Read Biblia Mixe de Quetzaltepec Levitico 5 Bible Online

Levitico 5 - Biblia Mixe de Quetzaltepec bible

Levitico 5

¹Ko pën yajmëkajpxëty mëti'ipë ënäty tii y'ijxyp nyija'apën mëët ko ënäty tii të t'ixy ëkë të tmëtoy ets yë'ë ka'ap tkupëjkpëty. Poky jëtu'un ënäty tyuunpy ets pokymyëët yë'ë wyë'ëmnëty, mëët ko jëtu'un y'ëti'itsy.

²Ko pën tonëty oy tii, mëti'ipë ënäty ëxëëkën, tä yë jëyujk'ookyën mëti'ipë ka'ap wya'atsëtyën. Wä'än yë'ëjëty mëti'ipë aayjoty ujtsjoty juukyajtpën, ëkë mëti'ipë ma jëën ma tëjkën ijtpën, ëkë tä yë tsa'anyën mëti'ipë ëxëëkën. Ko pën yë jëtu'unpë tonëty, ëxëëk nëjkx wyi'imy, oy ënäty të tka'ixy ëkë të tkajawë.

³Ko pën tonëty yë ëxëëkpë, mëti'ipë yë ja'ay nipëtsëëmëpën, ëkë oy tyimtiijëty mëti'ipë ëxëëkën ets jam tsyoony ma ja'ayën, jä'ä nëjkx wyi'imy ëxëëk.

⁴Ko pën tnikajpxëty ets winë oy tuna'any, ëkë ëxëëk tuna'any ets ka'ap jëyëjp tmëmay tmëtajy; je'eyëp ko ma jëtu'un y'ënä'änyën ka'ap tnijawë pën kajtëm nëjkx y'oy'äty ets ok tnija'awënëty, ko kajtëm jëtu'un y'oyëty, tä të y'ënä'änyën, pokymyëët nëjkx wyi'imy.

⁵Ko yajnijawëty ja mëti'ipë ënäty ja jëtu'unpë të t'ëy të tkäjpxyën, nyikajpxëp jëtu'un mëti'ipë ënäty të tuuntëkoyën.

⁶Ets ja Tios tu'uk tukwintsë'ëkëty yë tsyajppax to'oxypyë, mëët ko ënäty jëtu'un të pyokytyuny. Jyëkyejpy tyakëty tu'uk yë tsajppax ëkë tu'uk yë kupixyny, jëtu'un'äämpy ja teety tpaatëty ja pokymyä'kxën, mëti'ipë ja pokyjyä'äy jä'ä jyä'ä'atëpën.

⁷Pën kajts ja ja'ay nëkooyë ja wit meeny tmëëtëty, mëti'ipë tyukjuyëpën ja tsajppax ëkë kupixyny. Jyëkyäpëp yë'ë tyakëty Wintsën wintum mäjtsk yë muuxy ëkë yë kuuk mëti'ipë kyunaxëpën ja pyoky. Tu'uk mëti'ipë wintsë'kën'atëpën mëëtkyëjxm ja poky ets tu'uk mëti'ipë yajnino'okëpën.

⁸Ets tmo'ojëty jä'ä ja teety ets tukuyakëty jä'ä ja poky. Tääts wäänjaty ja kyëpajk tnëtsukëty, je'eyëp ko ka'ap timyajjënakëty.

⁹Ets ënät ja jëyujk ne'pny mëti'ipë nëë poky kyunajxypyën xyijkxjëtitëty ma ja wintsë'këntyakn ja pya'ajën. E ja ne'pyny mëti'ipë ënäty natëjkëpën jam tjaakxijkxjëtitëty ma ja wintsë'këntyakn ja tyënaaypyäjnën. Yë'ë jëtu'un mëti'ipë ja poky kyunajxypyën.

¹⁰E ja mëmäjtskpë jä'ä nyino'okëp, ejxtëm ja nyitëyajtën myinyën; jëtu'un'äämpy ja teety paatëty ja pokymyä'kxën ma Tiosën, ko ënäty ja ja'ay të pyokytyuny ets nëjkx yajpokymye'kxy.

¹¹E ko ja nyimeeny tkëpätëty ets jeexyë mäjtsk tjuy ja muuxy ëkë ja pak, jyëkyejpy yë'ë tmënëjkxëty mäjtsk tsimën yë tsajpmokway mëti'ipë jä'ä tyukunaxëpën ja nyëë pyoky. Ka'ap tjëkyepy t'onëty ets ni poom mëpaat tkapëjktä'äky, jä'ä ko ya'atë ayajk ako'onën yë'ë ënäty të yajtuknipëjktaakë ma nëë poky yajmä'kxëtyën.

¹²Tääts ja teety tuknixijkxëty ets wäänë tja'axpëtsëmëty ja ne'pyny, mëti'ipë yajtukja'amyätsëpën ets ënät tu'ukyë tnino'kta'ajëty mëët ja wiinkëtypë ja ayajk ako'onën jam ma jä'ä ja jëyujk ne'pny mëti'ipë ënäty ja nëë poky kyunajxypyën mëti'ipë ja Tios yajtukmëjja'apën. Ya'atë ayajk ako'onën yë'ë mëti'ipë ja poky kyunajxypyën.

¹³Ets jëtu'un ja teety tpaatëty ja pokymyä'kxën, mëët ja ja'ay mëti'ipë ënäty të pyokytyunyën ets jëtu'un'äämpy nëjkx ja poky yajme'kxy. E pën yë'ëts ayajkën'ajtp ako'onën'ajtp ja aaypyajk ujtspajk, ko nyatëkëty ja teety ja jyä'ä'atëp.

¹⁴Ënät ja Tios ojts tmëkäjpxy ja Moisés ets t'ënëmaay:

¹⁵Ko yë ja'ay pyokytyunëty ajotkumonë ets yajnijawëty ko tëëtëm kë'ëmwinma'any tii tnixajë, mëti'ipë ja Tios ënäty të yajtuknipëjktaakën. Yë'ë yakëp yë kupixyny yä'äy yä'kpetypë ets yë'ë nyätyukuyakëtëty, mëëtkyëjxm ko ënäty jëtu'un të pyokytyuny. Ets tukwintsë'ëkëty yë'ë yë Tios. Ja tsajpkaa ja tsyow jëtu'un mëpaat tsyoowtëkë, tä ja poop pujxn meeny tsyoowpaatyën ets ja poop pujxn meeny jëtu'un mëpaat yajkijpxy, tä ja kijpxën jap myinyën ma tsajptëjkën.

¹⁶Ya'atë ja'ay kopkpëky ko jatëkok tkë'ëyakëty mëti'ipë ënäty të tonyën ets ëpëky tjaaknikëjuuypyätëty, tu'kpëky ma ja mëkoxkpën. Yë teety yë'ë nëjkx tmo'oy. Ja teety ënät nëjkx ja pokymyä'kxën tpaaty mëët ko ënäty të tyäky ja kupixyny ayääkë mëti'ipë wintsë'kën'ajtpën, mëti'ipë ja ja'ay jä'ä jyä'ä'atëpën, mëti'ipë ënäty të pyokytyunyën.

¹⁷Ko yë ja'ay yë Wintsën yë y'ënä'ämën tyiyajtën tkumëtoownaxëty, oy jëtu'un tkamay tkatajy, yë'ë pokymyëëtëmëtën je'eyëm wyë'ëmëty.

¹⁸Ya'atë mëpaat ja'ay jëtu'unpë tuny, yë'ë yakëp tu'uk yë kupixyny yä'äy yä'kpetypë mëti'ipë oyën mëkën ets kë'ëm xy'a'ixëty jënu'un ja jyëyujk tsyowpaaty. Ets tukninëjkxëty ja teety, mëti'ipë ja pyoky tyukuyäjkpyën. Ets jëtu'un'äämpy ja pokymyä'kxën tpaatëty ja ja'ay mëti'ipë ënäty të pyokytyunyën ajotkumonë ets ja nyëë pyoky nëjkxëp yajme'kxy.

¹⁹Ya'atë wintsë'kën yë'ë jëtu'un ja poky yajtukuyajkp. Jä'ä ko tääpë ja'ay pokymyëët ënäty të wyi'imy ma Tiosën.