Read Biblia Mixe de Quetzaltepec Levitico 13 Bible Online

Levitico 13 - Biblia Mixe de Quetzaltepec bible

Levitico 13

¹Ënät yë Tios ojts tmëkäjpxy yë Moisés ets Aarón ets t'ënëmaay:

²Ko pën kyiixë'ëkëty ëkë nyëtäjtë'ëkëty, ëkë pyëtsëmëty jëtu'un tä pa'ayën ma nyini'kxën, ëkë pu'utsën yaj'ixëty, ënätyë tmënëjkxëty ma teety Aaronkën, ëkë ma nitu'uk yë y'u'unk y'okën.

³Ja teety yë'ë y'ixëp pën tii ënäty ja ja'ay myëët'ajtyp ma nyini'kxën, ko y'akëxë'ëkëty poop ma ja nyi'u'kxyën ets tëë kyëktëkë, yë'ë ënäty ja pu'uts pa'am. Ko jëtu'un ja teety t'ixëty tääts tnikajpxëty ko tääpë ja'ay ëxëëk yë'ë.

⁴E pën ja pu'uts akëxë'këp poop ets näjyëtu'un ja nyi'u'kxy, e ka'ap nëkooyë të kyëktëkë. Tääts ja teety tyajku'ëtukëty ja pa'amja'ay ets jëtu'un jap tyaj'itëty wëxtujk xëëw.

⁵Kom wëxtujk xëëw jatëkok t'ixëty, ko t'ixëty, ka'ap nëkooyë ja pu'uts të kyëjääjë ets je'eyëm kyëxë'ëky ma ja nyini'kxën. Tääts jatëkok tpëjkë'ëkëty, ja wëxtujk xëëwën jëtu'un tjaakyaj'itëty ku'ëtuky.

⁶E kom wëxtujk xëëw jatëkok t'ijxkojnëpëty, ko t'ixëty kujk ja pu'uts tyëkooytyä'äy ets ka'ap nëkooyë të kyëjääjë, ënät ja teety tnikajpxëty ko tääpë ja'ay wa'ats yajpaaty, je'eyë ënäty nëkoopë ja nyi'ak të nyëtetsy. Ja pa'amja'ay je'eyë tjaakpujëty ja wyit ets jëtu'un wyë'ëmnëty wa'ats.

⁷E pën ok kyëjääjë ja xi'ipyë ma ja pa'amja'ay ja nyini'kxën, ma ënäty ja teety të tjanikäjpxyën, ko tääpë yë ja'ay wa'ats yë'ë. Ënätyë jatëkok nyëjkxëty ma ja teetyën ets y'ixëtëty.

⁸Ko ja teety t'ixëty ja pa'amja'ay tëë ja xyi'ipyë kyëjääjë ma ja nyini'kxën, ënät nikajpxëty ko tääpë ja'ay ëxëëktum ënäty yajpaaty, jä'ä ko yë'ë pëjkëp ja pu'uts pa'am.

⁹Ko pën yë pu'uts pa'am pyëkëtëty mëti'ipë xyëëwajtypyën leprë, jam mëpaat ënätyë yajmënëjkxy ma teetyën.

¹⁰Yë teety yë'ë nëjkx y'ixyë, ko ja pu'uts kyëxë'ëkëty poop ets jëtu'un näjyëtu'un kyëxë'ëkëty ja nyi'u'kxy poop ets kyëxë'ëkëty ja xixy'u'unk mëti'ipë jap këk yajpatpën,

¹¹tääpë mëk pa'am ënäty mëti'ipë leprë yajtijpën. Yë teety yë'ë nyikajpxëp ko tääpë ja'ay ëxëëk yajpaaty ets ka'ap y'ëkkopkpëky'ajnëty kyu'ëtukëty, jä'ä ko ëxëëk yajpatnë.

¹²E ko ja pu'uts pa'am nëkooyë kyëjääjëty ets ja nyini'kx nyitujkta'ajëty mëët ja pa'am, jëtu'un tä mëpaat t'ixyën ja teety.

¹³Yë teety yë'ë y'ixëp, ko t'ixëty ko ja pu'uts tëë tyajnitujkta'ay ja nyini'kx ja pa'amja'ay, ënät nëjkx ja teety y'ënä'äny ko ja ja'ay wa'ats jä'änë, jä'ä ko ja pa'am tsokp jatëkok, paaty të y'awinpity poop ets tääpë yë ja'ay wa'ats jatëkok yajpaaty.

¹⁴Ko jatëkok ja pu'uts nyë'ptëkëty ets ja u'unk xixy jap tpaatëty, ja ja'ay ëxëëk jatëkok y'awinpitëty.

¹⁵Ko jatëkok kyëxë'kojnëpëty tëë ja pu'uts nyë'ptëkë ets këxë'knëp ja xixy, ëxëëk ënäty jatëkok wyi'imy.

¹⁶Ko ja pu'uts y'awinpitëty poop ënätyë tninëjkxkojnëpëty ja teety,

¹⁷ets nëjkx yë'ë y'ixyë ets ko ja teety y'ixëtëty, tääts tnikajpxëty ko tääpë ja'ay wa'ats yë'ënë.

¹⁸Ko pën yë pu'uts pa'am pyëkëtëty ets tsyo'okëty y'akëta'akëty.

¹⁹Ma ënäty ja pu'uts të y'ityën y'akëxë'ëkëty poop ëkë natsapts, nyinëjkxëp ënätyë yë teety.

²⁰Ko ja teety t'ixëty ko komytyëjkëp jatëkok ja pu'uts ets ma ja nyi'u'kxyën poop të y'awinpijta'ay, ënätyë y'ëna'anëty ko tääpë ja'ay ëxëëk yë'ë ets jä'ä myëët'ajtyp yë pu'uts pa'am.

²¹Pën yë teety y'ijxyp ko ka'ap tyimwi'ixëty ja pu'uts, ka'ap ma poop y'akëxë'ëkë ja nyi'u'kxy ets ka'ap nëkooyë të nyë'ptëkë, jëtu'un ëtyä'äkyë'äämpy tsyo'okëty, ënät tyajku'ëtukëty ja pa'amja'ay wëxtujk xëëw jap tyaj'itëty.

²²E pën ja pa'am ni'ikyë kyëjääjë, ma ja ja'ay ja nyini'kxën, ënät ja teety tnikajpxëty ko tääpë ja'ay pu'uts pa'am pëjkëp, paatykyëjxm ëxëëk yajtijëty.

²³Ko ja pu'uts ka'ap kyëjääjëty ets jëtu'unyë y'ity, wiinkutsokëp jëtu'un ënäty je'eyë, ënät ja teety y'ëna'anëty, ko tääpë ja'ay wa'ats yë'ë.

²⁴Ko pën nyätsya'ajëtëty ets kyëxë'ëkëty jam ma të tyoyën tsapts ëkë poop.

²⁵Yë teety yë'ë y'ixëp pën ja nyi'u'kxy akëxë'këp poop ma ojts tyoyën ets tëë nyë'ptëkë, tääpë pu'uts pa'am të pyëtë'knë ma ja tooyën. Paaty ja teety jä'ä nëjkx tnikäjpxy, ko tääpë ja'ay ëxëëk yajpaaty mëët yë pu'uts pa'am.

²⁶Pën ja teety ka'ap ma poop ja ni'u'kxy t'ixy ets ka'ap nëkooyë të kyëktëkë ja pu'uts ma ja xixyën, jëtu'unyë kë'ëm ëtyä'äkyë'äämpy tyëkoy. Ënät ja teety tyajku''ëtukëty ja pa'amja'ay ets wëxtujk xëëw tyaj'itëty ku'ëtuky.

²⁷E kom wëxtujk xëëw jatëkok t'ixëty, ko t'ixëty tëë ja pu'uts kyëjääjë, ënät tnikajpxëty ko tääpë ja'ay ëxëëk yajpaaty mëët ko ja pu'uts pa'am tmëëtëty.

²⁸Pën ja tsëtyut tëkoopy kë'ëm ets ka'ap ni'ikyë kyëjääjë, ënät yajnijawëty ko je'eyë ënäty wäänjaty kyiixë'ëky ma ja tayën ets nëjkx tnikäjpxy, ko tääpë ja'ay wa'ats yë'ë, jä'ä ko mëti'ipë akëxë'këpën pu'uts yowë, tooytyëm ja tsoknëp.

²⁹Ko tu'uk yë ye'etyëjk ëkë to'oxytyëjk tmëët'atëty yë pu'uts ma kyëpajkën ëkë ma ja y'ëtsëjtsën,

³⁰yë teety yë'ë y'ixëp ja pu'uts; pën ja pu'uts tëë nyë'ptëkë ets napu'ts kyëxë'ëky ja waay ma ja pu'uts y'ityën, ënät ja teety tnikajpxëty, ko tääpë ja'ay ëxëëk yajpaaty, jä'ä ko yë'ë myëët'ajtyp yë pu'uts pa'am.

³¹Ko ja teety t'ixëty, ko ja pu'uts ka'ap nëkooyë këk kyëxë'ëky ets ja waay ma jam ja pu'utsën, ka'ap pyu'tsëty; ënät ja teety tyajku'ëtukëty ja pa'amja'ay ets wëxtujk xëëw tyaj'itëty ku'ëtuky.

³²Kom wëxtujk xëëw ja teety t'ixëty ja pa'amja'ay, pën ja pa'amja'ay ka'ap ja pyu'uts të kyëjääjë ets ka'ap ja waay y'akëxë'ëkë pu'uts ets ka'ap nëkooyë të kyëktëkë.

³³Ënät ja teety tuk'ënä'ämëty ja ja'ay ets nyä'awaayjyäpëtëty, jämyë ka'ap tjäpëty ma ja pu'uts y'ityën. Tääts jatëkok tyajku'ëtukëty ets ja wëxtujk xëëw tjaakyaj'itëty ku'ëtuky.

³⁴Kom tëtujk xëëw jatëkok ja teety t'ixëty ja pa'amja'ay, pën ja pu'uts ka'ap nëkooyë të kyëjääjë ets ka'ap nëkooyë të kyëktëkë, ënät ja teety tnikajpxëty, ko tääpë ja'ay wa'ats yajpaaty. Je'eyëp ko wyit tpujëty ets jëtu'un wyë'ëmëty wa'ats.

³⁵E pën këjääjëp ja pu'uts ok, oy ënäty të jyayajnikäjpxy ko tääpë ja'ay wa'ats yajpaaty.

³⁶Ja teety nëjkxëp jatëkok t'ixy ja pa'amja'ay. Pën y'ijxyp ko ja pu'uts tëë ni'ikyë kyëktëkë ets ja y'awaay poopënyëp ma ja pu'uts y'ityën. Tääpë ja'ay ëxëëk ënäty yajpaaty.

³⁷E pën y'ijxyp ko ja pu'uts kujk ëka'any tsyo'oky ets ka'ap ja y'awaay pu'ts y'ëk'akëxë'kënë. Jëtu'un yaj'ixëty ko ja jä'ä kujk ënäty tsyo'oky ets ka'ap ëxëëk y'ëkyajpatnë, ënät ja teety kë'ëm tnikajpxëty, ko tääpë ja'ay ka'ap ja ëxëëk y'ëkyajpatnë.

³⁸Ko tu'uk yë ye'etyëjk ëkë to'oxytyëjk pyä'äyëtëty ëkë kyëxë'ëkëty ma nyini'kxën poop.

³⁹Ko ja teety t'ixëty ko ja pu'uts je'eyë wäänjaty tyukmëjojy, ënät yajnijawëty ko tääpë ja'ay ëtëyë pu'uts je'eyë pëjkëp ets wa'ats yë yajpaaty.

⁴⁰Pën nëka'ap yë ja'ay yë wyääy ets kutë'kx wyi'imy, wa'ats yë'ë.

⁴¹E pën nëka'ap yë wyääy wintuuytsyow ets winpoktë'kx wyi'imy, wa'ats näjyëtu'un.

⁴²E pën këxë'kp jap jëtu'un tä yë xi'ipyën natsapts, ma ënäty kyuka'ayën, wä'än tjëxkë'ptsowëty, ëkë wä'än twintuuytsyowëty, yë'ë ënäty pëtsëëmp yë pu'uts pa'am.

⁴³Ënät ja teety nëjkx y'ixyë. Ko ja teety t'ixëty ja pu'uts ko napoop y'akëxë'ëkë ets natsapts ma ja kyuwaay kyä'äyën, jëtu'un tä yaj'ixyën ma nyini'kxën.

⁴⁴Tääpë ja'ay yë'ë ënäty pëjkëp yë pu'uts pa'am. Jä'ä ko ja pu'uts tëë jap nyäpyëjktä'äkyë ma kyëpajkën. Tääts nëjkx ja teety nyikäjpxyë ko ëxëëk yajpaaty.

⁴⁵Ko pën yë pu'uts pa'am pyëkëtëty, yë'ë mëpaat yë wit tpëjktä'äky mëti'ipë këëtsën ets niwa'ats yë kyëpajk tyaj'itëty, wäänjaty wiinkujuuxë yajpaatëty ets mëk y'ëna'anëty: Ëxëëkës. Ëxëëkës.

⁴⁶Ëxëëk yajpaatëty ko ja pu'uts pa'am pyëkëtëty, atu'uk jyuuky'atëty ets ka'ap kajpnjoty tyëkëty.

⁴⁷Ko muum y'akëxë'ëkëty ma u'kxy witën ëkë oywyitën,

⁴⁸ma witxuyën ëkë po'ojën, ma po'oxuyën,

⁴⁹ets kyëxë'ëkëty natsuxk ëkë natsapts, tääpë pu'uts pa'am ënäty ets kopkpëky ko yë teety t'ixëty.

⁵⁰Yë teety yë'ë nëjkx t'ixy pën pu'uts pa'am ënäty ets tyajku'ëtukëty wëxtujk xëëw.

⁵¹Kom wëxtujk xëëw nëjkx yaj'ixy ja wit, ja po'o, ëkë pën tii ënäty; pën ja ëxëëkpë tëë kyëjääjë, pu'uts pa'am ënäty, mëti'ipë ënäty ja ëxëëkpë myëët'ajtypyën ëxëëk ënäty yajpaaty.

⁵²Paaty pën ja jëtu'unpë myëët'ajtypyën, kopkpëky ko yajnino'okëty, jä'ä ko yë'ë ënäty myëët'ajtyp ja ëxëëkpë ja pu'uts pa'am.

⁵³E ko ja teety t'ixëty ko ja ëxëëkpë ka'ap të kyëjääjë.

⁵⁴Ënät tni'ënä'ämëty ets ja wit tpujëty ets wëxtujk xëëw ni'ëtuky tjaakyaj'itëty.

⁵⁵Ko ënäty tëë ja wit y'ëkyajpujy, ënät ja teety jatëkok t'ixëty, pën y'ijxyp ko ka'ap të jyënäky ja ëxëëkpë, jä'ä ënäty ja pu'uts pa'am. Kopkpëky ko nëjkx nyitoy, oy ënäty ja ëxëëkpë ka'ap të kyëjääjë, jä'ä ko tääpë ëxëëkpë yë'ë mëti'ipë ënäty winë yajma'typën, oynyëkëjxyëty ëkë oy pya'tkë'pëty.

⁵⁶E ko t'ixëty ja teety tëë tyëkooytyä'äy ma ja wit xuy ëkë ma ja po'oxuyën, ënät je'eyë tnëkëëtsëty ja wit ma ënäty të y'ityën ja ëxëëkpë.

⁵⁷Ko jatëkok kyëxë'kojnëpëty, ma ja witën, ëkë ma ja po'oxuyën ënät jëtu'unyë tyimyajnino'kta'ajëty ja ëxëëk wit.

⁵⁸Ja wit xuy mëti'ipë ënäty të yajpujyën ets të tyëkooytyä'äy ja ëxëëkpë, nëjkxëp jyaak yajpujy jatëkok ets jëtu'un wyë'ëmëty wa'ats.

⁵⁹Yaa jëtu'un të yajnimëtyä'äky wi'ix yaj'ixëtyën yë wit, po'oxuy ëkë wit tä'äky, ko yë pu'uts pa'am pyaatëtëty ets yajnijawëty pën wa'ats ënäty ëkë pën ëxëëk.