Read Biblia Mixe de Quetzaltepec Isaías 6 Bible Online

Isaías 6 - Biblia Mixe de Quetzaltepec bible

Isaías 6

¹Jä'ä jëmëjt ma ja yajkutujkpë Ozías y'o'kyën, jääjës ojts yë Wintsën n'ixy kuma'ayjoty; jamtëm y'u'unyë ma ja yajkutujktaknën. Jam këjxm ets janty'oy janty tsuj jam, ja wyit janty yonytyëm, jä'ä wa'ats të tyajnitujkta'ay ja tsajptëjk.

²Jam pyë'am jamtëm näjyëtu'un yajpaatë ja Wintsën ja kyukäjpxy, kujkyë tyänëtë, tëtujk yë kyäkn, tëkëëk tu'kpa'ajaty: mäjtsk tuk'ëtuktë ja wyiin jyëjp, mäjtsk tuk'ëtuktë ja pyuuy ets mäjtsk tukääkjëtitë.

³Ets xim yam nyäy'ëna'anëtë: Wa'ats, wa'ats, wa'ats ja Wintsën mëti'ipë maaytyääyëpën winë; ujts ja naaxwiinyëtë yajpaaty mëët ja myëj'ajt y'oyajtën.

⁴Ko ja mëto'owën jëtu'un të yajmëtoowpaaty, ënät ja tsajptëjk të tyëkë yu'kxypyë ets të tyuktujkta'ay mëët ja jok.

⁵Ënätës të njootwinmay: Janty mon janty tukës nyajpaaty, yaajës ënät n'o'knëty, ëxëëkës të n'ëy të nkäjpxy ets jamës ntsëënë ma ja ja'ay ëxëëkjaty kyajpxtën myëtya'aktën.

⁶Ënät tu'uk ja Wintsën ja kyukäjpxy të xynyiminyës, jëënën të myëjke'eky maas ëjtsën. Tamtëm jëënpajk tmëëtëty, jam të tpëjkë'ëk ma ja wintsë'këntyaknën mëët yë pujxnmä'tn

⁷etsës të xytyuk'akoonë'ëky, täätsës të xy'ënëëmë: Ëk'ix ya'atë jëënpajk të ntuk'akoonë'ëkyën yë'ë mëti'ipë mpoky të tyajwa'atsyën. Tëë yajnime'kxy ja m'ëëwtëko'oyën mkajpxtëko'oyën ets ja ëxëëkpë tsaatsypë tëë ja m'ëxmatsyë.

⁸Ënätës tu'uk ja aaw yo'kn të nmëtoowpaaty mëti'ipë ja Wintsën jyä'ä'ajtypyën ets y'ënä'äny: ¿Pënës ënät nkäxëp? Etsës të n'ëtsoy: Tyaajës ëjts, ëjts käjxk.

⁹Täätsës të xy'ënëëmë: Nëjkx yë naax kajpn ënëëmë: Ko oy jënu'un tii tjamëtoow'itëty, ka'ap tja'akyukëja'antë; oy jënu'un tii tja'ixtëty, ka'ap t'ijxkukëja'antë.

¹⁰Jëtu'unyë ja naax kajpn nëjkx xyajwinkumon xyajjotkumonë, wiinkutsum wiinkumotsëpën nëjkx yajpaatë ets ka'ap nëjkx jyä'äkyukë, oy tii tja'ix tjamëtowtëty, ka'ap nëjkx t'ijxkuk tja'akyukëtë.

¹¹Ënätës ja Wintsën të n'ënëëmë: Wintsën, ya'atë yam xynyikäjpxyën, ¿jekyën jëtu'un y'ita'anyë? Täätsës të xy'ëtsoy: Koonëm ja naax kajpn kyutëkooytya'atëty ets jäänëm ma ënäty ka'ap nitu'uk ja ja'aynyën; tëë ënäty ja jëën tëjk tyukwatsta'ay, ets tëë ënäty ja kam tu'u y'awinpijta'ay anë'ëk tëëtsë'ëk,

¹²ko ënäty ja kunaax kukajpn të yajmënëjkxta'atë wiink naax wiink kajpn tsumy matsy, ets ko ënäty ja kajpn tukwa'ats të wyi'imy.

¹³Oy ja ja'ay ënäty jyaak wë'ëmtë jam kajpntum, nëjkxëp ja kyutëkoytyë näjyëtu'un, nëjkxëp jëtu'un jyäty tä tu'uk ja kepy yajwinpujxta'ayën yë y'ääy xye'enty tääts yi'iyë kepy kyopk jyaak wë'ëmy. E ma tääpë kepykyopkën, jamts ja jyi'tsk ok pyëtsëma'any.