Read Biblia Mixe de Quetzaltepec Isaías 60 Bible Online

Isaías 60 - Biblia Mixe de Quetzaltepec bible

Isaías 60

¹Pëtë'ëk mijts Jerusalén kajpn, nätyukwinpitët ja jajën të'kxën, jä'ä ko tëë ënät mnija'tyënëm ja të'kxën jajën, ets ja Wintsën ja myëj'ajt y'oyajtën yë'ë mkutë'kxëp.

²Nituky ja naaxwiinyëtë y'ity mëët ja kootsajtën, nijuuxy ja naax kajpn y'ity ko kyootsëty; e yë Wintsën yë'ë mkutë'kxanëp ets ma mijtsën jam ja myëj'ajt y'oyajtën nyikëxë'ëka'any.

³Nëjkxëp ja wiinkëtypë ja naax kajpn tnimintë ja mtë'kxën mjajën, ja yajkutujkpëtëjk nyiminantëp ja mxëënyajtën.

⁴Ijxë'ëk koowë'ëk ets ijx'ëwtit mwintuuy mpë'aay: Aak tu'ukmujktaaynyëtëp yë ja'ayëty ets mnimiinëtëp. Jëkämpaat muum ja m'u'unk ëna'k tsyo'onëtë; ets ja mnëëxëty jëtu'un myintë tä jeexyë yajtsään yajkontën.

⁵Mijts, ko ënäty jëtu'un xy'ixy nëjkxëp mxoontä'äky ets jotkujk nëjkx mnäjyawëty. Jää nëjkx ja naax kajpn mëti'ipë yajpatëpën mejy pë'aay mtukniminyë ja wit meeny ets ja näypyutëkë.

⁶Yajxon xy'ixëty nimay myintë ja jëyujk jëku'uxëty mëti'ipë tso'ontëpën Madián ets Efá; miinta'ajantëpë Sabá ja'ayëty, myëminantëp yë pu'ts pujxn ets poom, ets tmëjjawëja'antë yë myëj'ajt y'oyajtën yë Wintsën.

⁷Tu'kë'ëyë tsajppaxëty kupixynyëty jampë tyänëtën Quedar, aakmijts mjä'ä'atäämpy; yë kupixyny ayääkë jampë myäytyänëtën Nebaiot, aakmijts nëjkx xyajtuny ets Wintsën xytyukwintsë'ëkëty ma ja wintsë'këntyaknën ets oy xyuukëty jyokëty, jëtu'unts yë tsyajptëjk janty'oy ni'ik kyëxë'ëkëty.

⁸¿Pën tääpëty mëti'ipë pojjëtijtëpën yoots nëma'ajën, mëti'ipë nëjkxtëpën jëtu'un tä pak nyijkxyën ma y'ijtaknën?

⁹May kepy nëëwinye'epyë miintëp, mëti'ipë tso'ontëpën Tarsis, yë'ë tsyëëmiintëp yë m'u'unk m'ëna'k, mëët yë poop pujxn ets pu'ts pujxn, ets tukwintsë'ëkëja'antë yë mWintsën, mëti'ipë wa'ats Tios'ajtpën ma Israel ja'ayëtyën, mëti'ipë myajmëjnajxëpën.

¹⁰Wiink ja'ay nëjkx ja mkajpn nnapotstë, ets wiink yajkutujkpë nëjkx mmëtunyë; oy yë Wintsën të m'ëk tukjoot'anpëkyë, tyam mtsojkëp ets mpa'ëyoowëp jatëkok.

¹¹Ëwa'ats xëmë mtëjk'aaw y'ita'any, jëtu'un y'ita'any xëëny koots ets tyëkëtëty yë ja'ayëty mëti'ipë myëmiintëpën yë näypyutëkë ets nyaxtëty yë yajkutujkpëtëjk mëët yë jyä'äy.

¹²Ja naax kajpn mëti'ipë ënäty ka'ap mëtunyën, nëjkxëp kyutëkoy; yë'ëpaat mëjëtypë naax kajpn kyutëkoyä'äny.

¹³Jëtu'un yë Wintsën t'ënëmaay yë Jerusalén: Jam yë mwit meeny tsyoona'any Líbano: Oykyepy, tsiin kepy ets ajë kepy mëët yaj'oytyunëty yë ntsajptëjkës, ets oy kyëxë'ëkëty maas nnajtswa'akëja'anyën.

¹⁴Ja ja'ay ja y'u'unk y'ëna'këty mëti'ipë ëxëëk të mtunyën, nëjkxëp mniminyë ets mwintsë'ëkëja'anyë; tëkokyë mëti'ipë ka'ap të mëj ixyën nëjkxëp mniminyë ets mwinkoxtänëja'anyë, ets nëjkx mtijyë ja Wintsën ja kyajpn, ja Sión mëti'ipë ja Wintsën jyä'ä'ajtypyën, ja wa'ats Tios mëti'ipë jam yajpatpën ma Israel ja'ayëtyën.

¹⁵Ka'ap nëjkx naspëk nastunë m'ëk ijnë ets ka'ap nëjkx pën m'ëk ëxëëk'ijxënë; nän ka'ap nëjkx nätyu'uk m'ëkmoon m'ëktujknë, ëjts mijts nyaj'itäämpy xëmë, tsuj xoontä'äky ets jotkujk nëjkx y'itë ja m'u'unk m'ok.

¹⁶Nëjkxëp ja naax kajpn myajkay myaj'uukyë, ets mtukniminanëp ja yajkutujkpëtëjk ja wit meeny; täänëm nëjkx xy'ijxpaaty ko ëjts Wintsënajtp, ets yajnitsokp, ëjts xymyääytyääpyës winë, mëti'ipë Jacob jyotmëk'ajtypyën, ets ko ëjts yaj'ëwaatsëpëtsëëmp.

¹⁷Yë'ë nmo'ojäämpy yë pu'ts pujxn tä jeexyë tsyuxk pujxnëtyën, poop pujxn nmo'ojäämpy tä jeexyë jyuunpujxnëtyën, tsuxkpujxn nmo'ojäämpy tä jeexyë kyëpetyën, juunpujxn nmo'ojäämpy tä jeexyë tsyaajëtyën. Ëjts kë'ëm ntuknipëjktaakëjäämpy ets yë'ë m'ënä'ämëtëty ja jotkujk'ajtën, ets mtu'uwinye'eyëtëty ja tëyajtënpë.

¹⁸Ma mnaax mkajpnën ka'ap nëjkx nijëna'a y'ëkyajmëtoownë jëën tsip, ka'ap nëjkx naax kajpn y'ëkkutëkooynyë ets xit ko'ow y'ëkjajnë; jä'ä nëjkx ja mpotsy yajtijy yajnitsokpë ets ja mtëjk'aaw mëjpëjktakën.

¹⁹Mijts ka'ap nëjkx xyajmëyäty mxëëw ni'anëty, ëkë po'o koots mkutë'kxëtëty, jä'ä ko mijts kë'ëm ntimkyutë'kxäämp xëmë; ëjts mëti'ipës Tios'ajtpën, ëjts mijts nkutë'kxäämpy.

²⁰Ka'ap yë xëëw kyëta'aka'any ets po'o ka'ap tyëkoy'ita'any, jä'ä ko, mëti'ipë mWintsën'ajtypyën xëmë nkutë'kxa'anyë; ja mmonyë mtukyë ko ënäty pën të y'ooky këxaanp naxaanp jä'ä.

²¹Tëkokyë ja ja'ay mëti'ipë kukajpnajtëpën ma mnaax mkajpnën, aak oyjyä'äy y'awinpita'antë, kunaax kukajpn xëmë y'ita'antë ma kyë'ëmkajpnëtyën, ets yontëty jyiitstëty tä aay ujtsën mëti'ipës të nkojyën, mëti'ipës të nitunën, ets jëtu'un nyaj'ixa'anyës ja nmëj'ajt n'oyajtënës.

²²Ya'atë tyam tu'k'nuuky yaj'ixyën, mil'am y'awinpita'any; mëti'ipë tyam niwäänë yaj'ijxtëpën, mëj kajpn y'awinpita'antë. Ëjts jëtu'un Wintsënajtp, ëjts nyajkutukäämpy ets tsojk jëtu'un tyunëtëty jyatëtëty, ma ënäty ja nyixëëw të tpaatyën.