Read Biblia Mixe de Quetzaltepec Isaías 9 Bible Online

Isaías 9 - Biblia Mixe de Quetzaltepec bible

Isaías 9

¹Ja ja'ay mëti'ipë tyam moonp tujkpën, ka'ap xëmë api'its akoots y'ita'any, jëtu'un ijxtëm ojts tëëyëp tëkok jyäty kyëpetyën ko jyajtë ma ja Zabulón ja y'itjot nyaaxjotmën, ets ma ja Neftalí näjyëtu'un ja jyä'äyën; nëjkxëp jatëkok jyotkujktä'äky jam ja tsëna'ayën juukyajtënën ma ja mejy yajninëjkxyën, ma ja Jordán y'itjotmën, ma ja Galilea nyaaxjotmën.

²Ja naax kajpn mëti'ipë ënäty api'its akoots yajpatpën, tëë ja të'kxën jajën tpaaty; ja kupi'its kukootspë ënäty yajpaatyën, tëë ja kyuxëëntyä'äky kyujajtä'äky.

³Wintsën, mijts të xyajminy të xyajkëtä'äky ja jotkujk'ajtën; mëj këjää ja jotkujk'ajtën tyam yajmëët'aty, janty jotkujk tyam ja ja'ay nyäyjyawëtë, jëtu'un tä jyää'atyën ja xoontakën ko ja pëjktä'äky y'ity wyintëy, ijxtëm xyoonta'aktën ja ja'ayëty ko ja wit meeny nyätyuknikääkëtë.

⁴Jä'ä ko mijts të xyajjëwä'äky ja nätyiytyunë, ja ëyo'owën jotëko'oyën ets ja monyëtukyë ma ënäty ja wintsëntëjkëty o'ktëy y'ëtë'ëtstën y'ëna'antën, ijxtëm jam Madián tëkok jyäjty kyëpejtyën.

⁵Ja kë'ëk mëti'ipë të tukye'eytyën ja tsiptuunpëtëjkëty, mëti'ipë të yajja'ay'ooktën, jëënjoty të yajkujëpijpëtya'atë ets jap të nyitoytyë.

⁶Jä'ä ko tëë tyam myiny jyä'ty tu'uk ja mëxu'unk ye'etyëjkpë, tëë tyäky ja Wintsën tu'uk ja u'unk maay mëti'ipë të yajmo'oyën ja mëk'ajtën kutujkën ets y'ënä'ämëty yajkutukëty, ets jä'ä nëjkx yajtijy: Kajpxwijpë mëti'ipë mëj këjää winë tyuunpy kyäjpxypën, mëk Tios, xëmëpë Tyeety'ätyën, mëti'ipë nyikopk'ajtypyën ja jotkujk'ajtën.

⁷Ets jam nyaaxwäätsa'any ma ja David ja kyutujktaknën; këjääjëjaanp ja y'ënä'ämën kyutujkën, ja jotkujk'ajtën ka'ap nëjkx nijëna'a kyixy nyäxy; ja kyutujkën ta'tspëky nëjkx yajpaaty, nëjkxëp tuny ja oypyë nipaye'eyën ets ja tëypyë jaantypë winë xëëw winë kyëjxm. Mëët ko yë Wintsën tmëët'aty yë tsojkën ja'awën, mëti'ipë maaytyääyëpën winë, paaty nëjkx jëtu'un tyunyë jyätyë.

⁸Tëë ja Wintsën tnikäjpxykyäxë yë Israel kajpn, ets Jacob yë kyajpn;

⁹tëkokyë ja Efraín ja jyä'äy mëti'ipë jam tsënaaytyëpën Samaria, tëë tmëtoowta'atë. Amëj akëjxm y'ëna'antë:

¹⁰Oy tëë jyaka'ay yë muutsy, tyam jatëkok n'akojëmëty ta'tspëky mëët yë tsaa. Tëë tjapujxtujkta'atë yë tëjkepy, oy kepy ënät npëjktakmëp.

¹¹Yë Wintsën të tuknipëjktaakë ets mmëtsip ëxëëk mtunëtëty ets myaj'ook myajtëkoyëtëty.

¹²Maatsow yë xëëw pyëtsimyën, Siria ja'ayëty jam miintëp; maatsow kyëtä'äkyën, filistejë ja'ay jam miintëp. Poj'am të yajmëmëta'aktë yë Israel ja'ayëty, jëtu'un tä ja'ay poj'am jyi'kxy tkujë'ënaxyën. E yë Wintsën yë tsyip y'äkë ka'ap nyäknyäxy.

¹³E ja naax kajpn, kajts të tmëj'ixy të tmëjpëjktä'äky ja Wintsën, oy jënu'un të jyatëytyunyë; nijënu'un të kyaja'ty wyinma'anyjoty ets jeexyë të t'ixta'ay ja näypyutëkë ma Wintsënën mëti'ipë maaytyääyëpën winë.

¹⁴Ënät ja Wintsën ja Israel kajpn jëtu'un të tuny tä ja'ay tu'uk yë jëyujk tpi'ixy pyujxtu'utyën ets kyëpajk tnëpujxë, ëkë jëtu'un tä ja'ay tu'uk yë kum kepy tpujxkëtayën ëkë tä aats muum tnëpuxyën. Ets tu'kxëëyë të tyaj'atëkoy.

¹⁵Ja këpajk, yë'ë ja mëjja'aytyëjk ets ja kopktëjkëty yaj'antijtëp, e ja pi'ixy yë'ë ja käjpxynyajxpëtëjk yaj'antijtëp mëti'ipë je'eyë antaktëpën.

¹⁶Ja tu'uwinye'eypyëtëjk tëë ja naax kajpn twoowtëkoytyë, ja naax kajpn mëti'ipë ënäty yajmëyäjtypyën ja tu'uwinye'epyë, tëë ja tyu'utëkoytyë.

¹⁷Paatykyëjxm ja Wintsën ka'ap të tpa'ëyoy ja ëna'ktëjk, ja ku'ooky u'unktëjk ets ja ku'ookytyo'oxy. Jä'ä ko aak ëxëëk ja ja'ay ja jyot wyinma'anyëty, aakyë'ë myääytyëp tyajtëp ka'apë mëpaat tuntën, ko kyajpxpëtsëmtë tsaatsy ma'atëty yajmëtoy. Paatykyëjxm ka'ap ja Wintsën ja jyoot'an xyeemy ets ka'ap tyajjëwä'äky ja tsyip y'äkë.

¹⁸Yë ëxëëktu'un ëxëëk kajpxën mëj këjää ëyo'onpëjktä'äky, jëtu'un tä patoyë jëënën, wa'ats tno'ktëkooytyä'äy aayjyot pejyjot ets aay kepy, ko wyimpapojy jëtu'un yaj'ixy pojxujtykyën.

¹⁹Mëët ja tsyip y'äkë ja Wintsën mëti'ipë maaytyääyëpën winë, tëë ja naax kajpn jyëënmatsyë, tam ja tyooytyëkoy; Yë'ëpaat ja y'u'unk y'ëna'k tsu'tsnëtë, ka'ap t'ëkpa'ëyoownëtë ja myëkä'äx, tam mëti'ipë yiin wään kääpyën ets ka'ap kyu'uxyë, tam ka'apë ninu'un tyimkayën.

²⁰Nitu'ukjaty yë ja'ay aak ëxëëkëm ja myëku'uk t'ijxnë mëti'ipë pa'atënaayëpën, janty jëtu'un tjajë'kxy tjapo'otsy mëti'ipë pyätypyën anajnytsyow, je'eyëp ko kä'äpyëm kyu'uxyë. Aak kyutsu'tsnëp ja ja'ay ja y'u'unk y'ëna'k:

²¹Ja Manasés ja'ay nyipëtë'knëtëp ja Efraín ja'ay, ja Efraín ja'ay nän nyipëtë'knëtëp ja Manasés ja'ayëty ets yë'ëjëty tëë näjyëtu'un tnipëtë'ëktë ja Judá ja'ayëty. Ja Wintsën kä'äpyëm jyotxeemy, je'eyëm ja ëyo'on jotmay tyajkëtä'äky.