Read Biblia Mixe de Quetzaltepec Levitico 21 Bible Online

Levitico 21 - Biblia Mixe de Quetzaltepec bible

Levitico 21

¹Ënät yë Tios ojts tmëkäjpxy yë Moisés ets t'ënëmaay: Mëëtmëtya'ak yë teetytyëjkëty, yë Aarón y'u'unk y'ok ets xy'ënëëmëty, ko këtii mëpaat nyätyukyaj'ëxëëkëtë, ko yë o'kpë toontëpëty, oy ënäty tjajëëky'at tjamëku'uk'atë mëti'ipë të y'ookyën.

²Jä'ä tëy ko yë'ë y'ookëty yë tyeety, tyaak myaank, nyëëx, ëkë y'äjty,

³ëkë tsyë'ë, mëti'ipë atu'ukën ets mëët të y'ity, jä'ä ko ka'ap ënäty pyikynyëm, mëët yë'ë jyänty jyëkyejpy oy ëxëëk y'ëkwë'ëmëty.

⁴E pën ja jyiiky myëku'uk pëkynyë ka'ap kyopkpëkyëty ets nëkoo nyäyaj'ëxëëkëtëty.

⁵Ka'ap mëpaat nëkoo janty kutë'kx nyäkyaapëtë ets y'awaayëty nän ka'ap mëpaat nëkooyë tjäptë. Ni yë'ë yë jyot nyini'kxëty mëpaat nëkoo tkayajtsëtyutë.

⁶Ni'ik jëtu'un mëpaat wa'ats yajpaatë ma Tyiosëtyën, këtii ja xyëëw t'ëxëëktijëtëty. Jä'ä ko yë'ë jëtu'unëty yajktëp yë ayajk ako'onën mëti'ipë yajno'kpën ets ja tsajpkääky mëti'ipë yajmoopyën ja Tyiosëty. Paaty jä'ä jëtu'un mëpaat nyäyaj'itëtë wa'ats.

⁷Näy ka'ap tjëkyepy tpëktëty, tu'uk yë to'oxytyëjk mëti'ipë yë nyini'kx tyo'kpyën ets mëti'ipë tëë yë naaxwiinyëtë ja'ay atsip myëëtko'knëtyën ets mëti'ipë tëë nye'ëxmajtsënëtën. Jä'ä ko yë'ëjëty tëë yë Tios kyënu'kxëtë.

⁸Jä'ä jëtu'un mëpaat xymyëët'aty wa'ats. Jä'ä ko yë'ë jëtu'unëty xëmë kyë'ëyajktëp ja tsajpkääky ma Tiosën mëti'ipë mTios'ajtypyën. Paaty wa'ats jëtu'un mëpaat y'itë, jä'ä koos mëti'ipë Wintsën'ajtpën, wa'atsës yë'ë, etsës jä'äs yë'ëjëty mpëjkta'aktë wa'ats.

⁹Pën ja teety ja nyëëx näyyajma'tëp kë'ëm ets ja nyini'kx to'knëty. Ja tyeety jëtu'un ënäty kyamëj'ijxyp kyamëjpëjktäkpy, paaty yë'ë kwanë ko ajuukyë nyitooynyëty.

¹⁰Mëti'ipë ja teetytyëjkëty nyiwintsën'ajtypyën, yë'ë jëtu'un ja kutujkën myëët'ajtyp ets ja wit tpëjkta'akëty mëti'ipë të yajtukmëkënu'kxën ets mëti'ipë ojts ja on yajtukujaaxyën. Paaty yë'ë ka'ap mëpaat yë wyääy tnajtsmatsë ets ni wyit tkakëëtsëty, ko tmëkjawëty ko ënäty pën të y'ooky të tyëkoy.

¹¹Näyjyëtu'un yë'ë ka'ap mëpaat tyëkë ma ja o'kpë yajpaatyën, oy ënäty yë'ë të jyatimy'o'kpë yë tyaak ëkë tyeety, ka'ap mëpaat jëtu'un ja ëxëëkpë nyätyukpaatyë.

¹²Ka'ap mëpaat jap nijëna'a tsyoony ma ja Tios ja jyëën tyëjkën ets ka'ap mëpaat t'ëxëëktuny. Jä'ä ko ma yë'ëjën yë'ë jam ja on të yajpëjktä'äky ma kyëpajkën, mëti'ipë mëët winë yajtukkënu'kxyën mëti'ipë ja Tios jyä'ä'ajtypyën.

¹³Yë'ë mëpaat tpëky tu'uk yë to'oxytyëjk, mëti'ipë ka'ap yë naaxwiinyëtë ja'ay nijëna'a tmëët'itynyëmën.

¹⁴Ka'ap jëtu'un nijëna'a tjëkyepy ets tpëjkpëty yë to'oxytyëjk mëti'ipë ku'ookyën, ëkë mëti'ipë tëë yë nyiye'etyëjk mëët nyänyikäkënën, mëti'ipë atsip muum të yajmëëtko'knën, ëkë mëti'ipë yë jyot nyini'kx tyo'kpyën. Yë'ë jëtu'un tyo'oxytyëjk'atëp, mëti'ipë ka'ap nijëna'a mëët yë ye'etyëjk tsyëënënëm ets myëku'uk'ajtyp.

¹⁵Këtii ixtijy tyajwë'ëmpëty ja myëku'uk mëti'ipë mëët tyu'kjëëky'äty tyu'kmëku'uk'atyën. Jä'ä koos mëti'ipë Wintsën'ajtën tëëjës yë nkënu'kxtë.

¹⁶Ënät ja Tios ojts tmëkäjpxy ja Moisés ets t'ënëmaay:

¹⁷Ënëëmë yë Aarón, ko tyam ets tyu'uye'eyëty jëtu'un yë xëëw jëmëjt, ni pën mëpaat jap kyatëkë ma ja Tios ja jyëën tyëjkën ets tpëjkta'akëty ja tsajpkääky, pën ka'ap y'oyëty myëkëty ets pën ka'ap ja kyë'ë tyeky y'oyëty ets ja jyot nyini'kx.

¹⁸Oy ko tëyajtën ntimkyajpxëtyës, ni pën mëpaat ma ëjtsën kyawa'këxë'ëky; mëti'ipë wiintsën tekymya'atën, jëjp keyën, tatsk keyën,

¹⁹mëti'ipë kë'ë wi'its teky wyi'itsën,

²⁰mëti'ipë jëëku'uxën, mëti'ipë tim yi'inëm tënääpyën, ets näjyëtu'un mëti'ipë wiin'ëëxën, winmokën, winpa'ayën, ëkë pën ka'ap y'oyëty yë jyuukyajtën.

²¹Nitu'uk jëtu'un mëpaat yë Aarón yë y'u'unk y'ok, mëti'ipë teety'ajtpën tkayäky yë wintsë'kën ma Tiosën, mëti'ipë yajnino'kpën, pën ka'ap y'oyëty myëkëty ets pën ka'ap yë jyot nyini'kx y'oyëty kyä'pxyëty. Yë'ë ka'ap yë y'oykya'pxëty, paaty ka'ap yë tjëkyepy tyakëty yë tsajpkääky ma Tiosën.

²²Pën kyayäämpy jyëkyäpëp yë tkayëty, oy yë'ëjëty mëti'ipë kënu'kxyën ets mëti'ipë wa'atsën.

²³Je'eyëp ko ka'ap tjëkyepy jap nyëjkxëty jëxkë'p'äämpy ma wyit'atëëytyukëtyën ets ma ja wintsë'këntyaknën. Këtiipë jëtu'un ja y'oyajtën ja ntëjkës kyayajwinkutsë'ëkëty, ko ënäty yë'ë ka'ap y'oyëty myëkëty ets kyakä'pxyëty. Ëjts jëtu'un Wintsën mëti'ipë yë'ëjëty kënu'kxëtëpën.

²⁴Moisés ojts jëtu'un ya'atë ja aaw ayuk tukmëmëtyakta'ay ja Aarón, ja y'u'unk y'ëna'k ets nitëkokyë ja Israel ja'ayëty.