Read Biblia Mixe de Quetzaltepec Levitico 17 Bible Online

Levitico 17 - Biblia Mixe de Quetzaltepec bible

Levitico 17

¹Ënät yë Tios ojts tmëkäjpxy yë Moisés ets t'ënëmaay:

²Ënëëmë yë Aarón ets y'u'unk y'ëna'k ets tëkokyë yë Israel ja'ayëty, ko yë Tios të tu'uk yë ënä'ämën tyäky:

³Pën yaj'o'kpy tu'uk yë tsajpkaa, tu'uk yë kupixyny ëkë tu'uk yë tsajppax naaxjoty kajpnjoty, ëkë jam muum kajpnpë'am,

⁴ets ka'ap jam tmënëjkxëty ma ja wit tëjkën ma ja näpyaatë y'ityën ets jeexyë yë'ë tukwintsë'ëkë. Pokytyuunp jëtu'un ënäty, mëët ko ja ne'pny temy tje'etsy, kopkpëky ko nëjkx yajjo'otsy ma ja myëkunaax myëkukajpnën.

⁵Ya'atë paatykyëjxm yajnikäjpxy ets Israel ja'ayëty tukwintsë'ëkëtëty ja Wintsën yë jëyujk mëti'ipë ënäty muum wintë'ëtstuuy yaj'o'ktëpën ets tukninëjkxtëty yë teety ma yajnitëkën ja wit tëjk ma näpyaatë y'ityën ets yë'ë tukwintsë'ëkëty yë Wintsën mëët yë'ëkyëxm ko ënäty tuna'antë ja nay'ëëw'oy näykyajpx'oyë.

⁶Ënät ja teety ja ne'pny tuknixijkxëty ja wintsë'këntyakn, jam ma yajnitëkën ja wit tëjk ma ja näpyaatë y'ityën mëët yë Tios. Jam tnino'okëty ja on mëti'ipë ja Tios yajmoopyën, tä tu'uk ayajk ako'onën mëti'ipë oy xu'kp jojkpën.

⁷Ets nijëna'a ka'ap xy'ëkmooynyëtëty ja wintsë'kën tääpë mëjku'u, mëti'ipë jeky të xy'ëwtatën ets mëti'ipë ëxëëk të myaj'ëtë'ëts të myaj'ëna'anëtën. Ya'atë ënä'ämën xëmëkyëjxm jëtu'un y'itëty ma miitsëtyën mëti'ipë itaanpën u'unk ok.

⁸Ënëëmë näjyëtu'un, ko wä'än yë'ëjëty yë Israel ja'ayëty ëkë wä'än yë'ëjëty jaaypyaat jaaypyo'kxy mëti'ipë yajpatëpën ma miitsëtyën, ko tii wintsë'kën tyaktëty nino'oky nixämy,

⁹ets ka'ap tmënëjkxëty jam ma ja wit tëjkën ma ja näpyaatë y'ityën ets jeexyë yë'ë tukwintsë'ëkë, kopkpëky ko nëjkx yajjo'otsy ma ja myëkunaax myëkukajpnën.

¹⁰Ëjts ëxëëkës n'ixa'any ko tu'uk yë Israel ja'ay ëkë jaaypyo'kxyjyä'äy, mëti'ipë tsënääpyën ma miitsëtyën, tjë'kxëty yë ne'pny, wä'än twi'ixtsowëty. Yë'ë kopkpëkyës ko nyaj'ookëty ma ja nyaax kyajpnën.

¹¹Jä'ä ko tëkokyë mëti'ipë juukyajtpën mëët yë'ëkyëjxmëtën jyuuky'äty ko ne'pny tmëëtëty, yë ne'pny tëë yë miitsëty nmo'otë ets yë'ë yë mjuukyajtënëty xytyukkuyaktëty jam ma wintsë'këntyaknën.

¹²E paaty jëtu'un n'ënëëmës tëkokyë yë Israel ja'ayëty: Këtii xyjyë'kxtëty yë ne'pny ets ni yë'ë jaaypyaat jaaypyo'kxy mëti'ipë tsënaaytyëpën ma miitsëtyën, ka'ap mëpaat yë ne'pny tjë'kxy.

¹³Wä'än yë'ëjëty yë Israel ja'ay ets wä'än tyë'ëjëty yë jaaypyaat jaaypyo'kxy, pën myäjtsyp tu'uk yë ujtsjëyujk ëkë joon mëti'ipë yajtsu'tspën, jëyëjp mëpaat yajxon tyajwintajxta'ay ets ja nye'pyny tnaaxnitajëty.

¹⁴Jä'äxë ko yë ne'pyny yë'ë jëtu'un yajjuuky'ajtp. Paaty miitsëty n'ënëëmëtë, ko këtii yë ne'pny xyjyë'kxtëty, jä'ä ko yë'ë juukyajtën'ajtp. E pëntsëtën jyi'kxyp kopkpëky ko y'ookëty.

¹⁵Ko tu'uk yë Israel ja'ay ëkë jaaypyaat jaaypyo'kxy tsu'utsëty yë jëyujk, mëti'ipë najts'ookën, nëjkxëp yë wyit tpujy ets nëjkxëp kë'ëm nyäpyujy nyäjye'etsyë wa'ats ets ëxëëk jëtu'un wyë'ëmëty tyimkutsu'ujëty, oknëm wa'ats jatëkok wyë'ëmëty.

¹⁶E pën kajts ja wyit tpujy ets ka'ap yajxon nyäpyujy nyäjye'etsyë, kë'ëm jëtu'un ja nëë poky ënäty nyätyuknipëkyë.