Read Biblia Mixe de Quetzaltepec Levitico 26 Bible Online

Levitico 26 - Biblia Mixe de Quetzaltepec bible

Levitico 26

¹Këtii xy'oytyuntëty yë naaxpotsy ets awinax. Ni yë'ë yë tsaatsetsy xykyayaj'oyëtëty ets mëti'ipë wintsë'ëkë myaj'itëpën, këtii yë'ë xy'ëwtatëty. Jä'ä ko ëjts Wintsën, mëti'ipë miits mTiosajtëpën.

²Wintsë'ëk mëjjawëtë yë npo'kxënxëëwës ets yaj'ixëtë yë näywyinkutsë'kën maas yë njëën ntëjkën. Jä'ä ko ëjts Wintsënajtp.

³Pën yë'ë mkuuyjyuuky'ajtëp ëjts yë n'ënä'ämën ntëyajtën ets mpatuuntëp mëti'ipës nkäjpxypën.

⁴Ëjts nkäxëpës yë nëë tuu ma tnixëëw nijëmëjt'atyën ets aay kepy oy tsuj tyëëmpätëty mëti'ipë kamwinm tu'uwinm yajpatëpën.

⁵Nëjkxëp yë mka'ayën m'ukën xymyëët'atë mëjwiin këjää, koonëm ja wiinkpë ja pëjktä'äky pyëtë'ëkëty, tä yë tsajpmokën ets tsatym tyëëmën, ku'uxyë nëjkx mkaytyë m'uuktë ets m'itëty ku'uxyë jotkëtä'äky ma ja mnaax mkajpnëtyën.

⁶Jotkujk nëjkx nyaj'itë ma mnaax mkajpnëtyën ets ko ma'atëty mpo'kxtëty nitii ets ni pën mka'ëtsë'ëkëtëty, tä yë mmëtsip më'atsu'uxën ets jëyujk ëwa'anëtypë nyajjëwa'kta'ajäämpyës yë'ë.

⁷Miitsëty nëjkxëp xyajkä'äk xyajpojtë yë mëtsiptëjkëty ets nëjkxëp xykyupujxta'atë ninu'un mwinkuja'tëtën.

⁸Pën nimëkoxk miitsëty nëjkxëp xy'ëkyajkäknëtë nimëko'px, pën nimëko'px miitsëty nëjkxëp xy'ëkyajkäknëtë nimajk mil ets jëtu'unyë nëjkx ja mëtsiptëjkëty xykyupujxta'atë mëët yë mtëypyujxnëty.

⁹Janty oy miitsëty nëjkx njawëtë ets nëjkxëp nyajnimayëtë, yë nkäjpxytyu'unënës xëmës nmëët'ata'any mëët miitsëty.

¹⁰Ja jë'kxy pëky mëti'ipë ënäty të xynyipëjkpätën tëëyëp, jekpyaat nëjkx xyjyë'kxtë. Nëjkxëp ja tëjk xytyuktsëëmtu'utë ma ënäty pëjkë'ëky xyaj'itën ets nëjkx ja jemypyë jap xypyëjkta'aktë.

¹¹Ëjts yajpaataanpës xëmë ma miitsëtyën ets nijëna'a miitsëty ixtijy nkayajwë'ëmtëty.

¹²Naxaanp tëkëjaanpës xëmë ma miitsëtyën, etsës nëjkx mijts xyTios'atë ets miits nkajpn'atëp.

¹³Ëjts jëtu'un Wintsën, mëti'ipë miits mTiosajtëpën, mëti'ipë ojts mjuutëtën jap Egiptë. Këtiipë m'ëk mëtuun m'ëk ëyoownëtëty ma yë'ëjëtyën. Jëtu'un ojts miitsëty nyajpëtsëmtë, jap tä jeexyë ja tejpxy, ëkë ja tsëmy ntuknipëjktu'ut ntuknikäjtu'utën, mëti'ipë ënäty më''ëyoowtëpën ets ënät janty akujk janty jotkujk m'ijnëtëty.

¹⁴E pën miitsëty ka'apës xymyëmëtowtë ets ka'ap xy'ëkpatuunëtëty ijxtëmës yam njani'ënä'ämën,

¹⁵Ets ka'ap xy'ëkmëjpëjktaknëtë ja n'ënä'ämënës ntëyajtënës ets ka'ap xy'ëkpatuunëtëty ja n'aaw n'ayukës, xyjyä'äytyëkooynyëtëty jëtu'unyë ja käjpxytyu'unën, mëti'ipës të njatunyën mëët miitsëty.

¹⁶Ëjts wiinkës jëtu'un njawëja'any, nëjkxëp ntukjoot'anpëktë. Nëjkxëp ntuknikäxtë mëti'ipë atsë'ëk ajawën, pa'am ëyo'on mëti'ipë yaj'o'kp yajtëkoopyën, tä yë mëkjëënpa'amën, wiinpa'amën ets ma ni'kx kopk pyiky y'atonyën. Oy mjani'ip mjaakkojtëty, yë mëtsiptëjkëty yë'ë nëjkx tjë'kxtë tpëktë ja mpëjktä'äkyëty.

¹⁷Ëjts nmëtsipës n'awinpita'any mëët miitsëty, ja ja'ayëty mëti'ipë ënäty mëtsip'ajtëtëpën, ëxëëk nëjkx mtunëtë ets yë'ë nëjkx y'ënä'ämtë ma ja mnaax mkajpnëtyën, mëti'ipë ënäty m'ëxëëk'ijxëtëpën, jëtu'unyë mkä'äktëty mputëty, oy ënäty ni pën mkapapo'ojëtë.

¹⁸Pën kä'äpyëm jëtu'un mëtowtë, oy jëtu'un ja ëyo'on xyjyapaat xyjya'ixtë, nëjkxëp jatëkok ntëytyuntë ets wëxtujk'ok nëjkx nyajni'ikënës ja ntëytyu'unënës.

¹⁹Ëjts ka'apës jëtu'un nkupëka'any ets miitsëty janty mëj janty akëjxm mnäjyawëtëty. Njëpëkäämpyës ja nëë tuu tsajpwinm ets ka'ap jam tii xypyaatëty mkamwinm mtu'uwinmëty.

²⁰Natëkë miits yë mëjaaw xyaj'ixtuntëty jam mkamwinm mtu'uwinmëty. Nitii jam kyamuxëty ets aay kepy ka'ap nëjkx tyëëmpätë.

²¹Pën miitsëty kä'äpyëm nkäjpxyjyä'äkyukëtë ets ka'ap ninu'un xytyim'a'ixëtë xymyëmëtowa'antës. Miitsëty kopkpëky ko jatëkok ntëytyuntëty ets wëxtujk'ok nëjkx njaakyajni'ikës ja tëytyu'unën ma miitsëtyën.

²²Nkäxëpës yë jëyujkëty ma miitsëtyën, mëti'ipë nëjkx myajwë'ëmëtën u'unktuk. Nëjkxëp tyaj'o'kta'ay ja mjëyujk mtsajpkaajëty ets niwäänë nëjkx mjaakwë'ëmtë, ni pën nëjkx kya'ëknajx kya'ëktëjkënë në'ëjoty tu'ujoty.

²³Pën kä'äpyëm jëtu'un xyaj'oyëtë ja mjot mwinma'anyëty ets je'eyëm ka'ap nkäjpxyjyä'äkyukëtë.

²⁴Ëjts nëjkxëpës näjyëtu'un miitsëty ntukjoot'anpëktë. Nëjkxëp jatëkok ntëytyuntë, nän ja wëxtujk'ok jyaak ni'ikëty ja tëytyu'unën ma miitsëtyën.

²⁵Nëjkxëpës nmëminy nyajminy ja ja'ay mëti'ipë mtukpajëtijtëpën ja tëypyujxn ets yë'ë nëjkx tnitsiptuny ja nkäjpxytyu'unënës, mëët ko ënäty xykya'ëkmëjja'awënëtë. Nëjkxëp jotëkoy mjanëjkxtë ma jeexyë mtso'oktën. E ëjts nkäxëpës jam ja pa'am ëyo'on ets kwanë nëjkx mka'atë ma ja mëtsipëtyën.

²⁶Koos ënäty nyajkutëkoy ja it naaxwiinyëtë ma ja mjë'kxy mpëky xypyëjkë'ëktën. Tu'uk je'eyë ja tsijtk, tukmuktëty ja to'oxytyëjkëty ma ënäty ja tsajpkääky tyajkë'ëwtën, mëti'ipë miits mkaytyëp. Ets nuky e'kxy je'eyë mjaakaytyëty ets ka'ap nëjkx mku'uxëtë.

²⁷E pën kajtsën ninu'un nkäjpxyjyä'äkyukëtë ets je'eyëm ka'ap xymyëmëtowa'antës.

²⁸Ëjts nëjkxëpës näjyëtu'un miitsëty ntukjoot'anpëktë. Nëjkxëp ntëytyuntë mëët ja mëkjoot'an ets wëxtujk'ok nëjkx jyaak yajni'ikës ja tëytyu'unën ma miitsëtyën, mëët ja mpokykyëjxmëty.

²⁹Ënät nëjkx xytsyu'tsnëtë ja mkë'ëm'u'unk mkë'ëm ëna'këty.

³⁰Nëjkxëpës nyajkutëkooytyä'äy ja nyitsajptëjk ja mtiosëty ets mäjtskpëkyës nëjkx nyajwa'kxë ja nyipotsy ma ja wintsë'kën yajyäkyën ma xywyinno'ok xywyinxamtën mëët ja poom, yajxon nëjkx nijëtujtpetyës ja may o'kpë, ko ënäty të m'o'kta'atë, ma ja mwiinktiosëtyën. Ets jëtu'un nëjkx nyaj'ixyës mëët ko ënäty miitsëty ninu'un nka'ëktimmyä'kxënëtë.

³¹Nëjkxëpës njijta'ay ja mnaax mkajpnëty ets ka'apës nëjkx oy nxuuk'aty ja npa'akxu'k npa'akjojkënëty ets ja on mëti'ipë oy jaxu'kp jajojkpën.

³²Nëjkxëpës ja naax kajpn nyajkutëkoy ets ja mëtsipëty mëti'ipë ënäty jam miintëpën tsënääpyë, janty mëj winma'any nëjkx t'ëk'ixtë.

³³Jëtu'unyë nëjkx n'awojpwa'kxtë ets jëtu'un mkä'äktëty mputëty, tä jeexyë pën yë tëypyujxn mtukpajëtitëtën. Anë'ëk tëëtsë'ëk nëjkx ja naax kajpn y'awinpijnë ets ja'ayë ja may pyotsykyutuk kyëxë'knëty tsë'ëkë jawë.

³⁴Ënät ja naaxwiinyëtë nëjkx janty jotkujk nyäjyawëty, mëët ko ënäty ka'ap pën y'ëkwintsënaayënë. Ets ko ënäty jam myajpatnëtë ma ja mëtsipëty ja nyaax kyajpnëtyën. Jëtu'un'äämpy nëjkx ja naaxwiinyëtë näjyëtu'un jotkujk nyäjyawëty, mëët ko ënäty miits ëxëëk mjatë mkëpätë ets nëjkx ja po'kxën t'ixynyëm, ma ënäty ka'ap jeky të pyo'kxyën.

³⁵Jënu'un ënäty winwa'ats yajpaatyën, jëtu'un nëjkx ja naaxwiinyëtë ja po'kxën t'ixy, ma ënäty ka'ap të pyo'kxyën, ko ja mayjyä'äy jam të tsyëënëtë.

³⁶E pën ënäty juuky jaakwë'ëmtëp ma ja myëtsip ja nyaaxëtyën, tsë'ëkë mëët nëjkx jyaak juuky'atë, je'eyë muum yë ujts'aay nyaka'ajëty, timnakä'äktëp. Jëtu'un kyä'äktëty pyutëty, tä jeexyë pën tyukpajëtitëtën yë yenypyujxn ets kë'ëm muum y'ooktëty tyëkoytyëty oy ënäty pën wi'ix kyatunëtë.

³⁷Kë'ëm nëjkx muum nyäwyinkuja'atëtë, tä jeexyë mkä'äktën tsipjotm, oy pën mkapapo'ojëtëty. Ma miitsëtyën ni pën ja myëtsip tkawinkuwa'akëja'anëty.

³⁸Nëjkxëp mkutëkooytya'atë ma ja mnaax mkajpnëtyën, ja nyaax kyajpnëty ja mëtsipëty yë'ë nëjkx myajkëjxta'ajëtë.

³⁹E pën ënäty jaakwë'ëmpën juuky, kyë'ëmpoky nëjkx yaj'ookëtë. Tu'ukyë nëjkx tku'o'këtya'atë mëët ja tyeety tyaakëty ja nyëë pyokyëty.

⁴⁰E jä'ä nëjkx xyjyajawëtë ja mpokyëty ets ja pyokyëty ja mteety mtaakëty, mëët ko ënäty ka'ap oy të xymyëtuntës ets ko ënäty ka'ap të tuntë këwentë ja n'aaw n'ayukës.

⁴¹Patyës ëjts miitsëty të ntukjoot'anpëktë ets të nyajnëjkxtë jam ma ja mëtsipëty ja nyaax kyajpnëtyën, ma ja m'ëxëëk winma'anyëty ojts ka'ap jä'ä tyunyën ets ja mpoky xykyumëtoowtë.

⁴²Ënätës nëjkx nja'amyetsy ja nkäjpxytyu'unënës, mëti'ipës ntuunën mëët yë Jacob, Isaac ets Abraham, näjyëtu'un ja naaxwiinyëtë nëjkxëpës nja'amyetsy.

⁴³Winwa'ats nëjkx wyi'imy ets nëjkxëp pyo'kxy ma ënäty ka'ap jam m'ëktsënaaynyëtën. Jëtu'un'äämpy ja mpokyëty ënäty xykyumëtowtë, mëët ko ka'ap të xytyuntë këwentë ja n'aaw n'ayukës ets mëët ko të xykyapatuntë ja n'ënä'ämënës ntëyajtënës.

⁴⁴E pën tëë jëtu'un jyäty kyëpety ets miits jam myajpatnëtë ma ja nyaax kyajpnëtyën ja mëtsipëty, ka'ap nwiink'ixëty ets ka'ap n'ixtijtë; ka'ap nyajkutëkoytyëty ets nkuuytyunäämpyës ja käjpxytyu'unën mëti'ipës ntuunën mëët ja m'ap m'okëty, jä'ä ko ëjts Wintsën, mëti'ipë miits mTiosajtëpën.

⁴⁵Tiits ni'ikyës jatëkok nja'amyätsa'any ja nkäjpxytyu'unënës, mëti'ipës ojts mëët ntuntën, koos jap nju'të jap Egiptë, ma t'ijxtën ja mayjyä'äyëty ets ja wiink naax wiinkajpnëty, tääts ëjts xyTios'ata'antë. Ëjts jëtu'un Wintsën.

⁴⁶Ya'atë jëtu'un ënä'ämën'ajtp tëy'ajtën'ajtp ets ijxpëjkën'ajtp, mëti'ipë ojts yë Tios tyajwë'ëmyën mëët yë Moisés ma Israel ja'ayëtyën jam ma ja kopkën, mëti'ipë xyëëwajtypyën Sinaí.