Read Biblia Mixe de Quetzaltepec Isaías 7 Bible Online

Isaías 7 - Biblia Mixe de Quetzaltepec bible

Isaías 7

¹Ja yajkutujkpëtëjk mëti'ipë xyëëwajtëpën Resin, Siria ja'ayëty ets ja Pecah, Israel ja'ay, yë myaank yë Remalías; ojts tjanitëkëtë tëkok yë Jerusalén kajpn, je'eyëp ko ka'ap ojts myëta'aktë. Jää ojts jëtu'un tyunyë jyätyë ma ënäty yajkutukyën yë Acaz, yë Jotam yë myaank, yë Ozías y'ok'u'unk, mëti'ipë jam Judá yajkutujkpën.

²Jää jëmëjt ojts ja aaw ayuk tukninëjkxtë ja yajkutujkpë Ahaz ma ja jyëën tyëjkën, jëtu'un t'ënëmaaytyë: Yë yajkutujkpëtëjk mëti'ipë Siria ja'ayëtyën tëë käjpxytyu'unën tuntë mëët yë Efraín ja'ayëty. Tä ja yajkutujkpë tyëjkëy tsëyuuypyë mëët ja nyaax kyajpn ijxtëm aay kepy tsyëtyuyën ko pyojyu'kxy.

³Ënät t'ënëmaay yë Wintsën ja Jeséas: Nëjkx timtyämyë mëët yë mmaank mëti'ipë xyëëwajtypyën Sear-jasub ets nëjkx mnäpyäätyë mëët yë Ahaz jam ma ja nëë nyipetyën, jam anëkëjxmtsow,

⁴ets xy'ënëëmëty: Mnäkyëwent'atëtëp, je'eyëp ko këtii mtsë'ëkëty ets këtii xyajtëkatsëty yë mwinma'any ko xy'ixëty yë tu'ts nyitoy.

⁵Tëë tkäjpxy'atë ko ëxëëk myajtuna'any. Yë Siria ja'ayëty mëët Efraín ja'ayëty ets Remalías y'u'unk, jëtu'un të y'ëna'antë:

⁶Tsojk ninëjkxëmë yë Judá ja'ayëty ets n'atsë'k n'aja'awëmëty. Ko nmëmëtakmëty, tääts këëk kujkwä'kxy nyajwa'kxmëty ets npëjktakmëty yajkutujkpë Tabeel yë myaank.

⁷E ja Wintsën, jëtu'un y'ënä'äny: Nëkoopë mnäwyin'ëënëtë. Ka'ap jëtu'un jyata'any kyëpäta'any tä mja'ëna'antën.

⁸Jä'ä ko yë Siria ja'ayëty timjëtu'un yë tyu'unënëty kyajpxënëty tä yë Damaskë ja'ayëty y'ijtën, e yë Damaskë ja'ay yë'ë ënä'ämëtëp yë Rezin; e yë Efraín ja'ayëty je'eyë jyaak juuky'ata'antë ja tëkë'px mëkoxk jëmëjt tääts ja nyaax kyajpn kyutëkoya'antë.

⁹Yë Efraín ja'ayëty Samaria nikopk'ajtëtëp, yë Samaria ja'ayëty Remalías nikopk'ajtëtëp. Pën miitsëty ka'apës yë n'aaw n'ayuk xymyëpëjkëtë, tyam yajxon ntimy'ënëëmëtë ko nëjkxëp mkutëkooytya'atë.

¹⁰Ojts näjyëtu'un yë Wintsën t'ënëëmë yë Ahaz:

¹¹Amëtow yë mWintsën ets tyaj'ixëtëty yë myëj'ajtën, yë'ë mtuk'ixëp ko myëët'ajtyp yë mëk'ajtën tsajpkëjxm ets naaxpa'tkë'p.

¹²Ënät ja Ahaz y'ëtsooy: Ëjts nitiijës yë Wintsën nka''amëtowa'any ets ka'ap tjëkyepy nwinma'any'ixëtyës.

¹³Ënät ja Jeséas y'ënäny: Miitsëty jënu'un ja David xymyëku'uk'atën, mëtoow'itë ya'atë ja aaw ayuk, miitsëty mëti'ipë David m'u'unk'ajt m'ok'ajtëtëpën. Miitsëty ka'ap yowë mtimkyu'uxëtë nijënu'un ko ja mjëëky mmëku'uk je'eyë xyajjotkëxtë ets xymyëmayëtë, yë'ëpaat yë Tios xymyëma'ayënëtë.

¹⁴Yë Wintsën yë'ë kë'ëm yakäämpy yë ijxpäjtën: tu'uk ja to'oxytyëjk tyajmëxu'unk'ata'any ja u'unk maay, ets tyajxëëwpäta'any Emanuel.

¹⁵Ma ënäty yeeky pyetyën ja pi'k ëna'k, yë'ë jyë'kxäämpy yë tsi'tsknëë ets uuxpa'ak.

¹⁶E ka'anëm ënäty ja pi'k ëna'k yajxon wyinma'anytyëkënëm ko ja mäjtskpë ja kajpn wyë'ëma'antë tukwa'ats mëti'ipë tyam yajtsë'këtëpën.

¹⁷Yë Wintsën yajminäämpy ja xëëw jëmëjt mëti'ipë ka'ap nijëna'a yaj'ixynyëmën maju'unëm yë Efraín nyäpyuwa'ktu'utyën mëët yë Judá.

¹⁸Yë Wintsën jëtu'un tyajmina'any ja mayjyä'äy tä maypyujtpë ëkë may cerë jëyujk muum jyä'tyën, jap tyajtsoona'any Egiptë ets Asur.

¹⁹Aak jap nëjkx kyukäkëtya'atë muum wokjoty, aankjoty, ujtsjoty, äpnyoty, ets jam muum ma aayjëyujk ujtsjëyujk nyëë'uuktën.

²⁰Nëjkxëp ja Wintsën tyajtuunkpaaty ja Sirië yajkutujkpë, jëtu'un tyajtuna'any tä tu'uk yë tsujknën mëti'ipë jëkäm tso'onpën, jamtsow y'ëwtita'any Éufrates ets yajnijäpa'antë yë Israel ja'ayëty, yajjäjpta'ajaanp yë kyëpajkëty, y'awaayëty ets o'ktëy yajpëjkta'aka'antë.

²¹Jä'ä xëëw, ja ja'ay mëti'ipë jam tu'uk ja tsyajpkaajën ets nän nimäjtsk ja kyupixyny;

²²may ja tsi'tsknëë tmëët'ata'any ets nëjkxëp tukkay ja Kesë. Mëti'ipë ënäty të wyë'ëmtën nëjkxëp ja tsi'tsknëë ets ja uuxpa'ak may tjë'kxtë.

²³Jä'ä xëëw, ja kam tu'u mëti'ipë myëët'ajtypyën tu'uk mil yë tsatsymyon, mëti'ipë tsoowpatpën tu'uk mil ets yë'ë poop pujxn meeny; jä'ä y'awinpita'any äpnyjyot ets aayjyot pejyjot.

²⁴Ma tääpë kajpnën ënät nëjkx jam pën tyëkë pën myënëjkxyp yë tyi'pxn ets kyu'umën, jä'ä ko ja naax kajpn äpnyjyot ets pejyjot y'awinpita'any.

²⁵Ma ja naax kamën ma ijty ja ja'ay tyajtën jyääptën mëët yë pujxn jä'pn, ujtsjot, äpnyjyot nëjkx y'awinpity ets ni pën nëjkx jam kya'ëktëjkënë, je'eyë nëjkx wyä'äny jëyujk tënaaytyakn, tsajpkaatënaaytyakn.