Read Biblia Mixe de Quetzaltepec Levitico 2 Bible Online

Levitico 2 - Biblia Mixe de Quetzaltepec bible

Levitico 2

¹Ko pën yë Tios tuknimina'anëty yë aaypyajk ujtspajk, yë'ë mëpaat tmëminy yë oyëtypë tsajpmokway ets mëët tukmëpëkëty yë on ets poom.

²Ënät tukninëjkxëty ja Aarón ja y'u'unk y'ëna'k mëti'ipë teety'ajtëpën ets nitu'uk tu'kkë'ëjaaxy tja'axpëtsëmëty ja tsajpmokway mëët ja nyi'on ets ja nyipoom, jam tkëxpëkëty ma ja wintsë'këntyaknën ets jam tnino'okëty, mëët ko ja ja'amyäjtsën tuny ets ja Tios jä'ä tukwintsë'ëkëty ja oypyë ja xyu'kën jyojkën.

³Ja ayajk ako'onën mëti'ipë natëjkëpën, ja natëkë mëti'ipë kënu'kxyëtyën mëti'ipë yë Wintsën yajtukmëjja'apën, yë'ë ja Aarón jyä'ä'atëp ets ja y'u'unk y'ëna'k.

⁴Ko ja m'ujts tëëm m'ujts pajk xykyë'ëyaka'anëty ma Tiosën ets jap xyajkëty ma tu'uk yë tsijtkën, yë'ë myakëp yë tsajpkääky mëti'ipë oytyunyën mëët yë jëtsy mëti'ipë tijjëtitypë mëët yë on, je'eyëp ko ka'ap tsyooymyëëtëty, ëkë oy yë'ëjëty yë tsajpkääky tsyë'ëts pejypyë ets mutskjatyëty mëti'ipë ka'ap tsyooymyëëtëtyën, yë'ë on mtuknixijkxëp.

⁵Pën mtukmëyoxäämpy yë Tios tii winë mëti'ipë ontë'ëts yaj'oytyuunpën, yë'ë myajtunëp yë oypyë tsajpmokway ets ko xytyijëtitëty mpëjkta'akëp yë on, je'eyëp ko këtii xypyëjkta'akëty ëpëky yë nyitsooy.

⁶Tääts xytsyujkwa'kxëty kanaakpëky ets ëpëky jatëkok yë on xytyuknipëkëty, jëtu'un xyoxëty ja m'ujts tëëm m'ujts pajk ma ja Tiosën.

⁷Pën ja mëti'ipë ënäty myoxäämpyën, jap të xy'oytyuny tu'tsjoty, mëti'ipë yë Tios mo'ojäämpyën, yë'ë myajtunëp ja oyjyätyëtypë tsajpmokway ets ontë'ëts.

⁸Ko ënäty të xyaj'o'oyëtyä'äy mëti'ipë myakäämpyën, ënät xymyënëjkxëty jam ma ja Tiosën ets xytyukkë'ëtëkëty ja teety, yë'ëts jam myënëjkxëp ma ja wintsë'këntyaknën.

⁹Tääts ja teety wäänë jam tkëxpëkëty ja mookway ma ja wintsë'këntyaknën ets tyajnitoyëty, jä'ä wa'anëp tä ja potsyën ma ja wintsë'kën yajyäkyën, mëti'ipë ja ja'amyäjtsën mëët yajtunyën ets ja xu'kën jojkën janty'oy jam jya'tëty ma Tiosën.

¹⁰E ko nyatëkëty, mëti'ipë ënäty ja Tios të yajtukmëyoxyën, ja ayajk ako'onën ja kënu'kxypyë, mëti'ipë të tyoy të jyemyën, yë'ë ja Aarón jyä'ä'atëp ets ja y'u'unk y'ok.

¹¹Këtii yë tsajpkääky tsyooy xypyëjkta'aktëty ma ja m'ujts tëëm m'ujts pajkën, mëti'ipë ja Tios mooytyëpën ets yë'ë näjyëtu'un nikajpxäämpyës, ko yë tsajpkääky tsyooy ets uuxpa'ak këtii xyaktëty jam ma Tiosën nino'oky nixämy.

¹²Yë tsajpkääky tsyooy ets uuxpa'ak jyëkyejpy xyaktëty ma Wintsënën, tä yë ayajk ako'onën mëti'ipë yajyajkpën ko tiipëjktä'äky më''ëka'any tyëëm'ajtë'ëky, je'eyëp ko ka'ap mëpaat xyaktë ma ja wintsë'këntyaknën tä ja wintsë'kënën oypyë xyuuky jyokyën.

¹³Tëkokyë yë m'aaytyëëm m'ujts tëëm mtukmëxëpinëp yë kaan, mëti'ipë yë Tios mo'ojëpën ets kaan ka'ap tyëkoy'atëty ma ja m'aaytyëëm m'ujts tëëmën, mëët ko ja käjpxytyu'unën ojts mëët ja Tios yajtuny. Ko yë m'ayajk m'ako'onën xyaka'anëty mëët yë nyikaan xyajkëty.

¹⁴Ko ja Tios xytyukwintsëkëja'anëty ja mpëjktä'äky mëti'ipë ëka'any tëëmpäjtë'kpën, yë'ë tyëëm myajkëp, mëti'ipë ënäty yajxon të myëjayën ets xyaj'ëkëty jëënjoty, tääts xymyä'äjëty, jä'ä ja mëti'ipë ënäty ëka'any tëëm'ajtë'kpën.

¹⁵Ma ja mnäyoxë xyaka'anyën, mpëjkta'akëp yë on ets poom nëkëjxy, jä'ä ko yë'ë ja ayajk ako'onën mëti'ipë aaypyajk ujts pajkën.

¹⁶Tääts ja teety wäänë tyajnitoyëty ja aaypyajk ujtspajk, mëti'ipë ënäty të yajme'eyën mëët yë on ets mëët tëkokyë yë poom, jëtu'un'äämpy yë Tios yajmo'ojëty ya'atë ayajk ako'onën nino'oky ma ja ja'amyäjtsën yajtunyën.