këwent'ajtëp ja'ijtyëty je'eyëp ko ka'ap nijënu'un jyä'äkyukëtë; këëk tu'u tjantyye'eytyë, aakyë'ë pyajëtijtëp wi'ix myeenypyaatëtyën,

¹²ets y'ëna'antë: Ja'am nëë n'ixta'ayëmë ets aakyë'ë mëknëë mëti'ipë mukpën, yajxon nmuktëko'oyëmëty. Näyjyëtu'un jëpom jatëkok tä tyamën, ëkë wä'än jaakni'ik.