Read Biblia Mixe de Quetzaltepec Levitico 4 Bible Online

Levitico 4 - Biblia Mixe de Quetzaltepec bible

Levitico 4

¹Ënät ja Tios ojts tmëkäjpxy ja Moisés ets t'ënëmaay:

²Ënëëmë yë Israel ja'ayëty, ko pën pyokytyunëty ajotkumonë ets tkäjpxykyutëjëty ja ënä'ämën tëyajtën mëti'ipë ënäty ja Tios të tni'ënä'ämën yajpatunëty, ya'atë nëjkx tuntë:

³Pën yë'ë pokytyuunp yë teety wyintsën ets jëtu'un'äämpy ja naax kajpn tyaj'ëxëëktëkë, yë'ë yakëp tu'uk yë tsajpkaa u'unk, mëti'ipë oyën mëkën ets kä'pxyën jam ma Tiosën ets yë'ë ja nyëë pyoky tukunaxëty.

⁴Jam tmënëjkxëty Tios wintum, ma ja wit tëjk yajnitëkën, ma ja Tios mëët ja näpyaatë y'ityën, jamts tkëxkonëty ja kyë'ë ma ja tsajpkaakëpajkën, tääts ënät ok tyo'kumëty.

⁵Yë'ë näjyëtu'un kë'ëm myënëjkxëp ja ne'pny jap tsajptëkoty ma ja wit tëjkën;

⁶ënät ja kyë'ëjëjp näjyëtu'un tukpaatëty ja ne'pny ets yë'ë mëët jam txijkxjëtitëty Tios wintum wëxtujk'ok, jam winkon ma jam ja tsajptëjk mëët ja wit y'atëëytyukëtyën.

⁷Ënät nëjkx näjyëtu'un tukuutsy wäänë ja ne'pny ja wintsë'këntyakn ja nyiwajën, ma jam ja poom tyoyën, mëti'ipë jam ijtpën Tios wintum ma ja wit tëjkën ma näpyaatë y'ityën. E ja ne'pny mëti'ipë ënäty natëjkëpën jam nëjkx txijkxjëtity ma ja potsyën, ma wintsë'kën yajyäkyën, ma ja jëyujk nyitoytyën mëti'ipë jam ijtpën ma ja wit tëjkën; ma ja näpyaatë y'ityën mëët ja Tios.

⁸Tääts nëjkx tnëtsujktaayë ja tsajpkaa on ma xyixyën ets ma ja tyiintyën mëti'ipë ënäty ja Tios të tukwintsë'ëkën.

⁹Mäjtskëty ja myëjtiinty, ja on mëti'ipë nyiwits'ajtypyën yë pyuuyxyixy ets ja on mëti'ipë näjyëtu'un jam yajnëtsujkpën ma myäätsën, mëti'ipë tu'ukyë mëët jyënakëtyën ja mëjtiinty mäjtskëty,

¹⁰jëtu'un tä ja tsajpkaa yajpëjkën ja jyä'ä, ko yajyäky ma Tiosën, mëët ko ja nay'ëëw'oy näykyajpx'oyë y'ity. Tääts ja teety ënät jam tno'okëty ma ja wintsë'këntyaknën ma ja jëyujk nyitoytyën.

¹¹E ja nyipo'o mëti'ipë yajnëtsujkpën ma ja tsajpkaa ëna'kën ets ja nyitsu'uty tu'ukyë mëët ja kyëpajk, ja pyuuy, ja tyiinty ets ja tyi'iny

¹²jä'ä jëtu'un tu'kë'ëyë jënu'un ja tsajpkaa winë tmëët'atyën, jam nëjkx xypyëjktä'äky muum ëpëky ma y'ëwaatsëtuuyëtyën, jam tu'ukyë tmënëjkxta'ajëty ma ja kuyjaam nyipetyën ets jam tnino'okëty.

¹³Pën naax kajpn të pyokytyuny ma ka'ap t'aawëty tjotëtyën ets ka'ap pën të tnijawë ko jä'ä kyäjpxykyutëjtëp ja Wintsën ja y'ënä'ämën tyiyajtën ets jëtu'un të pyokytyëëmë'ëktë.

¹⁴Tim je'eyë ko nijawëtëty ko tëë pyokytyuntë, kopkpëky ko tkë'ëyaktëty tu'uk ja tsajpkaa ayääkë ets ja Tios tukwintsë'ëkëtëty ets jä'ä kyunaxëtëty, mëët ko të pyokytyuntë. Jam nëjkx tmënëjkxtë ma ja wit tëjkën ma ja näpyaatë y'ityën mëët ja Tios.

¹⁵Ma ja mëjja'aytyëjkëty tkëxkontëtyën ja kyë'ë ma ja tsajpkaa ayääkën ja kyëpajkën, jam ma ënäty yajpaatën Tios wintum, tëëjës ënäty jëtu'un tuntë, tääts jämyë tyo'kumtëty.

¹⁶Ënät ja teety kyopk wäänë tmënëjkxtëty ja ne'pny jap ma ja wit tëjkën ma ja näpyaatë y'ityën mëët yë Tios.

¹⁷Tääts jap tpaxajë'ëkëty ets txijkxjëtitëty wëxtujk'ok jam Tios wintum, winkon ma jam wyit'atëëytyukëtyën.

¹⁸Ets wäänë tukuutsëty ja wintsë'këntyakn ja nyiwaj, mëti'ipë jamën Tios wintum ma ja wit tëjkën ma ja näpyaatë y'ityën. E ja ne'pny mëti'ipë natëjkëpën nëjkxëp txijkxjëtity jap tëkotsyow ma ja jëyujk yajnino'oktën ma ja näpyaatë y'ityën.

¹⁹Nëjkxëp ja tsajpkaa ooky tjëpëjktaayë ja y'on ets jam tnino'okëty ma ja wintsë'këntyaknën.

²⁰Ko näjyëtu'un yajyakëty ya'atë tsajpkaa ëna'k tä ja mëti'ipë yajkë'ëyajkpën ko ja nëë poky yajtukunaxy. Jëtu'un'äämpy ja teety ja pokymyä'kxën tpaatëty mëti'ipë ja naax kajpn jyä'ä'atëpën ets ja nyëë pyokyëty yajnimä'kxtëty.

²¹Tä ënät jam jëkäm tmënëjkxëty ya'atë tsajpkaa ëna'k ets jam tyaj'ooktëty, näjyëtu'un tä ja mëtu'ukpë ja tsajpkaajën. Jä'ä ko ya'atë yë'ë ja naax kajpn ja nyëë pyoky yajtukunajxp.

²²Ko tu'uk yë wintsën pyokytyunëty ets jä'ä tunëty mëti'ipë ka'ap ja ënä'ämën tëyajtën tyajkutukyën, mëti'ipë yë Wyintsën Tios ënäty të tni'ënä'ämën, pokymyëët wyë'ëmëty, oy ënäty tsyokyëty kya'ëtë'ëtsy.

²³E ko tja'amyätsëty ko tëëtëm pyokytyuny, yë'ë yakëp tä ayajk ako'onën tu'uk yë tsajppax mëti'ipë oy mëkën ets kä'pxyën.

²⁴Tääts jam ja kyë'ë tpëjkta'akëty ma ja tsajppax ja kyëpajkën ets ënät tyaj'ookëty, jam ma ja Tios tukwintsë'ëkëjänyën, ma ja nyi''itjot jam yajpaatyën. Ya'atë wintsë'kën yë'ë ja nëë poky kyunaxäämpy.

²⁵Tääts ja teety wäänë ja ne'pny tukpatijëty yë kyë'ë ets txijkxjëtitëty jam ma ja wintsë'këntyakn ja nyiwajën, ma ja jëyujk nyitoytyën. E ja ne'pny mëti'ipë ënäty jaaknatëjkëpën jam txijkxjëtitëty ma ja wintsë'këntyakn ja tyënaaypyäjnën.

²⁶Ets ja nyi'on jam tnino'ktaayëty ma ja wintsë'këntyaknën, jëtu'un tä näjyëtu'un yajtunyën ja wintsë'kën mëti'ipë yajyajkpën, ko ja nay'ëëw'oy näykyajpx'oyë y'ity. Jëtu'un'äämpy ja teety tpaatëty ja pokymyä'kxën, mëti'ipë jyä'ä'atëpën ja ja'ay mëti'ipë wintsën ijtpën ets ja pokymyä'kxën tpaatëty.

²⁷Pën tu'uk yë ëyoopëja'ay pokytyuunp ets ka'ap jëtu'un t'aawëty tjotëty ets pokymyëët wyë'ëmëty, mëët ko ënäty të tuny mëti'ipë ja Wintsën ja y'ënä'ämën tyiyajtën yajkupojkpyën.

²⁸Ko tnijawëty ko tëëtëm pyokytyuny, yë'ë yakëp tu'uk yë tsajppax mëti'ipë oy mëkën ets mëti'ipë kä'pxyën, yë'ëts ja pyoky tyukunaxëp.

²⁹Tääts jam ja kyë'ë tkëxkonëty ma ja tsajppax ja kyëpajkën, mëti'ipë ënäty ja pyoky tyukunajxypyën ets jam tyaj'ookëty ma y'ooktën ja jëyujkëty mëti'ipë yajnino'ktëpën.

³⁰Tääts ja teety ja kyë'ëjëjp mëët tukpaatëty ja ne'pny ets tukuutsëty ja wintsë'këntyakn ma ja jëyujk yajnino'oktën. E ja ne'pny mëti'ipë natëjkëpën jam txijkxjëtitëty ma ja wintsë'këntyakn yë tyekyën.

³¹Näyjyëtu'un nëjkx yë y'on yajnëtsujkta'ay, tä ja mëti'ipë wintsë'kën'ajtpën ko ja nay'ëëw'oy näykyajpx'oyë y'ity. Jam tnino'okëty ma ja wintsë'këntyaknën mëti'ipë ja Tios yajtukwino'kp yajtukwinxaanpën ets oy xyuuky jyoky. Jëtu'un'äämpy ja teety ja pokymyä'kxën tpaatëty mëti'ipë tääpë ja ja'ay jyä'ä'atëpën.

³²Pën tääpë ja'ay yë'ë tu'uk myëmiinpy yë kupixyny ets yë'ë pyoky tyukunaxäämpy, yë'ë mëpaat tmëminy yë to'oxypyë, mëti'ipë oy mëkën ets kä'pxyën.

³³Tääts nëjkx ja kyë'ë jam tkëxkony ma ja tsajppax ja kyëpajkën ets tyaj'ookëty, jam ma y'ooktën ja jëyujk mëti'ipë nitooytyëpën.

³⁴Tääts ja teety nëjkx ja ne'pny wäänë tpaxajë'ëky, ja nyine'pny ja jëyujk mëti'ipë ënäty ja poky të tku'ookën ets tukuutsëty ja wintsë'këntyakn ja nyiwaj ma ja jëyujk yajnino'oktën, e ja ne'pny mëti'ipë natëjkëpën jam txijkxjëtitëty ma ja wintsë'këntyakn ja tyekyën.

³⁵Tääts ënät tnëtsujktaayëty ja y'on, jëtu'un tä të yajnëtsujkta'ayën ja y'on ja kupixyny mëti'ipë wintsë'kën'ajtpën, ko ja nay'ëëw'oy näykyajpx'oyë y'ity ets jam tnino'oktëty ma ja wintsë'këntyaknën, tu'kmukyë mëët ja ayajk ako'onën mëti'ipë nino'oky yajtukwintsë'këpën ja Tios. Jëtu'un'äämpy ja teety tpaatëty ja pokymyä'kxën, mëti'ipë ja ja'ay jyä'ä'atëpën mëti'ipë ënäty të pyokytyunyën ets ja nyëë pyoky jëtu'un yajmä'kxëty.