Read Biblia Mixe de Quetzaltepec Levitico 3 Bible Online

Levitico 3 - Biblia Mixe de Quetzaltepec bible

Levitico 3

¹Ko pën tukwintsë'ëkëja'anëty yë tsyajpkaa wä'än yë'ëjëty yë tsajpkaato'oxy ëkë tsajpkaayä'äy, mëët ko ja nay'ëëw'oy näykyajpx'oyë tmëët'ata'any mëët ja Tios, ja jëyujk oy mëk mëpaat jyëyujk'aty ets kä'pxy

²Pën ja ayajk ako'onën yäjkpyën jam ja kyë'ë tkëxkonëty ma ja tsajpkaa ja kyëpajkën mëti'ipë ënäty ja Tios tyukwintsë'këpën ets jam tyo'kumëty ma ja wit tëjk yajnitëkën, ma ja Tios jap kyëtä'äkyën; ënät ja teetytyëjkëty jam txijkxjëtitëty ja tsajpkaa ne'pny ma ja wintsë'këntyakn ja pya'ajën.

³Pën ja Tios tyukwintsë'ëkëjäämpy ja tsajpkaa ets tuna'any ja nay'ëëw'oy näykyajpx'oyë, yë'ë nyino'okëp yë tsajpkaa on mëti'ipë ënäty jam mnëtsujkpyën ma ja myoxën ets ma ja myëj tiintsyën.

⁴Ja nyi'on mëti'ipë jamën ma mäjtskëty ja myëjtiintyën mëti'ipë anëkëjxy yajpatpën ma ja pyuuyxyixy y'ityën ets näjyëtu'un ja on mëti'ipë nyiwits'ajtypyën ja myääts, tu'ukyë yajnëtsukëty mëët mäjtskëty ja myääts.

⁵Yë'ë nëjkx yë teetytyëjkëty tyajnitoytyë ya'atë ma wintsë'këntyaknën, tu'ukyë mëët ja tsajpkaa mëti'ipë jam nitoyaanpën ma ja ja'axy jam tyoyën, jëtu'un ja Tios yajtukwintsë'ëkëty ya'atë ayajk ako'onën oypyë tsujpë xyuuky jyokyën.

⁶Pën yë'ë yë kupixyny yë Tios mtukwintsë'ëkëjantëp, mëët ko xytyuna'antë ja nay'ëëw'oy näykyajpx'oyë. Yë mwintsë'kën'atëp mëti'ipë oy mëkën ets kä'pxyën oy yë'ë yä'äypyë ëkë to'oxypyë.

⁷Pën yäjkpy tu'uk yë kupixyny ma Tiosën.

⁸Jam ja kyë'ë tkëxkonëty ma ja kupixyny ja kyëpajkën ets ënät ok tyo'kumëty jam wintum ma ja wit tëjkën ma Tios kyëtä'äkyën, tääts ja teetytyëjkëty txijkxjëtitëty ja ne'pny ma ja wintsë'këntyakn ja pya'ajën.

⁹Pën yäjkpyën ja tsyajpkaayä'äy ëkë tsyajpkaato'oxy ets tuna'any ja nay'ëëw'oy näykyajpx'oyë, yë'ë yajnitoyëp ets tmo'ojëty ja Tios ja y'on ets ja pyi'ixy mëti'ipë ënäty nyëtsujkëp ma ja jyëwiitsën ets ja nyi'on mëti'ipë jam nyëtsujkëpën ma ja tyiintyën,

¹⁰ja myëjtiinty mäjtskëty, ja on mëti'ipë nyiwitsajtypyën ets mëti'ipë jam yajpatpën ma pyuuyxyixyën, näjyëtu'un ja on mëti'ipë yajpatpën ma ja myäätsën ma mëët ja myëjtiinty nyämyätsyën.

¹¹Ënät ja teety jam tu'ukyë tnino'kta'ajëty ma ja wintsë'këntyaknën, mëti'ipë ja Tios yajmoopyën tä tu'uk yë jë'kxy pëky oypyë xyuuky jyokyën.

¹²Pën myoopy yë Tios tu'uk yë tsajppax, ko tyakëty

¹³jam yë kyë'ë tkëxkonëty ma kyëpajkën ets ënät ok tyo'kumëty jam tëjk'ëkë'ëm ma ja wit tëjkën. Ja teetytyëjkëty yë'ë nëjkx jam txijkxjëtitë ja nyine'pny ma ja wintsë'këntyakn ja pya'ajën.

¹⁴Mëti'ipë ënäty yäjkpyën ya'atë ayajk ako'onën jyëkyejpy yë Tios tukwintsë'ëkëty tëkokyë ja nyi'on mëti'ipë ënäty jam nyëtsujkëpën ma ja tyiintyën.

¹⁵Näyjyëtu'un ja myëjtiinty mäjtskëty ets ja y'on mëti'ipë yajjënäjkpyën ma pyuuyxyixyën ets ja on mëti'ipë jam jënajkpën ma myäätsën, mëti'ipë mëët tu'ukyë tyajënäkyën ja mëjjatyëtypë ja tyiinty.

¹⁶Ja teety yë'ë nëjkx tnino'oky tëkokyë ya'atë ma wintsë'këntyaknën, tu'uk ja jë'kxy pëky mëti'ipë ja Tios yajtukwinno'kp yajtukwinxaanpën oypyë xyuukyën, tu'kë'ëyë ja on Tios jyä'ä'ajta'ajëp.

¹⁷Ya'atë ënä'ämën xëmëkyëjxm y'itëty ets u'unk ok yajpaatëty, oy jëtu'un maa mtimjyuuky'atëty, ka'ap mëpaat ja jëyujk on xyjyë'kxtë ets ni nye'pny mëpaat xykyajë'kxtë.