Read Biblia Mixe de Quetzaltepec Levitico 6 Bible Online

Levitico 6 - Biblia Mixe de Quetzaltepec bible

Levitico 6

¹Ënät yë Tios ojts yë Moisés tmëkäjpxy ets t'ënëmaay:

²Ko pën yë myëku'uk tmäätsëty ets yë'ëkyëjxm pokymyëët wyë'ëmëty jam Tios wintum; ko ënäty ja myëku'uk të twin'ëëny ma ja wit meeny mëët tyajtuunmukyën, ëkë ko tsoky ja myëku'uk ja wyit myeeny të tpëjkë.

³Ko y'ënta'akëty, ko ka'ap të tpaaty mëti'ipë ënäty ja wiink ja'ay të tyajtëkoyën ets Tios tukajpxpätëty, y'ëna'anëty ko ka'ap tnijawë mëti'ipë jyanija'apën, yë jëtu'unpë ja'ay,

⁴pokymyëët nëjkx wyi'imy ets nëjkxëp tyajkta'ay winë jënu'un tä ënäty ja myëku'uk tii të tpëjkën, të tonyën ëkë të tpaatyën,

⁵oypyënëty mëti'ipë ka'ap tëy tëtä'äky tii të tnikäjpxyën, nëjkxëp tmooytyä'äy ja nyiwintsën; ëpëky tjaaknikëjuuypyätëty ja kujkwä'kxy, ko ënäty ja wyintsë'kën tyäky mëti'ipë ja nyëë pyoky tyukunajxypyën.

⁶Yë'ë nëjkx tmo'oy yë Tios tu'uk yë kupixyny yä'kpetypë mëti'ipë oyën mëkën ets mijts nëjkx xytsyowmo'oy, jam nëjkx tyajtsoony ma tyajtänën yë kyupixyny ets tmënëjkxëty ma ja teetyën, yë'ë tyukwintsë'ëkëp ja Tios mëëtkyëjxm ja nyëë pyoky ja ja'ay.

⁷Ja teety nëjkxëp ja pokymyä'kxën tpaaty Wintsën wintum, mëti'ipë ja ja'ay jyä'ä'atëpën, tëëpë tyuuntëkoyën, mëti'ipë mëjëyëjp të yajnikäjpxyën; jëtu'un'äämpy ja nëë poky nëjkx yajme'kxy.

⁸Ënät ja Tios ojts tmëkäjpxy ja Moisés ets y'ënëmaay:

⁹Tukmëtow ja Aarón ets y'u'unk y'ëna'k tii mëpaat tuntën ko ja jëyujk tno'oka'antëty, ja jëyujk mëti'ipë të wyintsë'kën'atyën tu'ktsu'um mëpaat jam tsyuunaxy ma ja jëënpajkën ets jam nyitoyëty.

¹⁰Yë teety yajxon mëpaat yë nyi'kx kyopk tyajnitujkta'ay mëët yë wit ets ja pya'tk'ëxmots mëti'ipë linë wit mëët xyuyëtyën; ënät tpëjkmujkta'ajëty ja jaam ma ënäty ja jëyujk të tyooykyëtä'äkyën ets nëjkx jam pë'am tpëjktä'äky ma ja wintsë'këntyaknën.

¹¹Ënät ja wyit tjääntëkätsëty ets ja kuyjaam jam jëkäm tmënëjkxëty ma jam tsyëënëtën.

¹²Ja jëën mëti'ipë jam toopyën ma ja wintsë'këntyaknën, ka'ap mëpaat nijëna'a pyi'itsy, winjopy yë teety tpëjkta'akëty yë ja'axy ma wintsë'këntyaknën ets jam tkëxpëkëty yë jëyujk'ooky mëti'ipë yajnino'okaanpën. Ëpëky ma yajnino'kyën ja jëyujk ja nyi'on mëti'ipë yajyajkpën ko ja nay'ëëw'oy näykyajpx'oyë y'ity.

¹³Yë jëën ka'ap mëpaat jam tyëkoy'ity ma wintsë'këntyaknën ets nijëna'a kyapi'itsëty.

¹⁴Yaa jëtu'un myiny kuja'ay ma yajnimëtyä'äkyën, wi'ix mëpaat yajmo'oyën yë Tios yë aaypyajk ujtspajk; yë teetytyëjkëty jam mëpaat tpëjkta'aktë ma wintsë'këntyaknën ma jam yë Tios yajpaatyën.

¹⁵Nitu'uk pën tja'axpëtsëmëty yë tsajpmokway mëët yë nyi'on mëti'ipë yajyajkpën ets mëët näjyëtu'un ja poom mëti'ipë mëët nyijkxyën tu'ukyë ja ayajk ako'onën. Ënät jam tno'okëty ma ja wintsë'këntyaknën mëti'ipë yajtukja'amyätsëpën ja wintsë'kën ets jëtu'un jya'tëty ja xu'kën jojkën jam ma Tiosën.

¹⁶Mëti'ipë ënäty ja ayajk ako'onën natëjkëpën, yë'ë Aarón jyä'ä'atëp mëët ja y'u'unk y'ëna'k ets tsajpkääky yë'ë mëti'ipë ka'ap tsyooymyëëtëtyën, jam tjë'kxtëty tpëktëty ma wya'atsëtyën ma ja tyëja'awën ja wit tëjk ma näpyaatë y'ityën.

¹⁷Ka'ap mëpaat tyajkë'ëwtë mëët yë tsajpkääky mëti'ipë tsooyën. Yë'ëjës yam nmooytyëp ets patëtëp wäänë tjä'ä'ajtpëtëty mëti'ipës ëjts yajtukmëyojxpën. Yë'ë wa'ats yë mëj këjää, jëtu'un tä yë ayajk ako'onën mëti'ipë yë nëë poky yajtukuyajkpën.

¹⁸Jëtu'un xëmë y'itëty, nyaxëty ja xëëw jëmëjt, tëkokyë yë yä'äy'ëna'ktëjkëty mëti'ipë yë Aarón y'u'unk'ajtyp y'ëna'k'ajtypyën, jyëkyäptëp tjë'kxtëty ja ayajk ako'onën mëti'ipës ëjts yajmoopyën, mëti'ipë ja ayajk ako'onën nyo'ktëpën ma ja wintsë'këntyaknën mëti'ipë tyukwintsë'këtëp yë Wintsën. Oy tyimtiijëty mëti'ipë ya'atë ayajk ako'onën patëpën, wa'ats wyë'ëmëty.

¹⁹Ënät yë Tios ojts tmëkäjpxy yë Moisés ets t'ënëmaay:

²⁰Ya'atë yë Aarón ets y'u'unk y'ok yaktëp ma Wintsënën ko ënäty yajtuknipëktë ja teety'ajtk, mäjtsk tsim yë tsajpkääkwyäy, kujkwä'kxy tyakëty jopyëp ets kujkwä'kxy tjaakyakëty jënäkxyëëw. Jëtu'un winjëpom tunëty, ka'ap mëpaat nitu'kxëëw nyinaxy.

²¹Ko ënäty tyaka'antë ya'atë ayajk ako'onën, jap tyaj'oyëtëty ma tu'uk yë tojkx tu'tsën, mëët yajxon txëpintëty yë on ets ko ënäty të kyëëwta'ay tääts tsujkta'aktëty ets yë'ë Tios tyukwintsë'ëkëtëp ets jya'tëty jam wyintum tä tu'uk yë xu'kën jojkën janty oypyë.

²²Jëtu'un tyaj'oyëty ja teety, mëti'ipë ënäty wintsën ijtpën ma ja Aarón ja y'u'unk y'okën, mëti'ipë ja tuunk të tmëwë'ëmyën, tä ja Aarón ënäty të tyunyën. Ya'atë ayajk ako'onën yë'ë Tios patëp, e paaty kopkpëky ets yajno'kta'ajëty.

²³Tëkokyë ja ayajk ako'onën mëti'ipë yë teetytyëjkëty yajktëpën, yajnino'kta'ajëp, jëtu'un ni pën mëpaat tkajë'kxy.

²⁴Ënät ja Tios ojts ja Moisés tmëkäjpxy ets t'ënëmaay:

²⁵Tukmëmëtya'ak yë Aarón yë y'u'unk y'ëna'k ya'atë ënä'ämën; ko ënäty tyaktë ja wintsë'kën, mëët ko të pyokytyuntë, ja jëyujk tsajpkaa yo'kkumy tyaj'ooktëty Tios wintum, jam ma y'ooktën ja jëyujkëty mëti'ipë yajnino'ktëpën. Yë wintsë'kën wa'ats kënu'kxy yë'ë.

²⁶Ja teety mëti'ipë ja wintsë'kën yäjkpyën, jyëkyäpëp tsu'utsëty ja nyitsu'uty, jap tsu'utsëty ma tu'uk yë it naaxwiinyëtë wa'atspë, jap ma ja nyitëja'awën ja wit tëjk ma näpyaatë y'ityën.

²⁷Ko ya'atë tsu'utsy muum jya'tëty, näjyëtu'un yë itjotmën wa'ats wyë'ëmëty, pën yë wit nipijkëyëp yë ne'pny, jap yajpujëty ma itjotmën wa'atspë.

²⁸Ja nyitu'ts ma ja tsu'utsy të wyinkë'ëyën, timyajpu'uta'ajëp ënätyë, pën jap ënäty të nyi'ëëtsy ma tu'uk yë pujxntu'tsën, jyëkyejpy yajtukpujëty wa'ats.

²⁹Ya'atë wintsë'kën ni'ik wa'ats mëpaat nyäxy, yi'iyë patëtëp tkaytyëty tsu'utstëty yë teetytyëjkëty.

³⁰Ja jëyujk mëti'ipë ënäty jap të yajmënëjkxyën ma ja wit tëjkën ma ja näpyaatë y'ityën, ni pën mëpaat tkatsu'utsy, jä'ä ko ya'atë wintsë'kën poky ënäty të yajtukunaxy jam ma ja Tios ja jyëën tyëjkën ets ja nëë poky tmä'kxëty. Tääpë wintsë'kën jëënjoty mëpaat nyitooytyä'äy.