Read Biblia Mixe de Quetzaltepec Levitico 1 Bible Online

Levitico 1 - Biblia Mixe de Quetzaltepec bible

Levitico 1

¹Ënät yë Tios ojts tmëkäjpxy yë Moisés jap ma ja wit tëjkën ma ja näpyaatë y'ityën ets t'ënëmaay:

²Mëëtmëtya'ak yë Israel ja'ayëty ets xy'ënëëmëty, koos pën xytyukniminëty yë jëyujk ets xymyo'oja'anëtyës tä tu'uk yë ayajk ako'onën, yë'ë xytyukniminëpës mëti'ipë tsyajpkaa'ajtypyën ëkë mëti'ipë kyupixyny'äjtypyën.

³Pën yë'ë tsajpkaa yakäämpy tä tu'uk yë wintsë'kënën, yë'ë yakëp yë oypyë mëkpë ets mëti'ipë kä'pxyën, jam tyaj'ookëty ma yajnitëkën yë wit tëjk ma näpyaatë y'ityën ets jam ja wintsë'kën tyakëty ets Wintsën tkupëkëty.

⁴Ets tkëxkonëty yë kyë'ë ma ja tsajpkaa ja kyëpajkën jëtu'un yajkupëkëty, mëti'ipë ënäty tyukunaxäämpyën ja nyëë pyoky.

⁵Jam Tios wintum jam ja tsajpkaa tyo'kumëty, ënät ja Aarón ja y'u'unk y'ëna'k mëti'ipë teety'ajtëpën tyaktëty ja tsajpkaa ne'pny ma Tiosën ets ënät ok txijkxjëtitëty ma ja wintsë'këntyakn ja pya'ajën, mëti'ipë jamën ma ja wit tëjk yajnitëkën, mëti'ipë Tios tyëjk'ajtypyën.

⁶Pën tu'uk yë tsajpkaa yäjkpy nino'oky, nyëtsujktaayëp ja nyi'ak ets ja nyitsu'uty yajxon tsujkta'akëty.

⁷Tääts ja teetytyëjkëty ja ja'axy tmä'kxtëty ma wintsë'këntyaknën ets ja jëën tyajmëjëtëty.

⁸Jamts tpëjkta'aktëty ja tsu'utsy mëti'ipë të yajtsujktä'äkyën, ja kyëpajk, y'on ets tyiinty.

⁹Pën ja jëyujk'ooky ënäty nino'oky yäjkpyën, yajxon tpujëty ja tyiinty ets ja y'ixpajk. Ja teety yë'ë nëjkx tnino'kta'ay ma ja wintsë'këntyaknën ets ja Tios yajtukwintsë'ëkëty tä tu'uk yë wintsë'kën oypyë xyuukyën.

¹⁰Pën Tios mtukwintsë'këtyëp yë kupixyny ëkë ja tsajppax, yë'ë myaktëp yë yä'äypyë

¹¹ets xyo'kumtëty anëkëjxytsyow ma ja wintsë'këntyaknën, jam Wintsën wyintum. Yë Aarón yë y'u'unk y'ëna'këty mëti'ipë teety'ajtëpën yë'ë myënëjkxtëp ja ne'pny ets txijkxjëtitëty ma ja wintsë'këntyakn ja pya'ajën.

¹²Ënät ëpëkyjyäty tpëktakta'ajëty ja jëyujk'ooky ets ja teety jam tkëxma'kxëty ma ja wintsë'këntyaknën, mëët ja jëyujk këpajk, ja tyiinty ets ja y'on.

¹³Ja teety mëti'ipë yäjkpyën ja wintsë'kën, jëyëjp tpujëty ja jëyujk tiinty ets ja jëyujk puuy ets tnino'okëty jam ma ja wintsë'këntyaknën mëti'ipë ja Tios tyukwintsë'ëkëpën, tä tu'uk yë ayajk ako'onën mëti'ipë oy xu'kp jojkpën.

¹⁴Pën tyukwintsë'ëkëjäämpy yë Tios tu'uk yë joon ets nino'oky tyaka'any, yë'ë yajtunëp tu'uk yë muuxy ëkë yë kuuk.

¹⁵Ja teety yë'ë jam yakëp ma wintsë'këntyaknën. Nëjkxëp yë yo'kn ets kyëpajk tyajjënajkë ets ënät jam tnino'okëty ma ja wintsë'këntyaknën, tëë ënäty yajxon ja nye'pny tpëjktaayë.

¹⁶Ets ja jyot, tyiinty, kyääytyëjk, nyijëmk tpëjktaayëty ets jam tpëjkta'akëty ma kuyjaam niko'owpety y'ityën mëti'ipë jamtsow yajpatpën xëëwpëtsëmy ma ja wintsë'kën yajyäkyën.

¹⁷Tääts tsujkwa'kxëty këëkujkm ja muuxy ëkë ja kuuk, jäätsow tmatsëty ma kyäknën. Ka'ap timyajjënakëty ja kyäkn, tä tnino'okëty ma wintsë'këntyaknënën, jam ma ja ja'axy tyoyën ets jëtu'un ja Tios yajtukwintsë'ëkëty, tä tu'uk yë wintsë'kënën oypyë xyuuky jyokyën.