Read Biblia Mixe de Quetzaltepec Isaías 8 Bible Online

Isaías 8 - Biblia Mixe de Quetzaltepec bible

Isaías 8

¹Jëtu'unës ja Wintsën të xy'ënëëmë: Jam tu'uk yë kepy xy'ixta'ajëty, tu'kpuxyën ets jam xykyëxja'ajëty Maher-salal-hasbaz. Mëjjatyëty xyjya'ajëty ets yaj'ixkapëty.

²Yë'ë m'ënëëmëp yë teety Urías ets teety Zacarías ets t'ixtëty mëti'ipë ënäty mjääpyën.

³Kom ok ojts ja nto'oxytyëjkës nmëët'atyës, mëti'ipë käjpxynyajxpë'ajtpën ets ojts u'unk mëët wyi'imy, jëtu'un tyajmëxu'unk'ajty tu'uk yë ye'etyëjk. Tääts ja Wintsën xy'ënëmaayës: Jä'ä xyajxëëwpätëty Maher-salal-hasbaz.

⁴Jä'ä ko ka'anëm ënäty kyajpxë'ëkynyëm ko nëjkx yajnitëkë yë Damaskë kajpn ets Samaria kajpn; tëkokyë mëti'ipë ënäty jap kajpnjoty yajpatpën, ja Sirië yajkutujkpë nëjkx tmënëjkxta'ay.

⁵Ënätës ja Wintsën xyjyaak'ënëmaay:

⁶Mëët ko ja naax kajpn ka'ap ja nëë të tkupëky mëti'ipë jam najxpën Siloé, mëti'ipë ja kajpn tyukye'eynyäjxypyën, jä'ä të t'oyjyawë ja Rezin ets ja myaank ja Remalías.

⁷Yajnikoompätäämpy yë Wintsën tääpë kajpn mëët yë komnëë mëti'ipë jam tso'onpën Éufrates. Yë'ë y'antijpy yë Asiria yajkutujkpë mëët tu'kë'ëyë myëk'ajtën. Nyijä'tstëkoyäämpy ja nëëtu'u ets jëtu'unyë ja nëë ye'eywya'kxa'any.

⁸Jëtu'un jam Judá jya'ta'any, tyimku'tëty jëtu'un yo'kntuuy. Ets nyäwya'kxa'anyë ets tyajwintujktaja'any ja mnaax mkam, Emanuel.

⁹Nämyukëtë naax kajpnëty, këtii yë'ë xytyukjotkujk'atëty jëën tsip, tsë'ëkëtë jawëtë; ja'akyukëtë ya'atë aaw ayuk miitsëty naax kajpnëty jëkämpë yajpaatën. Oy jënu'un mjatsiptuntëty ets mjamëta'aktëty, je'eyëm nëjkx mtsë'ëkëtë mjawëtë.

¹⁰Oy jënu'un tii xyjyatuknipëjktaakëtëty, ka'ap nëjkx wyintu'upëky; oy jënu'un tii xyatuna'antëty, ka'ap nëjkx tyunyë jyätyë, jä'ä ko ëëtsëty Tiosës mëët nyajpaatë.

¹¹Nkë'ëkëjxyës yë Wintsën të xytyimmatsy etsës të xy'ënëëmë ko ka'apës tääpë ja'ayëty mëpaat yë nyë'ë tyu'u npanëjkxë. Jëtu'un të xynyëëmës:

¹²Këtii xypyakajpxtëty tääpë naax kajpn ko y'ëna'antëty tsojk nikäjpxytyu'unën, këtii xytsyë'ëkëty mëti'ipë yë'ëjëty tsyë'këtëpën.

¹³Yë Wintsën mëti'ipë maaytyääyëpën winë yë'ë mëpaat yajtsë'ëkë, jä'ä ko wa'ats yë'ë ets yë'ë wyintuuy mëpaat'ajtp yajwintsë'ëkëty.

¹⁴Tä tu'uk ja o'ktaknën yu'utsypë jëtu'un nëjkx yajpaaty; tä tu'uk tsaajën mëti'ipë yajkunäjpëpën, jëtu'un nëjkx ja Israel ja'ayëty nyaxtë, jam nëjkx kya'atë ets y'ooktë yë Judá ja'ayëty.

¹⁵May nëjkx jam kyunäpëtë ets y'ooktëty, may nëjkx jam wyë'ëmtë ets ka'ap nijawëtëty tii tyuunta'aktëpën.

¹⁶Pëjkë'ëktë ma mjot mwinma'anyëtyën ya'atë aaw ayuk; jap mëët'atë yu'utsy ya'atë ijxpëjkën mëti'ipë yam miitsëty ntukni''ixëjantëpën.

¹⁷Oy yë Wintsën jyanäyu'utsyë ma Jacob y'u'unk y'okën, ëjts je'eyëmës yë'ë ntuk'ijxpety. Jä'ä ko ma yë'ëjën jamës yë njotkujk'ajtën npaaty.

¹⁸Ëjts ets mëëtës yë n'u'unk n'ëna'k mëti'ipës yë Wintsën të xymyo'oyën, jëtu'un ëëts nnaxtë tä tu'uk yë ijxpäjtënën mëti'ipë mëj'ajtën mëëtën ma Israel kajpnën, mëti'ipë yë Wintsën të tpëjktä'äkyën mëti'ipë maaytyääyëpën winë, mëti'ipë tsënääpyën ma ja Sión kopkën.

¹⁹Nëjkxëp ja'ay m'ënë'ëmxëtë: Yajtëwtë o'kpë ets najtsja'apëtëjk mëti'ipë amë'pxy kajpxtëpën ets ka'ap yajmëtoy wi'ixën y'ëna'antë. ¿Ëkë pën ënaanp ko ka'ap tjëkyepy tu'uk yë naax kajpn tyajnitëwëty yë tyios ëkë o'kpë anëmë wi'ix myintën ja xyëëw jyuukyajtën ja ja'ayëty mëti'ipë juuky'ajtëpën?

²⁰Wä'än jëtää jëtu'un y'ëna'antëty, je'eyëp ko ja mëti'ipë ënäty nyikajpxtëpën, aakjä'ä ka'apë tyunëtyën.

²¹Jëtu'unyë nëjkx ja'ay kyuye'ey kyunaxëtë, mëk nëjkx ja'ay yajtunëtë ets ayuu yajxëëwnaxëtëty, je'eyë nëjkx jyoot'anpëktë mëët ja yuu ets nëjkxëp tsyajp'ixtë ets tpoktë ja yajkutujkpë ets ja Tyiosëty.

²²Ko nëjkx jyanaxku'ixëtë, yi'iyë pyaatantëp ja monyëtukyë ets kupi'its kukoots wyë'ëma'antë.